വഴി മറന്നു പോയവര്‍

അഞ്ചു കല്‍പ്പനകള്‍ (പുതിയത്)

2011-07-02T10:18:00.000+03:00

1. മതസ്ഥാപനത്തില്‍ നിന്നുള്ള വരുമാനം കൊണ്ട് ജീവിക്കുന്ന ഒരു പുരോഹിതനും ആ ഇടവകയിലെ ഏറ്റവും ദരിദ്രനേക്കാള്‍ ഉയര്‍ന്ന നിലവാര്‍ത്തില്‍ ജീവിച്ചുകൂടാ

2. മത സ്ഥാപനത്തിലെ സ്വത്തുക്കള്‍ ദൈനംദിന ചിലവിനും ശേഷിക്കുന്നവ ഇട്ടവകയിലെ ദരിദ്രര്‍ക്കും രോഗികള്‍ക്കും ആവശ്യാനുസരണം കൊടുക്കണം

3. മിച്ചം വരുന്നവ റോഡുകള്‍ -പാലങ്ങള്‍ മുതലായ പണിയുവാന്‍ പ്രത്യേക നിധിശേഖരം ഉണ്ടാക്കി സര്‍ക്കാരിനു കൈമാറണം.

4. ഒരു മത സ്ഥാപനവും ധനം ആര്‍ജ്ജിക്കുവാന്‍ ലാഭാധിഷ്ടിതമായ വ്യാപാര-വ്യവസായങ്ങള്‍ ആരംഭിക്കുകയോ നടത്തുകയോ ചെയ്യരുത്.

5. റോഡിനരികില്‍ സ്ഥാപിച്ചിരിക്കു ന്ന ഭിക്ഷാടന-ഭണ്ടാരക്കുറ്റികള്‍ എടുത്തുമാറ്റുക. (ദൈവം മനുഷ്യനോടല്ല, മനുഷ്യന്‍ ദൈവത്തോടാണ് യാചിക്കേണ്ടത്)

ആരാണീ ആകാശപ്പറവകൾ.??/

2011-05-29T15:53:00.001+03:00

ആകാശപ്പറവകൾ വാർത്തയിൽ ഇടം നേടിക്കൊണ്ടിരിക്കുന്നു . ബസ്സിലും ബ്ലൊഗിലും പോസ്റ്റുകളും റീഷെയറുകളും തകൃതിയായിനടക്കുന്നു. ദാരുണമായി കൊലചെയ്യപ്പെട്ട സൗമ്യയുടെ കൊലപാതകക്കേസിലെ കുറ്റവാളി ഗോവിന്ദചാമി മതം മാറി ചാർളി തോമസ് ആയി എന്നും മതം മാറ്റത്തിനു പിന്നിൽ ആകാശപ്പറവകൾ എന്ന പ്രാർത്ഥനാ ഗ്രൂപ് ആണെന്നും ഡെയ്`ലി മലയാളം റിപ്പോർട്ട് ചെയ്യുന്നു.

സുവിശേഷം മനുഷ്യനെ തെറ്റില്‍നിന്നും ശരിയിലേക്ക് നയിക്കാനുള്ള ദൈവനിയോഗമാണ്. എന്നാല്‍ കുറ്റവാളികളേയും കൊള്ളക്കാരേയും സംരക്ഷിക്കാനും സുവിശേഷത്തിന്റെ മഹത്തായ ലക്ഷ്യങ്ങള്‍ ഉപയോഗിക്കുകയാണോ - എന്നും പത്രം ചോദിക്കുന്നു.

ആകാശപ്പറവകൾ എന്ന പ്രാർത്ഥനാഗ്രൂപ് ആരു നടത്തുന്നുവെന്നോ, എന്താ അവരുടെ ആശയമെന്നോ, നടത്തുന്നവരുടെ ഉദ്ദേശമെന്തെന്നോ- എനിക്കറിയില്ല. അങ്ങിനെ ഒരു ഗ്രൂപ് ഉണ്ടോ എന്നു പോലും അറിയില്ല.

എന്തായാലും അവരുടെ ഇടപെടൽ സുവിശേഷപ്രവർത്തനത്തിൽ ഏർപ്പെടുന്നവരുടെ ഉദ്ദേശശുദ്ധി ചോദ്യം ചെയ്യുന്ന നിലയിലേക്കു കാര്യങ്ങൾ എത്തിയിരിക്കുന്നു. സുവിശേഷപ്രവർത്തനത്തിൽ ഏർപ്പെടുന്ന ഒരാൾ എന്ന നിലയിൽ, ഞാൻ മനസിലാക്കിയ സുവിശേഷം കുറ്റവാളിയേയും കൊള്ളക്കാരേയും ഒരു തരത്തിലും രക്ഷപ്പെടാൻ കൂട്ടു നിൽക്കുന്നതല്ല.

മറിച്ച് കോടതികൾക്ക് ചെയ്യുവാൻ കഴിയാത്ത ഒരു മഹത്കാര്യം സുവിശേഷത്തിനു ചെയ്യുവാൻ കഴിയും . ചെയ്ത കുറ്റത്തിനു തക്ക ശിക്ഷ നൽകുവാൻ കോടതി ശ്രമിക്കുമ്പോൾ കുറ്റവാളിക്കു പാപബോധം വരുത്തുവാനണ് സുവിശേഷം ശ്രമിക്കുന്നത്. . പാപബോധം വന്ന ഒരുവനെ മാനസാന്തരത്തിലേയ്ക്കു നയിക്കുന്നതാണ് യദാർത്ഥ സുവിശേഷപ്രവർത്തനം. മാനസാന്തരം വന്ന ഒരാൾ പിന്നീട് പപത്തിലേയ്ക്കു തിരിച്ചുപോവുകയുമില്ല എന്നു സുവിശേഷം പഠിപ്പിക്കുന്നു.

എന്നാൽ ഇപ്പറഞ്ഞതിൽ നിന്നും കുറ്റം ചെയ്തയാൾ മാനസാന്തരപ്പെട്ടാൽ ശിക്ഷ ഇളവുചെയ്യണമെന്നോ രക്ഷെപ്പെടുത്തണമെന്നോ അർത്ഥമില്ല.

പത്ര വാർത്തയിൽ നിന്നും ഗോവിന്ദചാമിയെന്ന ചാർളി തോമസ് പ്രാഥമിക വാദത്തിൽ തന്നെ കുറ്റം നിഷേധിച്ചിരിക്കുകയാണ്.

ഗോവിന്ദചാമിയ്ക്കു ബൈബിളിന്റെ അടിസ്ഥാനത്തിൽ മാനസാന്തരം ഉണ്ടായിട്ടില്ല എന്നതിന്റെ ഒന്നാമത്തെ തെളിവു ഇതു തന്നെ.

യദാർത്ഥമായി ഗോവിന്ദചാമി ബൈബിൾ കേൾക്കുകയോ ക്രിസ്തുവിൽ വിശ്വസിക്കുകയോ ചെയ്തിരുന്നെങ്കിൽ ഒരിക്കലും കുറ്റം നിഷേധിക്കുമായിരുന്നില്ല, ഒരൊറ്റ വക്കീലിനേയും വയ്ക്കുമായിരുന്നുമില്ല. (ഗോവിന്ദചാമി തന്നെയാണ് കുറ്റം ചെയ്തത് എന്ന മാധ്യമങ്ങളുടെ വാർത്തയെയും പോലീസിനേയും വിശ്വസിച്ചുകൊണ്ണ്ടാണ് ഇതെഴുതുന്നത്)

കോടതിയോടും, സമൂഹത്തോടും, സൗമ്യയുടെ കുടുംബത്തോടും തെറ്റു ചെയ്തത് താൻ തന്നെയാണ് ഏറ്റു പറയുമ്പോൾ മാത്രമേ സുവിശേഷത്തിലൂടെയുള്ള മാനസാന്തരത്തിന്റെ ഒന്നാമത്തെ പടി പൊന്നുച്ചാമി ചവിട്ടുകയുള്ളൂ. ജഡത്തിൽ വിതച്ചത് ജഡത്തിൽ കൊയ്യും എന്നാണ് ബൈബിളിന്റെ പ്രമാണം. മനുഷ്യൻ നിർമ്മിച്ച നിയമ സംഹിതയ്ക്കനുസരിച്ചുള്ള ശിക്ഷഅനുഭവിച്ചേപറ്റുകയുള്ളൂ. എന്നാൽ നിത്യ ശിക്ഷയിനിന്നുമുള്ള മോചനത്തിന്റെ മാർഗ്ഗമാണ് ക്രിസ്തുവിന്റെ സുവിശേഷം.

ക്രിസ്തുവിനോടൊപ്പം കുരിശിൽ തറയ്ക്കപ്പെട്ട രണ്ടു കള്ളന്മാരുടെ സംഭാഷണം ബൈബിളിൽ പരാമർശിച്ചിട്ടുണ്ട്. ഒരാൾ മറ്റേയാളോട് പറയുകയാണ്, "നാമോ കുറ്റം ചെയ്തിട്ടു ശിക്ഷ അനുഭവിക്കുന്നു - "

അതെ, ഇതാണ് മാനസാന്തരത്തിലേയ്ക്കുള്ള വാതിൽ- അപ്രകാരം പറഞ്ഞകള്ളന് ക്രിസ്തു ശിക്ഷയിൽ നിന്നും ഇളവു ചെയ്യുകയോ മോചിപ്പിക്കുകയല്ല മറച്ചു ആർക്കും കൊടുക്കുവാൻ കഴിയാത്ത ഒരു ഉറപ്പ് കൊടുക്കുകയാണ് ,

"ഇന്ന് നീ പറുദീസയിൽ എന്നോടോപ്പം ഇരിക്കും"

ആകാശപ്പറവകൾ, ഗോവിന്ദചാമിയെ മോചിപ്പിക്കാൻ വക്കീലന്മാരെ നിയോഗിക്കുന്നു എന്ന പത്രവാർത്ത ശരിയാണെങ്കിൽ- നിങ്ങൾ വെല്ലുവിളിക്കുന്നത്, ഭാരതത്തേയും നമ്മുടെ നിയമ സംഹിതകളേയും മാത്രമല്ല.

പാപികൾക്കു വേണ്ടി മരിച്ച യേശുവിനോടും അവന്റെ വചനങ്ങളോടുമുള്ള വെല്ലുവിളിയാണത്-

നിങ്ങൾ ക്രിസ്തുവിനെ അപമാനിക്കുന്നു എന്നു പറയാതെ തരമില്ല.

വായിച്ചിരിക്കേണ്ട പുസ്തകം -ഭാഗം. 2

2010-09-24T22:41:00.001+03:00

ഭാഗം-1 ഇവിടെ വായിക്കാം

അടുത്ത ഒരാഴ്ച ഫര്‍സ്റ്റ് ചര്‍ച്ചിലെ വിശ്വാസികളുടെ ചര്‍ച്ചാ വിഷയം ഇതു മാത്രമായിരുന്നു. കഠിനമായ ജീവിതയാഥാര്‍ത്ഥ്യങ്ങള്‍ അയാളെ ഒരു മാനസിക രോഗത്തിന്റെ വക്കില്‍ എത്തിച്ചിരിക്കുന്നു എന്നു പലരും വിലയിരുത്തി. എങ്കിലും, ആര്‍ക്കും അയാളോട് അപ്രിയം തോന്നിയിരുന്നില്ല. കാരണം, മൃദുവായ ശബ്ദത്തില്‍, ക്ഷമാപണത്തോടുകൂടിയായിരുന്നു അയാളുടെ വാക്കുകള്‍. ആരേയും പരോക്ഷമായിപ്പോലും കുറ്റപ്പെടുത്തിയിരുന്നതുമില്ല. ആ സഭ വിശ്വാസികളില്‍ ഒരാളെപ്പോലെതന്നെ ഒരു ആത്മീയ വിഷയത്തിന്റെ ഉത്തരം തോടുന്നവനായി തോന്നി.

" ഇന്നത്തെ യോഗം കഴിഞ്ഞു"

ആ ചെറുപ്പക്കാരന്‍ നിലത്തു വീണ ഉടനെ മാക്സ്‌വെല്‍ സഭയേ അറിയിച്ചു. എല്ലാവരും സ്തബ്ദരായി ഇരിക്കുകയായിരുന്നു.

സഭ പിരിഞ്ഞു, അവര്‍ അയാളെ എടുത്ത് ഒരു കട്ടിലില്‍ കിടത്തി. ചുരുക്കം ചിലര്‍ ചുറ്റും കൂടി നിന്നും.

"ഇനി എന്തു ചെയ്യും ?"

"എന്തായാലും എന്റെ വീട്ടിലേയ്ക്കു തന്നെ കൊണ്ടു പോകാം." മാക്സ്‌വെല്‍.

"എന്റെ വീട്ടില്‍ അമ്മ തനിച്ചല്ലേ ഉള്ളൂ "ഉടന്‍ തന്നെ റേയ്ച്ചല്‍ വിന്‍സ്ലോ ഇടപെട്ടു.

“ഇദ്ദേഹം നിശ്ചയമായിട്ടും അമ്മയ്ക്കു നല്ലൊരു കൂട്ട് ആയിരിക്കും“

അവര്‍ പറഞ്ഞു നിര്‍ത്തി. വല്ലാത്ത ഒരു പരിഭ്രമം അവളുടെ മുഖത്തു പടര്‍ന്നു. റേയ്ച്ചലിനു മാത്രമല്ല, ഫസ്റ്റ് ചര്‍ച്ചിന്റെ തന്നെ ചരിത്രത്തില്‍ ഇത്തരം ഒരു സംഭവം അരങ്ങേറിയിട്ടില്ല.

പക്ഷേ, മാക്സ്‌വെല്‍ വഴങ്ങാന്‍ കൂട്ടാക്കിയില്ല. ജീവനറ്റതുപോലെ കിടന്ന ആ ചെറുപ്പക്കാരനെ തന്റെ വീട്ടില്‍ കൊണ്ടുപോയി കിടത്തുമ്പോള്‍ ‍, മാക്സ്‌വെല്ലിന്റെ ജീവിതത്തിലെ മനുഷ്യത്വത്തിന്റെ പുതിയ ഒരു വാതായനം തുറക്കുകയായിരുന്നു.

കൃസ്ത്യാനി എന്ന നിലയില്‍ അദ്ദേഹത്തിന്റെ ജീവിതത്തിലെ ഏറ്റവും നിര്‍ണ്ണായകരമായ വഴിത്തിരുവില്‍ എത്തി നില്‍ക്കുകയാണെന്നു മാക്സ്‌വെല്‍ തിരിച്ചറിഞ്ഞു.

മൂന്നാമത്തെ ദിവസം ആ ചെറുപ്പക്കാരന്റെ നിലയ്ക്കു ചെറിയ വ്യത്യാസം വന്നു, എങ്കിലും പ്രതീക്ഷയ്ക്കുള്ള വക ഇല്ല എന്നു ഡോക്ടര്‍ അറിയിച്ചു.

ശനിയാഴ്ച അര്‍ദ്ധരാത്രി.

ഏകമകള്‍ ഇതുവരെ എത്തിയില്ലേ എന്നയാള്‍ നേര്‍ത്ത ശബ്ദത്തില്‍ അന്വേഷിച്ചു.

" മകള്‍ യാത്രയില്‍ ആണ്, ഉടനെ എത്തും"

എല്ലാ ദിവസവും രാത്രിയില്‍ ഉറക്കമൊഴിഞ്ഞു അയാളെ ശുശ്രൂഷിച്ചുകൊണ്ടിരുന്നതിനാല്‍ മാര്‍ക്സ്‌വെല്ലിന്റെ ശബ്ദവും തളര്‍ന്നതായിരുന്നു.

അയാള്‍ മെല്ലെ കണ്ണുതുറന്നു.

" ഈ ലോകത്തില്‍ വച്ച് ഇനിയെന്റെ മകളെ കാണാന്‍ കഴിയുകയില്ല." അയാള്‍ പിറുപിറുത്തു.

"നിങ്ങള്‍ എല്ലാവരും എന്നോടു കരുണ കാണിച്ചു, ഇപ്പോല്‍ എനിക്കു തോന്നുന്നു, യേശു ആയിരുന്നു നിങ്ങളുടെ സ്ഥാനത്ത് എങ്കില്‍ ഇതു തന്നെ ചെയ്യുമായിരുന്നു"

അയാള്‍ പറഞ്ഞു നിര്‍ത്തി. അല്പ നിമിഷം കഴിഞ്ഞു, അയാളുടെ ശിരസ്സ് ഒരു വശത്തേയ്ക്കു ചരിഞ്ഞു,

"അയാള്‍ പോയിക്കഴിഞ്ഞു" ഡോക്ടര്‍ ശാന്തമായി പറഞ്ഞു.

ആ പാവം ചെറുപ്പക്കാരന്റെ മകള്‍ എത്തിയതു പിന്നേയും ഒരു മണിക്കൂര്‍ കഴിഞ്ഞാണ്.

അടുത്ത ഞായറാഴ്ച.

റെയ്മണ്ട് പട്ടണത്തിനു ഒരു വ്യത്യാസവും ഉണ്ടായിരുന്നില്ല. എങ്കിലും ഫര്‍സ്റ്റ് ചര്‍ച്ചില്‍ പതിവിലേറെ വിശ്വാസികള്‍ തടിച്ചുകൂടിയിരുന്നു.

"നമ്മുടെ സഹോദരന്‍ ഇന്നു രാവിലെ മരിച്ചു"

വിറയ്ക്കുന്ന ചുണ്ടുകളോടെ മാര്‍ക്സ്വെല്‍ പ്രസംഗപീഠത്തില്‍ കൈയൂന്നിക്കൊണ്ട് വിശ്വാസികളെ അറിയിച്ചു. മാക്സ്‌വെല്‍ തന്റെ പ്രസം‌ഗത്തിന്റെ അവസാന ഭാഗത്ത് എത്തിയിരുന്നു. വര്‍ഷങ്ങള്‍ നീണ്ട സഭാ പരിപാലന ചരിത്രത്തില്‍ അന്നു ആദ്യമായി പ്രസം‌ഗ കുറിപ്പ് ഇല്ലാതെ ആയിരുന്നു മാക്സ്വെല്‍ പ്രസം‌ഗ പീഠത്തില്‍ എത്തിയത്.

അദ്ദേഹത്തിന്റെ മുഖം ദീര്‍ഘകാലം രോഗം ബാധിച്ചു കിടന്ന രോഗിയേപ്പോലെ തോന്നിച്ചു. വല്ലാത്ത ഒരു മാനസിക വ്യഥ അദ്ദേഹം അനുഭവിക്കുന്നുണ്ടായിരുന്നു. എന്തോ ഗഹനമായത് വിശ്വാസികളുമായി പങ്കു വെയ്ക്കുവാന്‍ അദ്ദേഹം ശ്രമിക്കുകയായിരുന്നു.

ഹാളിനുള്ളിലെ പൂര്‍ണ്ണമായ നിശബ്ദതയില്‍ അദ്ദേഹം തുടര്‍ന്നു,

"അയാളുടെ മകള്‍ ഇപ്പോള്‍ ഞങ്ങളുടെ കൂടെയാണുള്ളത്."

ഓരോ വാക്കും സൂക്ഷിച്ചു പെറുക്കി പെറുക്കി പറയുന്നത്പോലെ തോന്നിച്ചു.

"കഴിഞ്ഞ ആഴ്ച ആ ചെറുപ്പക്കാരന്‍ ഇവിടെ വച്ച് പറഞ്ഞത്, എനിക്കു മറക്കാന്‍ കഴിയുന്നില്ല. അന്നുമുതല്‍, ഞാന്‍ എന്നോടു തന്നെ ഒരിക്കലും ചോദിച്ചിട്ടില്ലാത്ത ഒരു ചോദ്യം എന്നെ വേട്ടയാടുന്നു, 'യേശുവിനെ അനുഗമിക്കുക എന്നു പറഞ്ഞാല്‍ എന്താണു അര്‍ത്ഥമാക്കുന്നത്?'. നിങ്ങളെയോ എന്നെയോ, ഈ ലോകത്തിലുള്ള മറ്റാരെയെങ്കിലുമോ വിധിക്കുവാന്‍ ഞാന്‍ ആളല്ല. പക്ഷേ, ഈ ചോദ്യത്തിനു ഒരു ഉത്തരം നമ്മള്‍ ഓരോരുത്തരും സ്വയം കണ്ടെത്തേണ്ടതാണെന്നു ഞാന്‍ വിശ്വസിക്കുന്നു. "

" ഈ ചോദ്യത്തിനു തൃപ്തികരമായ ഉത്തരം നല്‍കുവാന്‍ ഒരു പദ്ധതി മുന്നോട്ടു വയ്ക്കുവാന്‍ ഞാന്‍ ആഗ്രഹിക്കുന്നു. "

വിശ്വാസികള്‍ മുഖത്തോടു മുഖം നോക്കി. റെയ്മണ്ട് പട്ടണത്തിലെ ഏറ്റവും പുരാതനമായ സഭ അയിരുന്നു അത്. ആ സഭയിലെ അംഗമായിരിക്കുന്നത് പലരും അഭിമാനമായിക്കണ്ടിരുന്നു. സമൂഹത്തിലെ സ്വാധീന ശക്തിയുള്ള പല പ്രമുഖരും അവിടുത്തെ അംഗങ്ങള്‍ ആയിരുന്നു.

അവരില്‍ എത്ര പേര്‍ ഈ നിര്‍ദ്ദേശത്തെ സ്വീകരിക്കുമെന്നു അറിയാനുള്ള ആകംഷയോടെ മാക്സ്‌വെല്‍ സാവധാനം തുടര്‍ന്നു.

"അസാധ്യമായ ഒരു കര്‍മ്മ പരിപാടിയല്ല എന്റെ മുന്നിലുള്ളത് എന്നു ഞാന്‍ ആശിക്കുന്നു. പക്ഷേ എല്ലാവര്‍ക്കും സ്വീകാര്യമായി തോന്നിക്കൊള്ളണമെന്നും ഇല്ല. "

അദ്ദേഹം പ്രസം‌ഗത്തിന്റെ ഏറ്റവും, കാതലായ ഭാഗത്തേയ്ക്കു കടന്നു.

"എന്തു പ്രവര്‍ത്തി ചെയ്യുന്നതിനു മുന്‍പും "യേശുവായിരുന്നു എങ്കില്‍ എന്തു ചെയ്യുമായിരുന്നു?" എന്നു സ്വയം ചോദിച്ചിട്ടു അതിനു ലഭിക്കുന്ന ഉത്തരം മാത്രം പ്രവര്‍ത്തിക്കുന്ന ഒരു കൂട്ടം വിശ്വാസികളെ തിരഞ്ഞെടുക്കുവാന്‍ ഞാന്‍ ആഗ്രഹിക്കുന്നു. അങ്ങിനെ ചെയ്യുന്ന പ്രവര്‍ത്തിയുടെ ഫലം എന്തു തന്നെയായിരുന്നാലും നേരിടാന്‍ കെല്പ്പും ദൃഢനിശ്ചയവുമുള്ളരെയാണ് ഞാന്‍ ഉദ്ദേശിക്കുന്നത്. തീര്‍ച്ചയായും ഞാന്‍ ആ കൂട്ടത്തിലെ ഒരം‌ഗം ആയിരിക്കും. യേശു ഇന്നു, ഇവിടെ, ജീവിച്ചിരുന്നെങ്കില്‍ നമ്മുടേ ഓരുത്തരുടെ സ്ഥാനത്ത് എന്തു ചെയ്യുമായിരുന്നോ അതാണ് ഈ കൂട്ടത്തില്‍ അംഗമായിരിക്കുന്നവര്‍ ചെയ്യേണ്ടത്. ആ നിലവാരത്തില്‍ പ്രവര്‍ത്തിക്കുമ്പോള്‍ വരുന്ന എല്ലാ പ്രതികൂലങ്ങള്‍ക്കും പ്രത്യാഘാതങ്ങള്‍ക്കും സഭ പൂര്‍ണ്ണ പിന്തുണ നല്‍കുമെന്നും ഞാന്‍ ഉറപ്പു തരുന്നു"

" അങ്ങിനയുള്ള സംഘത്തിന്റെ ഭാഗമാകുവാന്‍ ആഗ്രഹിക്കുന്നവര്‍ മാത്രം, ഈ യോഗത്തിനു ശേഷം ഇവിടെ നിക്കണമെന്ന് അപേക്ഷിക്കുന്നു"

മാക്സ്‌വെല്‍ പറഞ്ഞു നിര്‍ത്തി.

"ഇന്നത്തെ യോഗം അവസാനിച്ചിരിക്കുന്നു."

( തുടരും.)
===========================================
മൂന്നു കോടി പ്രതികള്‍ വിറ്റഴിഞ്ഞ ചാര്‍ത്സ് ഷെലഡമിന്റെ ഇന്‍ ഹിസ് സ്റ്റെപ്സ് എന്ന വിഖ്യാത നോവലിന്റെ രണ്ടാമത്തെ അദ്ധ്യായത്തിന്റെ സ്വതന്ത്ര പരിഭാഷയാണ് ഇത്. പദാനുപദ വിവര്‍ത്തനരീതിയല്ല ഇവിടെ അവലംബിച്ചിരിക്കുന്നത്

വായിച്ചിരിക്കേണ്ട പുസ്തകം. ഭാഗം -1

2010-09-14T13:57:00.006+03:00

“ഞാന്‍ ഇവിടെ വന്നിരുന്നപ്പോള്‍ മുതല്‍ ചിന്തിക്കുകയായിരുന്നു " ഹാളിന്റെ പിന്നില്‍ നിന്നും ഉയര്‍ന്ന ശബ്ദം കേട്ടു എല്ലാവരും അമ്പരന്നു.

റവ. മാക്സ്‌വെല്‍ പ്രസംഗം പൂര്‍ത്തിയാക്കിട്ട് ഇരുപ്പിടത്തിനരികില്‍ എത്തിയതേയുള്ളൂ. ഇന്നത്തെ പ്രസംഗം ഇത്ര കണ്ടു വിജയിക്കുമെന്നു കരുതിയിരുന്നതല്ല. ആരുടെ മനസിനേയും ഇളക്കാന്‍ പോന്ന ചിന്തകളായിരുന്നു പ്രസംഗത്തിലുടനീളം. മാക്സ്‌വെല്ലിന്റെ നാടകീയ അവതരണം ഫസ്റ്റ് ചര്‍ച്ചിലെ വിശ്വാസികള്‍ക്കു എന്നും ഇഷ്ടമായിരുന്നു. അദ്ദേഹം വെറുതെ ഒന്നും പറയാറില്ല. ജീവിതത്തെ മാറ്റിമറിക്കാന്‍ തക്ക ആഴമുള്ളതും പ്രയോചനപ്രദമായതും മാത്രമേ ഞായറാഴ്ച ശുശ്രൂഷയില്‍ മാക്സ്‌വെല്‍ പറയുകയുള്ളൂ. അതറിയാവുന്ന പ്രേക്ഷകരും അദ്ദേഹം പ്രസംഗ പീഠത്തില്‍ എത്തിയാല്‍ ശ്വാസം വിടാതെ പൂര്‍ണ്ണ നിശബ്ദതയില്‍ ശ്രവിച്ചുകൊണ്ടിരിക്കും.

ചന്നം പിന്നം പെയ്തു തുടങ്ങുന്ന മഴ, ക്രമേണ വളര്‍ന്ന് ആര്‍ത്തലച്ചു പെയ്തു, മണ്ണിനേയും അന്തരീക്ഷത്തേയും കുളിരണിയിപ്പിച്ചു, അവസാനം ശാന്തമായി പെയ്തൊടുങ്ങുന്നതുപോലെയായിരുന്നു മാര്‍ക്സ്‌വെല്ലിന്റെ പ്രസംഗങ്ങള്‍. ഒരു തരത്തിലും ഒരു മോശം പ്രസംഗകനെന്നു അദ്ദേഹത്തെ ആരും പറയുമായിരുന്നില്ല.

റേയ്ച്ചല്‍ വിന്‍സ്ലോയുടെ നേര്‍ത്ത ശബ്ദത്തിലുള്ള അതിമനോഹരമായ ഗാനത്തിനു ശേഷമാണ് പ്രസംഗം ആരംഭിച്ചത്. ഓക് മരത്തില്‍ കടഞ്ഞെടുത്ത കുരുശു രൂപത്തിന്റെ പിന്നില്‍ നിന്നും പാടുന്ന അവള്‍ എന്നെത്തേക്കാളും സുന്ദരിയായിത്തോന്നി. രൂപത്തേക്കാള്‍ സൗന്ദര്യം അവളുടെ ശബ്ദത്തിനുണ്ടായിരുന്നു.

"എന്റെ ക്രൂശുമായി .. ഞാനിതാ യേശുവെ..

എന്നാളും നിന്നെ അനുഗമിക്കും......"

യാചകരോടും കുഷ്ഠരോഗികളോടും കൂടെ സഹവസിച്ച നല്ല ഇടയന്റെ രക്തം വീണ കാലടികളെ തുടരുമെന്ന റേയ്ച്ചലിന്റെ നേര്‍ത്ത ശബ്ദത്തിലുള്ള ഗാനം, എല്ലാവരുടെ മനസിനേയും സ്വാധീനിച്ചു. ഏറ്റവും വിലകൂടിയ സംഗീത ഉപകരണങ്ങള്‍ അവര്‍ക്ക് ഉണ്ടായിരുന്നു.

പാട്ടും പ്രസംഗവും സൃഷ്ടിച്ച ആത്മീയ അന്തരീക്ഷത്തിന് ഭംഗം വരുത്തിക്കൊണ്ടാണ് ആ ശബ്ദം പിന്നില്‍ നിന്നും കേട്ടത്.

അതു ഒരു പുരുഷന്റെ ശബ്ദമായിരുന്നു.

എല്ലാവരും ആശ്ചര്യപ്പെട്ടു തിരിഞ്ഞു നോക്കി. സഭാ ഹാളിന്റെ പിന്നില്‍ നിന്നും ഒരു മനുഷ്യന്‍ എഴുന്നേറ്റു നടന്നു വരുന്നു. എന്തു സംഭവിക്കുന്നു എന്നു ആളുകള്‍ തിരിച്ചറിയുന്നതിനകം അദ്ദേഹം പ്രസംഗ പീഠത്തിന്റെ മുന്നില്‍ എത്തിക്കഴിഞ്ഞു.

"ഞാന്‍ ഇനിടെ വന്നിരുന്നപ്പോള്‍ മുതല്‍ ഇതു തന്നെ ചിന്തിക്കുകയായിരുന്നു" അദ്ദേഹം ആ വാക്കുകള്‍ ആവര്‍ത്തിച്ചു.

"ഈ യോഗം അവസാനിക്കുന്നതിനു മുന്‍പ് ഇതു എങ്ങിനെ നിങ്ങളൊട് ഒന്നു പറയണമെന്ന്."

"നിങ്ങള്‍ ആരും ഭയപ്പെടേണ്ടതില്ല, ഞാനൊരു മദ്യപാനിയല്ല, ഭ്രാന്തനും അല്ല. പൂര്‍ണ്ണമായും നിരുപ്രവകാരിയായ മനുഷ്യനാണ് . ഞാനിവിടെ വീണു മരിച്ചാല്‍, ഒരു പക്ഷേ വരും ദിവസങ്ങള്‍ക്കുള്ളില്‍ അങ്ങിനെ തന്നെ സംഭവിക്കാന്‍ സാധ്യതയുണ്ട്, ഇതു പോലൊരു സ്ഥലത്ത്, നിങ്ങളേപ്പോലുള്ളവരുടെ മുന്‍പില്‍ എനിക്കു പറയുവാനുള്ളത് പറഞ്ഞു എന്നു സംതൃപ്തിയെങ്കിലുമുണ്ടാവും"

മാക്സ്‌വെല്‍ ഒരു ഞെട്ടലോടെ അയാളെ തിരിച്ചറിഞ്ഞു. അതേ, കഴിഞ്ഞ വെള്ളിയാഴ്ച വീട്ടില്‍ വന്ന അതേ ചെറുപ്പക്കാരന്‍!

ഞായറാഴ്ചക്കുള്ള പ്രസംഗം പൂര്‍ത്തിയാകാത്തതില്‍ അന്നു മാക്സ്‌വെല്‍ അസ്വസ്ഥനായിരുന്നു. എന്തെങ്കിലും കുത്തിക്കുറിക്കാന്‍ തുടങ്ങുമ്പോഴേയ്ക്കും ആരെങ്കിലും വരും. തികഞ്ഞ ഏകാഗ്രതയില്ലാതെ അദ്ദേഹത്തിനു പ്രസംഗക്കുറിപ്പു തയ്യാറാക്കാന്‍ കഴിയില്ലായിരുന്നു.

"മേരീ" അദ്ദേഹം ഭാര്യയെ വിളിച്ചു.

"ഇനി ആരെങ്കിലും വന്നാല്‍ ഞാന്‍ തിരക്കാണെന്നു പറഞ്ഞേക്കുക. അത്ര അത്യാവശ്യമില്ലെങ്കില്‍ കുറച്ചു സമയത്തിനു താഴെ ഇറങ്ങി വരാന്‍ എനിക്കു പറ്റില്ല "

“പക്ഷേ, എനിക്കു നേഴ്സറിയില്‍ പോകേണ്ടതുണ്ടെല്ലോ , അതു കൊണ്ട് ഞാനിവിടെ ഉണ്ടാകില്ല." മേരി.

മാക്സ്‌വെല്‍ മുകളിലത്തെ നിലയിലെ പഠന മുറിയില്‍ കയറി വാതിലടച്ചു. അല്പ സമയത്തിനുള്ളില്‍ ഭാര്യ പുറത്തു പോകുന്നതിന്റെ ശബ്ദവും കേട്ടു. പൂര്‍ണ്ണ നിശബ്ദതയില്‍, ഹൃദയത്തെ വേദ പുസ്തകത്തില്‍ കേന്ദ്രീകരിച്ചു,

പത്രോസ് 2:20

"നിങ്ങൾ കുറ്റം ചെയ്തിട്ടു അടികൊള്ളുന്നതു സഹിച്ചാൽ എന്തു യശസ്സുള്ളു? അല്ല, നന്മ ചെയ്തിട്ടു കഷ്ടം സഹിച്ചാൽ അതു ദൈവത്തിന്നു പ്രസാദം.അതിന്നായിട്ടല്ലോ നിങ്ങളെ വിളിച്ചിരിക്കുന്നതു. ക്രിസ്തുവും നിങ്ങൾക്കു വേണ്ടി കഷ്ടം അനുഭവിച്ചു, നിങ്ങൾ അവന്റെ കാൽച്ചുവടു പിൻ തുടരുവാൻ ഒരു മാതൃക വെച്ചേച്ചു പോയിരിക്കുന്നു."

മനുഷ്യനു പിന്തുടരുവാന്‍ നന്മയുടെ വഴി ശേഷിപ്പിച്ച നല്ല ഇടയന്റെ ത്യാഗ നിര്‍ഭരമായ ജീവിതവും മരണവും - ഒരു നല്ല പ്രസംഗത്തിനുള്ള വിഷയം മനസ്സില്‍ രൂപമെടുത്തു. കടാസും പേനയുമെടുത്തു കുറിച്ചു തുടങ്ങി. "എങ്ങിനെ ക്രിസ്തുവിനെ പിന്തുടരാം ?"

പെട്ടെന്നു കാളിം‌ഗ് ബെല്‍ ശബ്ദിച്ചു. അദ്ദേഹം അനങ്ങിയില്ല. നിമിഷങ്ങള്‍ക്കകം, ശബ്ദം വീണ്ടും ആവര്‍ത്തിച്ചു.

അദ്ദേഹം സാവധാനം എഴുന്നേറ്റ് മുകളിലുള്ള ജനല്‍ തുറന്നു നോക്കി. അവിടെ നിന്നും താഴേയ്ക്കു നോക്കിയാല്‍ മുന്‍ വാതിലില്‍ നില്‍ക്കുന്നവരെ നന്നായി കണാമായിരുന്നു. മുഷിഞ്ഞ വസ്ത്രം ധരിച്ച ഒരു ചെറുപ്പക്കാരന്‍.

"ഭിക്ഷക്കാരനാണെന്നു തോന്നുന്നല്ലോ?"

താഴെയിറങ്ങി വാതി തുറന്ന ഉടനെ ആചെറുപ്പക്കാരന്‍ പറഞ്ഞു,

"സര്‍, എന്റെ ജോലി നഷ്ടപ്പെട്ടിരിക്കുന്നു, താങ്കള്‍ക്ക് എന്നെ സഹായിക്കാന്‍ കഴിമെന്നു വിചാരിച്ച് വന്നതാണ്"

"എനിക്കു ഒന്നും അറിയില്ല, അല്ലെങ്കിലും ഇപ്പോള്‍ പൊതുവേ ജോലികള്‍ ഒന്നും ഇല്ലല്ലോ..."

വാതില്‍ അടയ്ക്കാന്‍ തുടങ്ങുമ്പോള്‍ അയാള്‍ തുടര്‍ന്നു.

"ആയിരിക്കാം, പക്ഷേ, ഏതെങ്കിലും കടയുടെ ഉടമയേയോ മറ്റാരെങ്കിലും പരിചയമുണ്ടെങ്കില്‍..മറ്റെന്തെങ്കിലും ഒരു വഴി കാണിച്ചു തന്നിരുന്നെങ്കില്‍ .."

അയാള്‍ തന്റെ നരച്ച തൊപ്പി കൈയ്യിലെടുത്തു, ദയനീയ ഭാവത്തില്‍ നിന്നു.

" ക്ഷമിക്കണം, എനിക്കു ഒന്നും ചെയ്യാനാവുമെന്നു തോന്നുന്നില്ല. എനിക്കു ഒരു കുതിരയും ഒരു പശുവും മാത്രമേയുള്ളൂ. എനിക്കു ചെയ്യാവുന്നതില്‍ കവിഞ്ഞ ഒരു ജോലിയും ഇവിടെയില്ല. മാത്രമല്ല ഞാന്‍ നല്ല തിരക്കിലാണ്. താങ്കള്‍ മറ്റെവിടെയെങ്കിലും അന്വേഷിക്കൂ, എന്തെങ്കിലും കിട്ടാതിരിക്കില്ല"

വാതിലടച്ചു മാര്‍ക്സ്‌വെല്‍ മുകളിലേയ്ക്കു കയറിപ്പോയി. മുകളിലത്തെ ജനാല വഴി അയാള്‍ ആ ചെറുപ്പക്കാരനെ നോക്കി.

വളരെ സാവധാനം അയാള്‍ തെരുവിലേയ്ക്കിറങ്ങി നടന്നു തുടങ്ങി.ആ തൊപ്പി കയ്യില്‍ തന്നെ പിടിച്ചിരുന്നു. അയാള്‍ ദരിദ്രനായ, വീടില്ലാത്ത, ഒരു അവഗണിക്കപ്പെട്ടവനേപ്പോലെ തോന്നി.

അതു കണ്ടു നില്‍ക്കാന്‍ മടി തോന്നിയ മാക്സ്‌വല്‍ പ്രസംഗക്കുറിപ്പിന്റെ അവസാന മിനുക്കു പണികള്‍ കൂടി ചെയ്തു ഒരു നല്ല പ്രസംഗം തയ്യാറാക്കുന്നതില്‍ വ്യാപൃതനായി.

മേരി തിരിച്ചു വന്നപ്പോള്‍ നേഴ്സറിയുടെ വാതില്‍ക്കല്‍ തളര്‍ന്ന് ഇരുന്ന ഒരു ഭിക്ഷക്കാരനേപ്പറ്റി പറഞ്ഞു.

“അയാള്‍ ഇവിടെയും വന്നിരുന്നു“ - മാക്സ്‌വെല്‍ പറഞ്ഞു.

“ഞാന്‍ ഒരു വെറും ഭിക്ഷക്കാരന്‍ അല്ല.“ പ്രസംഗ പീഠത്തിനരികേ എത്തിയ അദ്ദേഹം ശാന്തനായി പറഞ്ഞു.

“എനിക്കു യേശുവിന്റെ പഠിപ്പിക്കലുകളും അറിയില്ല” നിര്‍ത്തിയിട്ട് അദ്ദേഹം ഒന്നു രണ്ടു വട്ടം ചുമച്ചു. അസഹ്യമായ വേദന ആ മുഖത്ത പ്രതിഫലിക്കുന്നുണ്ടായിരുന്നു.

“ പത്തു മാസങ്ങള്‍ക്കു മുന്‍പ് എന്റെ ജോലി നഷ്ടപ്പെട്ടു. ഞാന്‍ ഒരു പ്രിന്റിം‌ഗ് പ്രസ്സ് തൊഴിലാളിയാണ്. ലിനോ ടൈപ്പ് യന്ത്രങ്ങളുടെ വരവോടെ ഞങ്ങള്‍ക്കു ജോലിയില്ലാതെയായി. പത്രക്കമ്പനികള്‍ ആ യന്ത്രം വാങ്ങുന്നതില്‍ കുറ്റം പറയാന്‍ ആവില്ല, കാരണം അത്രയ്ക്കും നന്നായി അച്ചടിക്കാന്‍ ഞങ്ങള്‍ക്ക് ആവില്ല. പക്ഷേ, എന്നേപ്പോലൊരു മനുഷ്യനു എന്തു ചെയ്യുവാന്‍ ആകും? എനിക്കു ഒരു തൊഴിലേ അറിയൂ.. അത്രയുമേ ആകുമായിരുന്നുള്ളൂ. ഞാന്‍ ഒരു ജോലിക്കുവേണ്ടി ഈ പട്ടണം മുഴുവന്‍ ഇരക്കുകയാണ്. എന്നേപ്പോലെ പലരും ഉണ്ട് ഈ പട്ടണത്തില്‍. ഞാന്‍ പരാതി പറയുകയല്ല, നിങ്ങള്‍ക്ക് അങ്ങിനെ തോന്നുന്നുവോ? ചില സത്യങ്ങള്‍ പറയുന്നുവെന്നു മാത്രം!“

“നിങ്ങള്‍ യേശുവിനെ പിന്തുടരുന്നു എന്നു അല്പം മുന്‍പ് പാടിയല്ലോ? യേശു പഠിപ്പിച്ചതു പോലെ നിങ്ങള്‍ അവനെ പിന്തുടരുന്നു എന്നാണോ ആ പാടിയതിന്റെ അര്‍ത്ഥം? ഇവിടെ വന്നതുമുതല്‍ ഞാന്‍ അതു തന്നെ ചിന്തിക്കുകയായിരുന്നു”

“എന്നെ അനുഗമിക്കുക എന്നു പറഞ്ഞാല്‍ എന്താണര്‍ത്ഥം ? നിങ്ങളുടെ ശുശ്രൂഷകന്‍ പറഞ്ഞു,”

അയാള്‍ പ്രസംഗ പീഠത്തിലേക്കു ഒരു നിമിഷം നോക്കിയിട്ടു തുടര്‍ന്നു,

”അനുസരണം, വിശ്വാസം, സ്നേഹം പിന്നെ അനുകരണം- ഇവയാണ് അനുഗമിക്കുന്നതിന്റെ വിവിധ പടികള്‍ എന്ന്. പക്ഷേ, ഇതുകൊണ്ടൊക്കെ എന്താണ് അര്‍ത്ഥമാക്കുന്നതെന്നു അദ്ദേഹം പറഞ്ഞുകേട്ടില്ല, അവസാന പടിയേപ്പറ്റി പ്രത്യേകിച്ചും”

“ കഴിഞ്ഞ മൂന്നു ദിവസങ്ങളായി ഒരു ജോലിക്കുവേണ്ടി ഈ പട്ടണത്തിന്റെ തെരുവുകളില്‍ ഞാന്‍ അലയുന്നു. കഴിഞ്ഞ ദിവസം നിങ്ങളുടെ ശുശ്രൂഷകനില്‍ നിന്നല്ലാതെ അല്പം ആശ്വാസത്തിന്റെയോ, സഹാനുഭൂതിയുടെയോ ഒരു വാക്കു പോലും ഞാന്‍ കേട്ടില്ല.ഞാന്‍ ആരേയും പഴിക്കുകയല്ല, ആണെന്നു തോന്നിയോ? ചില സത്യങ്ങള്‍ പറയുകയാണ് ‍.! നിങ്ങള്‍ക്ക് ഈ പട്ടണം മുഴുവന്‍ അന്വേഷിച്ചു നടന്ന് ഞങ്ങളേപ്പോലുള്ളവര്‍ക്കു ജോലി തരാന്‍‌കഴിയില്ലെന്ന് എനിക്കു അറിയാം. പക്ഷേ, "എന്റെ ക്രൂശുമായി .. ഞാനിതാ യേശുവെ..

എന്നാളും നിന്നെ അനുഗമിക്കും......" എന്നു പറഞ്ഞാല്‍ എന്താണ് അതിന്റെ അര്‍ത്ഥം? യേശുവിനേപ്പോലെ സ്വന്ത ഇഷ്ടങ്ങളും സുഖങ്ങളും മാറ്റിവച്ചു, ഒറ്റപ്പെട്ടു പോയവര്‍ക്കു വേണ്ടി നിങ്ങള്‍ ജീവിക്കുന്നു എന്നാണോ?

എന്നേപ്പോലെ ഏകദേശം അഞ്ഞൂറു പേര്‍ ഈ പട്ടണത്തില്‍ ഉണ്ട്. എല്ലാവര്‍ക്കും കുടുംബവും ഉണ്ട്. എന്റെ ഭാര്യ നാലു മാസം മുന്‍പ് മരിച്ചു. അവള്‍ രക്ഷപ്പെട്ടതില്‍ ഇപ്പോള്‍ എനിക്കു സന്തോഷം തോന്നുന്നു. ഒരു ജോലി ശരിയാകുന്നതുവരെ നോക്കുന്നതിനു എന്റെ മകളെ മറ്റൊരു വീട്ടില്‍ ഏല്‍പ്പിച്ചിരിക്കുകയാണ്.

എന്റെ ക്രൂശുമെടുത്ത് നിന്നെ അനുഗമിക്കുന്നു പാടുന്ന പല ക്രിസ്ത്യാനികളും അതി സമ്പന്നതയില്‍ ഈ പട്ടണത്തില്‍ കഴിയുന്നതു കാണുമ്പോള്‍ എനിക്കു ഒന്നും മനസിലാകുന്നില്ല.

ന്യൂയോര്‍ക്കു പട്ടണത്തിലെ ഒരു കൂരയിയില്‍ വച്ചു എന്റെ ഭാര്യ മരിച്ചരംഗം എന്റെ കണ്മുന്‍പിലുണ്ട്. ദരിദ്രമായ ഈ ലോകത്തില്‍ നിന്നും അവളുടെ മകളേക്കൂടി കൊണ്ടുപോകുവാന്‍ അവള്‍ ആഗ്രഹിച്ചു. വിശന്നും പോഷകാഹാരവുമില്ലാതെ ചേരിയില്‍ മരിക്കുന്ന എല്ലാവരേയും രക്ഷപ്പെടുത്തുവാന്‍ നിങ്ങള്‍ക്കു കഴിയില്ലെന്നു എനിക്കു അറിയാം. പക്ഷേ, അവനെ പിന്തുടരുന്നു എന്നു പറയുന്നത് എനിക്കു ഇനിയും മനസിലാകുന്നില്ല. ക്രിസ്ത്യാനികള്‍ക്കു പലര്‍ക്കും ഭേദപ്പെട്ട പല വീടുകള്‍ പലയിടത്തായിട്ടും ഉണ്ട് എന്ന് എനിക്കു അറിയാം. എന്റെ ഭാര്യ മരിക്കുമ്പോള്‍ ഞങ്ങള്‍ പാര്‍ത്തിരുന്നതും ഒരു ക്രിസ്ത്യാനിയുടെ കൂരയില്‍ ആയിരുന്നു. അദ്ദേഹം ക്രിസ്തുവിനെ പിന്തുടരുന്നവന്‍ ആയിരുന്നെങ്കില്‍ ഞാന്‍ ആഗ്രഹിച്ചു പോകുന്നു.

നിങ്ങള്‍ ആ പാട്ടു പാടുമ്പോള്‍ ഞാന്‍ പുറത്തു നടയില്‍ ഇരിക്കുകയായിരുന്നു. ആ പാട്ടു പാടിയിരുന്നവര്‍ പുറത്തു പോയി അതുപോലെ ജീവിച്ചിരുന്നെങ്കില്‍ ഈ ലോകത്തിന്റെ ദയനീയമായ പല പ്രശ്നങ്ങളും ഉണ്ടാകുമായിരുന്നില്ലെന്നു തോന്നിപ്പോകുന്നു. ഒരു പക്ഷേ എനിക്ക് ഇതൊന്നും മനസിലാകാത്തതുകൊണ്ട് ആയിരിക്കും. യേശുവായിരുന്നെങ്കില്‍ എന്തു ചെയ്യുമായിരുന്നു ? അതാണോ അവനെ പിന്തുടരുന്നു എന്നു പാടിയ നിങ്ങള്‍ ചെയ്യുന്നത്..?

വലിയ പള്ളികളില്‍ ഇരിക്കുന്ന പലര്‍ക്കും നല്ല വസ്ത്രങ്ങള്‍ ഉണ്ട്, ആര്‍ഭാടത്തിനു ചിലവഴിക്കാന്‍ ധാരാളം പണമുണ്ട്, മനോഹരങ്ങളായ വീടുകളുണ്ട്, വേനലവധിക്കു പുറത്തുപോകുവാന്‍ സംവിധാനങ്ങളുണ്ട്, അതേസമയം-ഈ പള്ളിക്കു പുറത്ത്, പാവപ്പെട്ടവന്‍ ചേരികളില്‍ മരിക്കുന്നു, തെരുവില്‍ ജോലിയില്ലാതെ അലയുന്നു, പാട്ടുപാടുവാന്‍ സംഗീത ഉപകരണമോ ആരാധനയ്ക്കു ചിത്രങ്ങളൊ ഇല്ലാതെയിരിക്കുന്നു, ദാരിദ്ര്യത്തിലും പാപത്തിലും മദ്യത്തിലും വളര്‍ന്ന് നശിക്കുന്നു

യേശുവായിരുന്നെങ്കില്‍ എന്തു ചെയ്യുമായിരുന്നു ?“

പെട്ടെന്നു അയാള്‍ നിര്‍ത്തി....അയാളുടെ തൊപ്പി കൈയ്യില്‍ നിന്നും നിലത്തു വീണു..കര്‍തൃമേശ ഒരുക്കിയിരുന്നതിന്റെ നേരെ ആ മെല്ലിച്ച കൈകള്‍ നീണ്ട് ചെന്നു ..സാവധാനം തറയിലേക്കു കുഴഞ്ഞു വീണു.

കുറച്ചു ദിവസങ്ങള്‍ക്കു ശേഷം, ആ ദരിദ്രനായ മനുഷ്യന്‍ മരിച്ചു, പക്ഷേ ആ സഭ പിന്നീട് ഒരിക്കലും പഴയതുപോലെ ആയിരുന്നില്ല. ഒരു വലിയ മാറ്റത്തിന്റെ തുടക്കമായിരുന്നു അത്.

(തുടരും....)

============================================

മൂന്നു കോടി പ്രതികള്‍ വിറ്റഴിഞ്ഞ ചാര്‍ത്സ് ഷെലഡമിന്റെ ഇന്‍ ഹിസ് സ്റ്റെപ്സ് എന്ന വിഖ്യാത നോവലിന്റെ ആദ്യ അദ്ധ്യായത്തിന്റെ സ്വതന്ത്ര പരിഭാഷയാണ് ഇത്. പദാനുപദ വിവര്‍ത്തനരീതിയല്ല ഇവിടെ അവലംബിച്ചിരിക്കുന്നത്. ഒന്നു മാത്രം ഉറപ്പാണ്, ഈ പുസ്തകം വായിച്ചിട്ടു നിങ്ങള്‍ക്ക് പഴയ ഒരാളായി ഇരിക്കുവന്‍ കഴിയില്ല. ഈ ലിങ്കില്‍ നിന്നും ഇഷ്ടമുള്ള ഫോമാറ്റില്‍ ഈ പുസ്തകം ഡൌണ്‍ലോഡ് ചെയ്യാം.

എന്തിനാണ് വിശ്വാസം ?

2010-08-08T12:17:00.001+03:00

ആദ്യമായി പട്ടണത്തില്‍ എത്തിയപ്പോല്‍ എന്നെ അല്‍ഭുതപ്പെടുത്തിയ കാഴ്ച സൈക്കിളുകള്‍ ആയിരുന്നു. പല നിറത്തിലും വലിപ്പത്തിലും ഉള്ള സൈക്കിളുകള്‍.

വീതികുറഞ്ഞ കുണ്ടുംകുഴിയും നിറഞ്ഞ ഞങ്ങളുടെ ഗ്രാമത്തിനു അത് പറ്റിയ വാഹനമായിരുന്നു. ഗ്രാമ വാസികള്‍ സൈക്കിളിനേപറ്റി കേട്ടിട്ടുപോലും ഉണ്ടാവില്ല. ദൂരെയുള്ള വയലിലേയ്ക്കു വളം കൊണ്ടുപോകുവാനും, ഉച്ചയ്ക്കു ആഹാരം കൊണ്ടെത്തിക്കുവാനും ഇത്രയ്ക്കും യോജ്യമായ മറ്റൊന്നും ഉണ്ടാവാനിടയില്ല.

ഒരു സൈക്കിള്‍ വാങ്ങി നാട്ടിലേയ്ക്കു കൊടുത്തയക്കുന്നതിനേപറ്റി ഗൌരവമായി ചിന്തിച്ചു തുടങ്ങിയതും അങ്ങിനെയാണ്.അതു ഗ്രാമത്തിലെ ഒരു അല്‍ഭുത കാഴ്ചയാകും എന്നതിനു ഒരു സംശയമും ഇല്ല. പക്ഷേ സൈക്കിളുകൊണ്ട് വീട്ടുകാര്‍ അനുഭവിക്കാന്‍ പോകുന്ന സൌ‍കര്യങ്ങളാണ് കൂടുതല്‍ ആഹ്ലാദിപ്പിച്ചത്.

മാസങ്ങള്‍ കഴിഞ്ഞു. സ്വരുക്കൂട്ടി വച്ച പണം തികഞ്ഞപ്പോള്‍ ഒരു സൈക്കിള്‍ വാങ്ങി.നാട്ടിലേയ്ക്കു കൊടുത്തയക്കാന്‍ തിരക്കായിരുന്നു.

പ്രവര്‍ത്തിപ്പിക്കേണ്ട വിധങ്ങളും പെട്ടെന്നു വരാവുന്ന കേടുപാടുകള്‍ നന്നാക്കുനുള്ള വിവരങ്ങളും എഴുതിയ ഒരു കുറിപ്പട കൂടി കൊടുത്തയച്ചു.

പിന്നീടുവന്ന കത്തുകളിലെല്ലാം നിറയെ സൈക്കിള്‍ വിശേഷങ്ങള്‍ ആയിരുന്നു.

ഗ്രാമ വാസികള്‍ക്കെല്ലാം കൌതുകം സമ്മാനിച്ച സൈക്കിളിലിന്റെ ഉപയോഗങ്ങള്‍ വിശദമായിത്തന്നെ എഴുതിയിരുന്നു.

വളവും ഭക്ഷണവും മാത്രമല്ല ഞാറ്റുകൊട്ടകളും സൈക്കിളില്‍ പിന്നില്‍ വച്ചു കൊണ്ടുപോകാമത്രേ!

മാസങ്ങള്‍ കഴിഞ്ഞു പോയി. പഴയതു പോലെ കത്തില്‍ നിറയെ സൈക്കിള്‍ വിശേഷങ്ങള്‍ ഇല്ലെങ്കിലും ഒരു വാക്കെങ്കിലും എല്ലാ കത്തിലും കാണാതിരിക്കില്ല.

അവധി അനുവദിച്ചു കിട്ടിയപ്പോള്‍ എങ്ങിയും നാട്ടില്‍ എത്തിയാല്‍ മതിയെന്നായി എനിക്ക്.

ഗ്രാമത്തില്‍ എത്തിയ ഞാന്‍ ഞെട്ടിപ്പോയി. വീട്ടുകാര്‍ സൈക്കിള്‍ ഉന്തിക്കൊണ്ട് നടക്കുന്നു!

സെക്കിളിന്റെ ഇരു വശങ്ങളിലും കഴ വച്ചുകെട്ടി അതില്‍ ചാക്കും കൊട്ടയും ഒക്കെ തൂക്കിയിട്ടുണ്ട്. സീറ്റിലും എന്തൊക്കെയോ വച്ചുകെട്ടിയിട്ടുണ്ട്!

നിരാശയോടെ ഞാന്‍ പറഞ്ഞു, “അതേയ്, സൈക്കിള്‍ ഇങ്ങനെ ഉന്തിക്കൊണ്ട് നടക്കാനുള്ളതല്ല. അതിലെ സീറ്റില്‍ കെട്ടിവച്ചിരിക്കുന്ന കൊട്ട അഴിച്ചെടുത്തിട്ടു അവിടെ കയറി ഇരുന്നു ചവിട്ടി ചവിട്ടി പോകാനുള്ളതാണ്. അങ്ങിനെ ഇതിനു വളരെ വേഗതയില്‍ പോകാന്‍ കഴിയും“

ചിരിച്ചു തള്ളിയ ഗ്രാമവാസികള്‍, ഞാന്‍ ഗൌരവത്തിലാണ് എന്നു കണ്ടപ്പോള്‍, സംശയം പ്രകടിപ്പിച്ചു, ”അതെങ്ങെയാണ്, വെറും രണ്ടു ചക്രമുള്ള ഒരു വണ്ടിയില്‍ കയറി ഇരിക്കുന്നത്? അതു മറിഞ്ഞു പോകില്ലേ?”

എനിക്കു ദേഷ്യവും സങ്കടവും വന്നു.

വാദപ്രതിവാദം മുറുകിയപ്പോള്‍ മൂത്തജ്യേഷ്ഠന്‍ ഒരു പരിഹാരവുമായി മുന്നോട്ടു വന്നു.

“എങ്കില്‍ നീയൊന്നു കയറി കാണിക്കൂ.. വേഗതയില്‍ , വീഴാതെ പോകുന്നത് ഞങ്ങള്‍ ഒന്നു കാണട്ടെ!!!”

സൈക്കിന്റെ എന്റെ അരികില്‍ കൊണ്ടുവന്നു, എല്ലാവരും ആകംഷയോടെ നോക്കി നിന്നു.

പക്ഷേ,അപ്പോഴാണു ആസത്യം ഞാനും ഗ്രഹിച്ചത്, എനിക്കു സൈക്കിള്‍ ചവിട്ടാന്‍ അറിയില്ലായിരുന്നു.!

ഒത്തിരിപേര്‍ ഇതു ചവിട്ടിപ്പോകുന്നതു ഞാന്‍ കണ്ടിട്ടുണ്ട്! എത്തേണ്ട സമയത്തു, കുറഞ്ഞ അധ്വാനത്തില്‍ പലരും ലക്ഷ്യസ്ഥാനത്ത് എത്തിയത് എനിക്ക് അറിയാം. പക്ഷേ..

=============================================

വിശുദ്ധ ബൈബിള്‍ ഇന്നു പലരും ഉപയോഗിക്കുന്നതു ഇങ്ങനെയാണ്.

വശങ്ങളില്‍ കമ്പുകള്‍ വച്ചുകെട്ടി..

വലിയ വലിയ കൊട്ടകള്‍ സീറ്റില്‍ കെട്ടിവച്ച്...
ഉന്തിക്കൊണ്ട് നടക്കുന്നു!..

വളരെ ചുരുക്കം പേര്‍ - ഇതില്‍ കയറി അനായാസമായി ചവിട്ടിപ്പോയതു എനിക്കു അറിയാം.

പോള്‍,പീറ്റര്‍,വില്യം ബൂത്ത്,ജോര്‍ജ്ജു മുള്ളര്‍,വില്യം കേറി...വളരെ ചുരുക്കം പേര്‍ മാത്രം.

കന്‍‌വെന്‍ഷന്‍ വേദികളില്‍ ഉന്തിക്കൊണ്ട് നടക്കുന്നവരുണ്ട്....
മറ്റുള്ളവരെ മതം മാറ്റാന്‍ ഇതു ഉന്തിക്കൊണ്ട് നടക്കുന്നവരുണ്ട്......
മരുന്നു കഴിക്കാതെയും, സ്വര്‍ണ്ണമിടാതെയും ഇതു ഉന്തിക്കൊണ്ട് നടക്കുന്നവരുണ്ട്.....

തനിയെ നടക്കുന്നതിലും ഭാരമായി തീര്‍ന്നിരിക്കുന്നു പലര്‍ക്കും.

എനിക്കു ഇതു പറഞ്ഞുകൊടുക്കണമെന്നുണ്ട്, പക്ഷേ സത്യം പറയട്ടെ, ഇതു വേണ്ടുവണ്ണം ചവിട്ടാന്‍ എനിക്കും അറിയില്ല.

പഴയ നിയമവും പുതിയ നിയമവും.

2010-03-12T13:55:00.009+03:00

സമീപ കാലത്തു ബ്ലോഗിലെ ഒട്ടു മിക്ക ചര്‍ച്ചകളും ബൈബിളിനെ ആധാരമാക്കിയാണല്ലോ? രസകരമായ രണ്ടു കാര്യങ്ങള്‍ ശ്രദ്ധിക്കുവാന്‍ ഇടവന്നു. ഒന്ന്, നിരന്തരമായി ചില മുസ്ലീമത വിശ്വാസികള്‍/പ്രചാരകര്‍ ബൈബിളിനുള്ളിലൂടെ സ്വന്തം മതം തെളിയിക്കാന്‍ പെടാപ്പാടു പെട്ടുകൊണ്ടിരിക്കുന്നു. രണ്ട്, ഇവയ്ക്കെല്ലാം എതിര്‍വാദവുമായി ക്രിസ്ത്യാനികളെ ലജ്ജിപ്പിക്കുന്ന വിധം
(ബൈബിള്‍ അടിസ്ഥാനത്തില്‍) കൃത്യമായി വിശദീകരണമുമായി ചില യുക്തിവാദികള്‍ രംഗത്തു വരുന്നു.
ലോകത്തിനു ഏറ്റവും വലിയ ഭീഷിണിയായി മതതീവ്രവാദികള്‍ പ്രവര്‍ത്തിക്കുമ്പോള്‍ അവരെ പിന്തിരിപ്പിക്കുന്നതിനും വികൃതവും ഭീകരവുമായ സ്വന്ത മതത്തിന്റെ പ്രതിഛായ വീണ്ടെടുക്കുന്നതിനും പകരം അതേ മതത്തിലെ പണ്ഡിതന്മാര്‍ മറ്റു മതങ്ങളുടെ പിന്നാമ്പുറങ്ങളിലൂടെ മുറി വാക്യങ്ങളുമായി കറങ്ങിനടക്കുന്നു. അതായിരിക്കാം ഒരു മതത്തിലും താല്പര്യമില്ലാത്തവരെപ്പോലും ചൊടിപ്പിച്ചിരിക്കുന്നത്!

സാത്താന്‍ ആദ്യമായി ഏദന്‍ തോട്ടത്തില്‍ കടന്നു വന്നിട്ടു ഹവ്വയോടു ചോദിക്കുന്ന ഒരു ചോദ്യം ബൈബിളിലുണ്ട്.
‍‘ദൈവം വാസ്തമായി അങ്ങിനെ തന്നെ കല്‍പ്പിച്ചിട്ടുണ്ടോ‘, എന്നായിരുന്നു ആ ചോദ്യം. (ഉല്പത്തി 3:1) സാത്താന്റെ ആദ്യത്തെ രംഗ പ്രവേശം തന്നെ ദൈവ വചനത്തിന്റെ വാസ്തവികതയെ ചോദ്യം ചെയ്തു കൊണ്ടായിരുന്നു. അന്നു പാമ്പിന്റെ രൂപത്തിലായിരുന്നു എന്നു മാത്രം!

പുതിയ നിയമത്തിന്റെ ആദ്യഭാഗത്തും യേശുവിനെ പരീക്ഷിക്കുവാന്‍ സാത്താന്‍ വരുന്നത് ബൈബിള്‍ ക്വോട്ടു ചെയ്തു കൊണ്ടു തന്നെ!(മത്തായി 4:6) ഈ രണ്ടു സാഹചര്യങ്ങളും വച്ചു നോക്കിയാല്‍, ബൈബിള്‍ ഉദ്ധരിച്ചു കൊണ്ടു വരുന്ന ഇക്കൂട്ടരെ ഭരിക്കുന്നതു ഏതു ആത്മാവാണ് എന്നു ചിന്തിക്കേണ്ടിയിരിക്കുന്നു.

പശ്ചാത്തലം ഇതാണെങ്കിലും ഇവിടെ ചിന്തിക്കുവാന്‍ ആഗ്രഹിക്കുന്ന വിഷയം മറ്റൊന്നാണ്. പഴയ നിയമത്തിലെ പല പ്രമാണങ്ങളും ഉദ്ധരിച്ചിട്ടു ദൈവം അങ്ങിനെ പറഞ്ഞിട്ടില്ലേ, എന്ന് ആരോപണം പലപ്പോഴും കേള്‍ക്കാറുണ്ട്. പലപ്പോഴും ക്രിസ്ത്യാനികള്‍ക്കു പോലും കൃത്യമായി ധാരണ ഇല്ലാത്ത വിഷയമാണ് ദൈവ ശാസ്ത്രപരമായ പഴയ നിയമ-പുതിയ നിയമ ബന്ധം.

ചരിത്രപരമായി ഒന്ന് മറ്റൊന്നിന്റെ തുടര്‍ച്ചയാണെങ്കിലും, ഉപദേശപരമായി പുതിയനിയമം പഴനിയമത്തിന്റെ തുടര്‍ച്ചയല്ല എന്നതാണ് സത്യം.

തികച്ചും നൂതനവും, വളരെ ഉന്നതും, മേത്തരവുമാണ് പുതിയ നിയമ ഉപദേശങ്ങള്‍. ബൈബിള്‍ ഭാഷയില്‍ പറഞ്ഞാല്‍ പഴയ നിയമം ഭൌമികവും, പുതിയ നിയമം സ്വര്‍ഗ്ഗീയവുമാണ്. (ഉദാഹരണമായി ദൈവം തരുന്ന അനുഗ്രഹങ്ങള്‍ നോക്കിയാല്‍ ഈ വ്യത്യാസം എളുപ്പം മനസിലാവും. പഴയ നിയമത്തില്‍ സമ്പത്തും, ധാരാളം മക്കള്‍, ആരോഗ്യം ദീര്‍ഘായുസ് തുടങ്ങിയ ദൈവിക അനുഗ്രഹത്തിന്റെ അടയാളമായിരിക്കുമ്പോള്‍ പുതിയ നിയമത്തില്‍, സമാധാനം, പ്രത്യാശ, തുടങ്ങിയവയാണ്. നിര്‍ഭാഗ്യവശാല്‍ പഴയ നിയമത്തിന്റെ അളവുകോലിലൂടെ പുതിയ നിയമത്തെ നോക്കൊക്കാണുന്ന വിശ്വാസികള്‍ ഇക്കാലത്ത് കുറവല്ല. സമ്പത്തും സമൃദ്ധിയും ദൈവിക അനുഗ്രഹത്തിന്റെ അടയാളമായി കരുതുകയും സ്വരൂപിച്ചു കൂട്ടുകയും ചെയ്യുന്ന പ്രേഷിതപ്രവര്‍ത്തര്‍ പോലും ധാരാളമുണ്ട്. അന്നന്നത്തെ അപ്പം തരുന്ന ദൈവം ബൈബിളിനുള്ളില്‍ ഒതുങ്ങിപ്പോയിരിക്കുന്നു. ഒരു ബാങ്ക് അക്കൌണ്ട് പോലും ഇല്ലാതെ, ഒരു മനുഷ്യന്റെ മുന്‍പിലും കൈനീട്ടാതെ ഇരുപതിനായിരത്തിലധികം അനാഥ കുഞ്ഞുങ്ങളെക്ക് എല്ലാ ദിവസവും ഭക്ഷണം കൊടുത്ത ജോര്‍ജ്ജു മുള്ളറുടെ ചരിത്രം പ്രം‌ഗിക്കാന്‍ കൊള്ളാത്ത പഴങ്കഥയായി മാറി)

ക്രിസ്തുവിന്റെ പരസ്യ ശുശ്രൂഷയിലെ അദ്യത്തെ അല്‍ഭുത പ്രവര്‍ത്തി പഴയനിയമത്തേയും പുതിയ നിയമത്തേയും വിശദീകരിക്കുന്ന നല്ല ഒരു ഉദാഹരണമായിക്കാണാം.

കല്യാണ വീട്ടില്‍ തീര്‍ന്നു പോയ വീഞ്ഞ് പഴയ നിയമത്തെ ഏറ്റവും നല്ല ഉദാഹണമാണെന്നു തന്നെ പറയാം. അതു മനുഷ്യന്റെ അധ്വാനത്തിന്റെ ഉല്‍പ്പന്നമായിമായിരുന്നു. അത്യാവശ്യ സമത്തു തികയാതെ വരുന്ന മനുഷ്യപ്രയത്ന ത്തിന്റെ ഉത്തമദൃഷ്ടാന്തം

എന്നാല്‍ ക്രിസ്തു ഉണ്ടാക്കിയ വീഞ്ഞു ദൈവികമായിരുന്നു. അതിന്റെ പിന്നില്‍ മനുഷ്യന്റെ പ്രയത്നം ഇല്ലായിരുന്നു. ഗുണം നോക്കിയാല്‍, വിരുന്നുകാര്‍ പറഞ്ഞ അഭിപ്രായം ഇത്രയും മേത്തരമായത് ആദ്യം വിളമ്പാഞ്ഞത് എന്ത് എന്നാ‍യിരുന്നുവല്ലോ? മാത്രമല്ല, യഹൂദന്മാര്‍ കാല്‍ കഴുകുവാന്‍ വെളിയില്‍ വച്ചിരുന്ന കല്‍പാത്രങ്ങളിലിലാണ് ആ വിഞ്ഞ് നിറച്ചിരിക്കുന്നത്. കലവറയ്ക്കുള്ളിലെ വിശിഷ്ടമായ പാത്രങ്ങള്‍ ശൂന്യമായിത്തീര്‍ന്നപ്പോള്‍, ആവശ്യ സമത്തു വീട്ടുകാരനു ഉപയോഗമില്ലാതെ വന്നപ്പോള്‍, അവഗണിക്കപ്പെട്ടു കിടന്ന് പാത്രങ്ങളെ കര്‍ത്താവു ഉപയോഗിക്കുകയായിരുന്നു.
പുതിയ നിയമ പ്രവര്‍ത്തകരില്‍ ഒരൊറ്റ ലേവ്യാപുരോഹിതനും ശാസ്ത്രിയും ഇല്ലായിരുന്നു എന്നു ബൈബിള്‍ പഠിക്കുന്ന എല്ലാവര്‍ക്കും അറിയാം. ഉപദേശിച്ചു നടത്തേണ്ടവര്‍ നിസ്സഹായരായപ്പോള്‍ മുക്കുവരേയും ചുങ്കക്കാരേയും ആ ജോലി കര്‍ത്താവു ഏല്‍പ്പിച്ചു.

സഹസ്രാബ്ദങ്ങളുടെ ചരിത്രം പഴയ നിയമത്തില്‍ വിവരിക്കുന്നുണ്ട്.ആ നീണ്ട കാലയളവിലെല്ലാം പത്തു കല്‍പ്പനകളും ന്യായപ്രമാണവും പാലിക്കേണ്ട ബാധ്യത മനുഷ്യന്റെ ചുമലില്‍ തന്നെ ആയിരുന്നു. പ്രമാണം തെറ്റിച്ചാല്‍ പരിഹാര ബലികള്‍, വിശുദ്ധീകരണത്തിനായി ഉപവാസങ്ങള്‍, നോമ്പുകള്‍, പെരുന്നാളുകള്‍- ഇവയെല്ലാം കൊണ്ടും മനുഷ്യന്റെ ആത്മീയ രോഗത്തിനു സൌഖ്യം ഇല്ലാത്ത അവസ്ഥയിലാണ് യേശു ജനിക്കുന്നത്. മനോഹരമായ ദേവാലയം ഉണ്ടായിരുന്നു. മഹാപുരോഹിതന്മാരുടെ വലിയ കൂട്ടം, ബൈബിള്‍ പണ്ഡിതന്മാരുടെ സന്‍ഹിദ്രിം സംഘം - ഒന്നിനും കുറവില്ലായിരുന്നു. എങ്കിലും പ്രലോഭനത്തിനു മുന്‍പില്‍ ഏദന്‍ തോട്ടത്തിലെ ഹവ്വയുടെ നിലവാരത്തില്‍ നിന്നും മനുഷ്യകുലം ഒരു പടി പോലും മുന്‍പോട്ടു പോയില്ല.

ഒരു വശത്തു മോഹിപ്പിക്കുന്ന പഴവുമായി സാത്താന്‍, മറുവശത്തു വിട്ടുവീഴ്ചയില്ലാത്ത ദൈവകലപ്പന. രണ്ടിന്റേയും മദ്ധ്യത്തില്‍ നിസ്സഹായനായ മനുഷ്യന്‍ പാപത്തിന്റെ മുന്‍പില്‍ പിന്നേയും പിന്നേയും തോറ്റു പൊയ്ക്കൊണ്ടിരുന്നു. ന്യായപപ്രമാണം പൂര്‍ണ്ണമായും പാലിച്ച ഒരൊറ്റ മനുഷ്യനും ഭൂമുഖത്ത് ഉണ്ടായില്ല.

ഒരു സഹായകന്‍, ഒരു രക്ഷകന്‍ അല്ലാതെ ഇതിനൊരു പരിഹാരമില്ലായിരുന്നു.

അവിടെയാണ് യേശു ജനിക്കുന്നത്. മരണത്തിന്റെയും രോഗത്തിന്റേയും പാപത്തിന്റേയും മുന്‍പില്‍ പകച്ചു നിന്നും പോയ മനുഷ്യനോടു യേശു പറഞ്ഞു “ഞാന്‍ നല്ല ഇടയന്‍ ആകുന്നു!!“. ലോകത്തിനു ലഭിച്ച ഏറ്റവും നല്ല വാര്‍ത്ത (സുവിശേഷം) ഇതായിരുന്നു. കൂടെ ജീവിച്ച മൂന്നര വര്‍ഷം വേണ്ട പഠിപ്പിക്കലുകള്‍, ചില സ്വര്‍ഗ്ഗീയ നീതികള്‍ ഒക്കെ നിവര്‍ത്തിച്ചിട്ട് പിരിഞ്ഞു പോകുന്ന ദിനങ്ങളൊന്നില്‍ യേശു പറഞ്ഞു , “ഞാന്‍ പോയിട്ടു സത്യ്യത്തിന്റെ അത്മാവു എന്ന ഒരു കാര്യസ്ഥനെ നിങ്ങള്‍ക്കു അയച്ചു തരും, അവന്‍ നിങ്ങളെ സകല സത്യത്തിലും വഴി നടത്തും. സത്യത്തില്‍ നടക്കുവാന്‍ കഴിയാതിരുന്ന മനുഷ്യവംശത്തോട് ദൈവം പറയുന്നു, ഇനി നിങ്ങള്‍ തനിയെ നടക്കേണ്ടതില്ല- ഞാന്‍ നിങ്ങളെ വഴി നടത്തും.

സ്വന്ത കഴിവുകേടു തിരിച്ചറിയുന്നവനെ ആത്മാവു നടത്തുന്ന ജീവിതമാണ് പുതിയനിയമ വിശ്വാസ ജീവിതം. അതിന്റെ പിന്നില്‍ മനുഷ്യന്റെ പ്രയത്നമില്ല. പൂര്‍ണ്ണമായ വിധേയത്വം, തനിയെ ഈ പാപം നിറഞ്ഞ ലോക സാഗരം നീന്തുവാന്‍ കഴിയില്ലെന്ന ബോധ്യം - ഇതു രണ്ടും ഉള്ള ഏതു മനുഷ്യനേയും ദൈവത്തിന്റെ ആത്മാവു നടത്തും.

അല്ലാത്തവര്‍ക്കെല്ലാം ബൈബിള്‍ ഒരു നല്ല നേരമ്പോക്കിനുള്ള വക- അത്ര മാത്രം. ചര്‍ച്ച ചെയ്യാം, കുഴിച്ചു നോക്കാം, വായിച്ചു പരിഹസിക്കാം, ബ്ലൊഗ് എഴുതി കമെന്റു നേടാം.

ബൈബിളിനോട് കൌതുകം തോന്നിയ ദിനങ്ങളിലൊന്നില്‍ കേട്ട ഒരു കഥയുണ്ട്.പുതിയ നിയമത്തേയും പഴയ നിയമത്തേയും പറ്റി.
ഒരു സ്ത്രീയ്ക്ക് ഒരു ഭര്‍ത്താവുണ്ടായിരുന്നു. കര്‍ശക്കശ സ്വഭാവക്കാരനയ അദ്ദേഹം നിമിത്തം ആ സ്ത്രീ വല്ലാതെ വലഞ്ഞു. സ്നേഹ നിധിയായിരുന്നങ്കിലും, ശീലങ്ങളിലും ദിനചര്യകളിലും ഒരു വിട്ടുവീഴചയ്ക്കും അദ്ദേഹം തയ്യാറല്ലായിരുന്നു. അതിരാവിലെ എഴുന്നേല്‍ക്കുന്നതു മുതല്‍ ഉറങ്ങുന്നതു വരെ അദ്ദേഹത്തെ പ്രസാദിപ്പിക്കാന്‍ ആത്മാര്‍ത്ഥമായി പരിശ്രമിച്ചുകൊണ്ടിരുന്നെങ്കിലും, എന്നും എവിടെയെങ്കിലും തെറ്റു പറ്റും. അതോടെ അന്നു ചെയ്തതു മുഴുവന്‍ വൃഥാവിലായി.(ഒരുവന്‍ ന്യായപ്രമാണം എല്ലാം അനുസരിച്ചിട്ടു ഒന്നില്‍ പിഴച്ചാല്‍ എല്ലാത്തിലും പിഴതിനു തുല്യം! യാക്കോബ് 2:10 )

അങ്ങിനെയിരിക്കെ, അയാള്‍ മരിച്ചു.
അല്പകാലം കഴിഞ്ഞു ആ സ്ത്രീ മറ്റൊരു വിവാഹം കഴിച്ചു. സന്തോഷകരമായ കുടുംബ ജീവിതം അവള്‍ ആഗ്രഹിച്ചെങ്കിലും അവള്‍ക്കു തെറ്റു പറ്റി. ആദ്യത്തേതിനേക്കാള്‍ അതികഠിനമായ ദിനചര്യകളും കണിശക്കാരനുമായിരുന്നു പുതിയ ആള്‍. ആദ്യത്തെ ഭര്‍ത്താവിനു 5 മണിക്കു കാപ്പി വേണമായിരുന്നങ്കില്‍ പുതിയ അള്‍ക്കു 4 മണിക്കേ കാപ്പി വേണമായിരുന്നു.

പക്ഷേ ഒരു വ്യത്യാസമുണ്ടായിരുന്നു - ഇപ്പോഴത്തെ ഭര്‍ത്താവു, രാവിലെ എഴുന്നേറ്റു കാപ്പിക്കുള്ളതെല്ലാം തയാറാക്കി വച്ച്, വെള്ളവും ചൂടാക്കിയിട്ടു ഭാര്യയേ വിളിച്ചുണര്‍ത്തും. ദിനചര്യകള്‍ മുന്‍പത്തേക്കാള്‍ അതികഠിനമെങ്കിലും സന്തോഷത്തോടെ ഒരുമിച്ചു ഒരു ജീവിത യാത്ര! സ്നേഹവും കൂട്ടായ്മയും ഉള്ള സന്തോഷകരമായ ജീവിതം. ഒന്നും തനിയെ ചെയ്യാന്‍ വിടാറില്ല. നല്ലൊരു സഹായിയായി, തുണയായി ഒരുമിച്ചു വസിച്ചു.

ഇതു ഒരു പൂര്‍ണ്ണമായും നല്ല ഉദാഹരണമല്ലായിരിക്കാം. പക്ഷേ, പുതിയനിയമ വിശ്വാസജീവിതവും പഴയ നിയമജീവിതവും തമ്മില്‍ ഉളള വ്യത്യാസത്തിന്റെ ഒരു ഏകദേശ രൂപം ഇങ്ങിനെയൊക്കെയാണ്. സകല സത്യത്തിലും -എളുപ്പമുള്ള കുറെ കാര്യങ്ങളില്‍ മാത്രമല്ല- ദൈവത്തിന്റെ ആത്മാവും കൈപിടിച്ചു നടത്തും. പരീക്ഷകളിലും, പ്രലോഭനങ്ങളിലും, ശക്തിതരുന്ന ആത്മാവിനോടോത്തുള്ള വിശ്വാസ ജീവിതം.

അതു മുന്‍കൂട്ടി കണ്ടുകൊണ്ടു പാടുന്ന പാട്ടാണ് 23 ആം സങ്കീര്‍ത്തനം.

ഒരു ഇടയന്റെ കൈയ്യില്‍ ഇരിക്കുന്ന കുഞ്ഞാട് നിര്‍ഭയനായി പറയുകയാണ്-
യഹോവ എന്റെ ഇടയന്‍ ആകുന്നു, എനിക്കു ഒരു കുറവും ഉണ്ടാകയില്ല.....
സുരക്ഷിതമായ പച്ചപുല്‍പ്പുറങ്ങള്‍ എവിടെയെന്നു എനിക്കു അറിയില്ല.ഞാന്‍ തനിയേ നടന്നു കയറിയ പല പുല്‍മേടുകള്‍ പാഴ്മരു ഭൂമി ആയിരുന്നു. എന്നാല്‍ എല്ലാ കാടുംമേടും അറിയുന്ന എന്റെ നല്ല ഇടയന്‍ പാച്ചയായപുല്‍പ്പുറങ്ങളിലേക്കുതന്നെ എന്നെ നടത്തുന്നു.......

പിന്നീട് ശാന്തമായ ജലാശയത്തിനടുത്തേയ്ക്കു അവന്‍ എന്നെ കൊണ്ടുപോകുന്നു......

മരണ നിഴലിന്റെ താഴ്വരയില്‍ക്കൂടെയാണ് എന്റെ സഞ്ചാരം എങ്കിലും മരണത്തെ ജയിച്ചവന്റെ കൈകളില്‍ ഞാന്‍ സുരക്ഷിതനാണ്.....
ഇന്നലെ വരെ നന്മയുടെയുടെ പിന്നാലെ ഞാന്‍ ഓടി നടന്നു. എന്നാല്‍ ഇന്നിതാ നന്മയും കരുണയും എന്നെ പിന്തുടരുന്നു........

അങ്ങിനെ, അങ്ങിനെ യാത്ര ചെയ്ത്, ഒരു ദിവസം ഞാന്‍ യഹോവയുടെ ആലയത്തില്‍ എത്തിച്ചേരും. പിന്നെ അവിടെ ഏന്നേക്കും വസിക്കും!

യഹോവയോടൊപ്പം നടന്നു നടന്നു ഒരു ദിവസം കാണാതായ ഹാനോക്കിനെപ്പോലെ..

(ഈ ലേഖനം പ്രധാനമായും ബൈബിള്‍ വിശ്വാസികളായ വായനക്കാരെ ഉദ്ദേശിച്ചാണ് എഴുതിയിട്ടുള്ളത്.)

ബൈബിളിലെ അക്ഷരം കുഴിക്കുന്നവര്‍!

2010-02-12T23:49:00.006+03:00

ബൈബിളിലെ വാചകങ്ങളും വാക്യങ്ങളും കീറി മുറിച്ച് അപഗ്രഥിച്ചു പഠിച്ചിട്ട് മറ്റേതൊക്കെയോ മത ഗ്രന്ഥങ്ങള്‍ സത്യമാണെന്നും കൃസ്ത്യാനികളാകപ്പാടെ തെറ്റിപ്പോയിരിക്കുന്നു എന്നും തെളിയിക്കാനുള്ള വ്യഗ്രത ചില പോസ്റ്റുകളില്‍ അനുസ്യൂതം തുടര്‍ന്നു വരുന്നതു കാണുന്നു. ഇരപിടിക്കുവാനുള്ള ലാക്കോടെ ഉദ്വേഗജനകമായ തലക്കെട്ടുമായി വരുന്ന ഇത്തരം പോസ്റ്റുകള്‍ അവഗണിക്കപ്പെടുന്നതു തികച്ചും സ്വാഭാവികം മാത്രം.

അക്ഷരം കുഴിച്ചു നോക്കി സത്യം കണ്ടെത്താനാവും എന്ന തെറ്റിദ്ധാരണ കുറച്ചു മുന്‍പ് കൃസ്ത്യാനികള്‍ക്കും പറ്റിയിരുന്നു.

ഹൈന്ദവ വേദോപനിഷത്തുക്കളില്‍ ക്രിസ്തുവിനു സമാനമായ ഒരു വ്യക്തിപ്പറ്റിയുള്ള പരാമര്‍ശനങ്ങളെ പൊക്കിയെടുത്ത്, ക്രോഡീകരിച്ചു, ഈ വേദങ്ങള്‍ എല്ലാം ബൈബിളിനെ സാധൂകരിക്കുന്നു എന്ന മട്ടിലുള്ള പ്രസം‌ഗങ്ങളും ചില പുസ്തകങ്ങളും വരെ പ്രചരിക്കുകയുണ്ടായി. അതെന്തായാലും അവസാ‍നിച്ച മട്ടാണ്.

ഇതേ മാതൃകയാണ് ഇപ്പോള്‍ ചില പോസ്റ്റുകളില്‍ ബൈബിളിനെതിരെ അരോപിച്ചു കാണുന്നത്. എത്ര പറഞ്ഞാലും ബോദ്ധ്യപ്പെടില്ല എന്നറിയാവുന്നതുകൊണ്ട് ,ഒരോന്നിനും മറുപടി പറയാന്‍ സമയം കളയുന്നില്ല. എന്നാല്‍ ഒരു കാര്യം പറയാതെ വയ്യ. പൌലോസ് കൊരിന്ത്യര്‍ക്ക് എഴുതിയ കത്തില്‍ ഒരു കാര്യം സൂചിപ്പിക്കുന്നു, “ അക്ഷരം കൊല്ലുന്നു, ആത്മാവോ ജീവിപ്പിക്കും.“ (2 കൊരിന്ത്യര്‍ 3:6)

ബൈബിളിലെ വാചകങ്ങള്‍ കീറി മുറിക്കുന്നവരോട് ബൈബിള്‍ പറയുന്നു, “അക്ഷരം നിങ്ങളെ കൊല്ലും !” മറ്റുള്ള മത ഗ്രന്ഥങ്ങളുടെ വികലമായ അപഗ്രഥനത്തിലൂടെ സ്വന്തം മതം സാധൂ‍കരിക്കേണ്ട ഗതികേടിലേക്ക് പല മത വിശ്വാസികളും വന്നു പെട്ടിരിക്കുന്നു.

ആയിരിത്തിഅറുന്നൂറു വര്‍ഷങ്ങള്‍ക്കിടയില്‍ , വിവിധ നിലവാരത്തില്‍ ജീവിച്ചിരുന്ന നാല്‍പ്പതിലധികം പേര്‍ പല ഭാഷയില്‍ എഴൂതിയ ഗ്രന്ഥമാണ് ബൈബിള്‍. ഒറ്റ കേന്ദ്ര കഥാപാത്രവും, രണ്ടു പ്രധാനാ സംഭവവുമാണ് ബൈബിളിന്റെ ഇതിവൃത്തം എന്നു വേണമെങ്കില്‍ ചുരുക്കി പറയാം. യേശുവാണ് കേന്ദ്ര കഥാ പാത്രം. രണ്ടു കാലങ്ങളിലുള്ള യേശുവിന്റെ ഭൂമിയിലേക്കുള്ള ആഗമനമാണ് പ്രധാന സംഭവങ്ങള്‍. ഒന്നാമത്തെ വരവു രണ്ടായിരം വര്‍ഷങ്ങള്‍ക്കു കഴിഞ്ഞു. ബൈബിളില്‍ യേശുവിന്റെ ആദ്യ വരവിനേപറ്റി പറഞ്ഞതിന്റെ മൂന്നിരട്ടി പ്രാവശ്യം രണ്ടാം വരവിനേപറ്റി പ്രവചിച്ചിട്ടുണ്ട്.

ഇനി ഏതു സമയത്തും യേശുവിന്റെ വരവു ഉണ്ടാകുമെന്നു ബൈബിള്‍ പഠിപ്പിക്കുന്നു. മനുഷ്യനു നിശ്ചയമില്ലാത്ത രണ്ടു ആകസ്മികസംഭവങ്ങള്‍- ഒന്നുകില്‍ നമ്മുടെ മരണം,അല്ല്ലെങ്കില്‍ യേശുവിന്റെ ആഗമനം- ഇതിനിടയിലെ ക്ഷണിക ജീവിതം അതീവ സൂക്ഷ്മതയോടെ ജീവിക്കാന്‍ വേണ്ട നിര്‍ദ്ദേശക തത്ത്വങ്ങളാണ് പുതിയ നിയമത്തില്‍ ഉടനീളം. അര്‍ത്ഥ ശൂന്യമായ ആവര്‍ത്തനങ്ങളായ കര്‍മ്മങ്ങള്‍ ഒന്നും മനുഷ്യനെ ദൈവമായി അടുപ്പിക്കുന്നില്ല എന്നതാണ് യേശുവിന്റെ ഉപദേശങ്ങളില്‍ മൂഖ്യം.

യേശുവിന്റെ രണ്ടാമത്തെ വരവിനു ശേഷംഈ ബൈബിള്‍ എന്ന പുസ്തകം ഉത്സവം കഴിഞ്ഞ പറമ്പിലെ ഉത്സവത്തിന്റെ നോട്ടീസു പോലെ ഈ ഭൂമിയില്‍ ചിതറിക്കിടക്കും. ഇതിനു ഒരു പ്രാധാന്യവും ഉണ്ടാകുകയില്ല. കാരണം, ബൈബിളിലെ വചനങ്ങള്‍ക്കു ജീവന്‍ നല്‍കുന്ന ദൈവത്തിന്റെ പരിശുദ്ധാത്മാവ് ഇവിടെയുണ്ടാകില്ല. പിന്നെ ഇതു വെറും പഞ്ചതന്ത്രം കഥ പോലെ മാത്രമേ തോന്നുകയുള്ളൂ. നിര്‍ഭാഗ്യവശാല്‍ ഈ അക്ഷരം കുഴിക്കുന്നവര്‍ക്ക് ഇന്നും ഇതു തന്നെയാണ് ബൈബിള്‍. കീറി മുറിച്ച് അപഗ്രഥിച്ച് സ്വ്വന്തം മതത്തെ തെളിയിച്ചെടുക്കാനുള്ള ഒരു പരീക്ഷണ ശാല.

എന്നാല്‍, ഈ പണ്ഡിതന്മാര്‍ക്കായി ഒരു ഉദാഹരണം പറയാം. യേശു ജീവിച്ചിരുന്ന കാലത്ത് , വെറും മൂന്നു മണിക്കൂര്‍ നേരം മാത്രം യേശുവിനെ കണ്ട് പരിചയിച്ച ഒരു മനുഷ്യനെ ബൈബിള്‍ പരിചയപ്പെടുത്തുന്നുണ്ട്. യേശുവിന്റെ അത്ഭുത പ്രവര്‍ത്തികള്‍ കാണുകയോ, പ്രസം‌ഗങ്ങള്‍ കേള്‍ക്കുകയോ ആദ്ദേഹം ചെയ്തിരുന്നില്ല. മാത്രമല്ല അദ്ദേഹം യേശുവിനെക്കാണുമ്പോല്‍, യേശു ഏറ്റവും അപമാനിതനായി നഗ്നനായി കുരിശില്‍ കിടക്കുകയുയായിരുന്നു. ഞാന്‍ പറയുന്നതു യേശുവിനോടൊപ്പം ക്രൂശിക്കപ്പെട്ട കള്ളന്മാരില്‍ ഒരുവനേക്കുറിച്ചാണ്. അയാള്‍ വലത്തു വശത്തു കിടന്നവനോ ഇടതു വശത്തുകിടന്നവനോ ആകാം. പക്ഷേ, ചുരുങ്ങിയ സമയം കൊണ്ട്, അയാള്‍ യേശുവില്‍ രക്ഷകനെ കണ്ടു. കുരിശിന്റെ മുകളില്‍ എഴുതി വച്ചിരിക്കുന്ന മേലെഴുത്തിന്റെ അന്തഃസത്ത ഗ്രഹിച്ചു. അവനോട് യേശു പറഞ്ഞു, “നീ ഇന്ന് എന്നോടു കൂടെ പറുദീസയില്‍ ഇരിക്കും!”

ഒരു ജന്മം കൊണ്ടു നേടാന്‍ ഒരു ക്രിസ്ത്യാനി ആഗ്രഹിക്കുന്നത്, ഒരു വാക്കു കൊണ്ട് ആ കുറ്റവാളി നേടിയെടുത്തു!

ആ കുറ്റവാളിയുടെ ബുദ്ധിയെങ്കിലും ഈ വിശകലന വിശാരദന്മാര്‍ക്കു കിട്ടിയുരുന്നെങ്കില്‍!!

ബൈബിളില്‍ ഇല്ലാത്ത പ്രയോഗങ്ങള്‍!

2009-10-01T08:52:00.006+03:00

സാധാരണ സംഭാഷണങ്ങളില്‍ പൊതുവെ,ബൈബിളില്‍ നിന്നും ആണെന്നു ധാരണയില്‍ ചില പ്രയോഗങ്ങള്‍ കടന്നു വരാറുണ്ട്.

പ്രശസ്തമായ പലതും ബബിളില്‍ ഇല്ലാത്തതോ, കൃത്യമായി അങ്ങനെയല്ലാത്തതോ ആണെന്നതാണ് രസകരമായ കാര്യം!
അവയില്‍ ചിലവ ഇതാ:-

1. നിന്റെ വിശ്വാസം നിന്നെ രക്ഷിക്കും

2. നിങ്ങളില്‍ പാപം ഇല്ലാത്തവര്‍ കല്ലെറിയട്ടെ

3. പത്രോസേ നീ പാറയാകുന്നു.

എന്നാല്‍ ബൈബിളില്‍ അവയൊക്കെ ഇങ്ങനെയാണ്:-

1. നിന്റെ വിശ്വാസം നിന്നെ രക്ഷിച്ചിരിക്കുന്നു. (മര്‍ക്കോസ് 10:52)

(ചെറിയ വ്യത്യാസമേ ഉള്ളൂ എന്നു തോന്നാമെങ്കിലും, ഏതു വിശ്വാസവും ഒരാളെ രക്ഷിക്കും എന്നൊരു ധ്വനി മേല്‍പ്പറഞ്ഞ വാചകത്തി‍ലുണ്ട്. അങ്ങനെ ഒരു ആശയം ബൈബിളില്‍ ഇല്ല).

2. നിങ്ങളില്‍ പാപം ഇല്ലാത്തവര്‍ ഒന്നാമതു കല്ലെറിയട്ടെ (യോഹന്നാന്‍ 8:7)

3. നീ പത്രോസ് ആകുന്നു. (മത്തായി 16:18)

(ലിങ്കുകള്‍ എല്ലാം കൈപ്പള്ളിയുടെ മലയാളം ബൈബിളിലേക്കാണ്. കൈപ്പള്ളിയ്ക്കു നന്ദി)

ക്രൈസ്തവ സഭയും ജാതി വ്യവസ്ഥയും

2009-09-23T23:51:00.001+03:00

യഹൂദന്മാരുടെ തൊട്ടുകൂടായ്മ
ഭാരതത്തിലെ ഹിന്ദു മതത്തിലേപ്പോലെയോ, ഒരു പക്ഷേ അതിനേക്കാളും തീവ്രമായ നിലയിലോ ജാതി വ്യവസ്ഥ ഇസ്രായേലില്‍ നിലനിന്നിരുന്ന കാലത്താണ് യേശു ജനിക്കുന്നത്.

യഹൂദന്മാര്‍, മറ്റിതര ജാതിയില്‍ പെട്ടവരുടെ കൈയ്യില്‍ നിന്നും വെള്ളം വാങ്ങിക്കുടിക്കുകയോ, അവര്‍ താമസിക്കുന്ന ഗ്രാമങ്ങളില്‍ കാല്‍ ചവിട്ടുകയോ ചെയ്യുമായിരുന്നില്ല!

ഭാരതീയ ജാതിവ്യവസ്ഥയില്‍ നിന്നും വ്യത്യസ്ഥമായിരുന്ന പ്രധാന ഘടകം, തൊഴിലടിസ്ഥാനമാക്കിയുള്ള ജാതി വ്യവസ്ഥ അല്ലായിരുന്നു എന്നതായിരുന്നു.ജൂതന്മാരില്‍ തന്നെ എല്ലാ തൊഴില്‍ ചെയ്യുന്നവരും ഉണ്ടായിരുന്നു.

മറ്റൊരു പ്രത്യേകത, പ്രധാനമായൂം, യഹൂദരും മറ്റ് ജാതിമത്സ്ഥരുമായിട്ട് ആയിരുന്നു ഇത്തരം “തൊട്ടുകൂടായ്മ” നില നിന്നിരുന്നത്. പരീശന്മാര്‍,സദൂക്യര്‍, ഹേരോദ്യര്‍ തുടങ്ങിയ വിഭാഗങ്ങള്‍ ജൂതന്മാരുടെ ഉള്ളില്‍ തന്നെ ഉണ്ടായിരുന്നുവെങ്കിലും, അവര്‍ തമ്മിലുള്ള അന്തരം, തുലോം കുറവായിരുന്നു, എന്നു പറയാം.

ക്രൈസ്തവ സഭയ്യും ജൂതന്മാരും

ബൈബിളിലെ പുതിയനിയമത്തില്‍ വിശദീകരിച്ചിരിക്കുന്ന ക്രൈസ്തവ സഭ യദാര്‍ത്ഥത്തില്‍ യഹൂദ മതത്തിന്റെ തുടര്‍ച്ച ആയിരുന്നില്ല. തികച്ചും നൂതനവും, വ്യത്യസ്തവുമായിരുന്നു ക്രിസ്തുവിന്റെ ഉപദേശങ്ങള്‍.

പക്ഷേ എന്തുകൊണ്ടോ ക്രിസ്തുവിന്റെ ശിഷ്യന്മാര്‍ ആദ്യം അതു ശരിക്കും മനസിലാക്കിയിരുന്നില്ല. പ്രത്യേകിച്ച് പത്രോസ്. ക്രിസ്തു മതം സ്വീകരിക്കുവാന്‍ ഒരാള്‍ ആദ്യം സര്‍ക്കംസിഷന്‍ ചെയ്തു, ആചാരപ്രകാരം യഹൂദന്‍ ആയതിനു ശേഷം മാത്രന്മേ, ക്രിസ്ത്യാനി ആകുവാന്‍ കഴിയുകയുള്ളൂ വിശ്വസിക്കുകയും, പഠിപ്പിക്കുകയും ചെയ്തിരുന്നു. ആ സാഹചര്യത്തിലാണ്, ക്രിസ്തുവിന്റെ പന്ത്രണ്ട് ശിഷ്യരില്‍പ്പെടാത്ത പിന്നീട് പൌലോസ് എന്ന് അറിയപ്പെട്ട, ശൌല്‍ ക്രിസ്തു മതം സ്വീകരിക്കുന്നത്.

യഹൂദ പരീശനായിരുന്ന ശൌല്‍ ക്രിസ്തീയ മത വിശ്വാസികളെ, തിരഞ്ഞു പിടിച്ചു പീഡിപ്പിക്കുവാന്‍ പ്രത്യേക അനുമതി പത്രവുമായി, ഡമാസ്കസിലേക്കു പോകുന്ന വഴിക്കു മനം തിരിഞ്ഞു, ഒരു ക്രിസ്ത്യാനി ആയിത്തിരുകയായിരുന്നു.

തുടര്‍ന്നു ഏതാണ്ട് മൂന്നു വര്‍ഷക്കാലം പോള്‍, അറേബിയയില്‍ എവിടെയോ ആയിരുന്നു എന്ന് ബൈബിള്‍ പറയുന്നു. അറേബ്യയില്‍ നിന്നും പോള്‍ തിരിച്ചു വന്നത് പുതിയ ഒരു മനുഷ്യനായിട്ട് ആയിരുന്നു. രണ്ടു തവണ ജയില്‍ ശിക്ഷ അനുഭവിക്കുകയും, നാടുകടത്തപ്പെടുകയും,നിരവധി പീഡനം ഏറ്റുവാങ്ങുകയും ചെയ്തുവങ്കിലും, കൊല്ലപ്പെടുന്നതു വരേയും, നിരന്തരമായി യാത്ര ചെയ്തും അനേകം സഭകള്‍ സ്ഥാപിച്ചും, ക്രിസ്തീയ സഭയുടെ അടിത്തറ പാകുവാന്‍ പോള്‍ ചെയ്ത പ്രവര്‍ത്തനങ്ങള്‍ അതി പ്രാധാന്യമുള്ളതാണ്.

എന്നാല്‍ അതിലും പ്രധാനപ്പെട്ട സംഭാവന,പല നിര്‍ണ്ണായകമായ പ്രതിസന്ധി ഘട്ടങ്ങളിലും, അടിസ്ഥാനപരമായ ക്രിസ്തീയ ഉപദേശം വിശദീകരിക്കുന്നതില്‍, പോള്‍ കാണിച്ച പാടവം തന്നെയാണ്. അതിനായി എഴുതിയ പതിനാലോളം കത്തുകള്‍ ബൈബിളില്‍ ചേര്‍ത്തു എന്നത് അതിന്റെ പ്രാധാന്യത്തെ ഏടുത്തു കാണിക്കുന്നു.

ക്രൈസ്തവ മതത്തില്‍ ജാതിയ പരിഗണനകള്‍ നല്‍കുന്നതിനെ പോള്‍ ആധികാരികമായി തന്നെ എതിര്‍ത്തു.ജാതികളുടെ അപ്പോസ്തോലന്‍ എന്ന പേരു പോളിനു നേടിക്കൊടുത്തതു ഇത്തരം പ്രവര്‍ത്തങ്ങളാണ്.

പോള്‍ ഗ്രഹിച്ച സത്യം

ക്രിസ്തീയ സഭയ സംബന്ധിച്ചു തനിക്കു ഒരു സത്യം ബോധ്യപ്പെട്ടിണ്ട് എന്നു പോള്‍ കൂടെക്കൂടെപ്പറയുമായിരുന്നു.
അതിനെ ഒരു രഹസ്യം (സീക്രറ്റ് ഓഫ് ക്രിസ്റ്റ്യാനിറ്റി) എന്നു വിളിക്കുവാനാണ് പോള്‍ ഇഷ്ടപ്പെട്ടത്. എഫേസ്യര്‍ക്കു കത്ത് കത്തു എഴുതുമ്പോള്‍, അതു ഇങ്ങനെ വിശദീകരിക്കുന്നു “ You have heard that he let me know this mystery through a revelation. I've already written to you about this briefly“ (എഫേസ്യര്‍ 3:3)

തൊട്ടു താഴെ എഫേസ്യര്‍ 3:6 ല്‍ അത് എന്തെന്നും വ്യക്തമാക്കുന്നു.
“This mystery is the Good News that people who are not Jewish have the same inheritance as Jewish people do. They belong to the same body and share the same promise that God made in Christ Jesus“
യഹൂദന്മാരും , അല്ലാത്ത ഏവരും, ഒരേ അവകാശമുള്ളവരും, സഭ എന്ന ഒരു ശരീരത്തിന്റെ ഭാഗവും,ആകുന്നു എന്നര്‍ത്ഥം!
പോള്‍ ഇതു അര്‍ത്ഥ ശങ്കയുണ്ടാകുവാനിടയില്ലാത്ത വിധം പിന്നീടും പല സ്ഥലങ്ങളിലും ഇതു ഊന്നി പറയുന്നുണ്ട്.

ക്രിസ്തീയ സഭയില്‍ ജാതി ചിന്ത, വ്യഭിചാരം പോലെ തന്നെ കുറ്റകരമാണ്. ജനിച്ച കുലം കൊണ്ടോ, ഉപജീവനത്തിനായി തിരഞ്ഞെടുത്ത തൊഴില്‍ കൊണ്ടോ, ഒരു വിശ്വാസിയുടെയും, സ്ഥാനം ഉത്തമമോ, അധമമൊ ആകുന്നില്ല!

ഈ ഉപദേശശത്തിന്റെ ശ്രേഷ്ഠത ക്രിസ്തീയ മത പ്രചരണത്തിനു ഒട്ടൊന്നുമല്ല സഹായിച്ചതു. പക്ഷേ, സത്യം ഇങ്ങനെയൊക്കെയാണെങ്കിലും, ഇന്നത്തെ നില പരിതാപകരമാണെന്നു സമ്മതിച്ചേ തീരൂ.

കത്തോലിക്കാ സഭയില്‍ പുതിയതായി ചേര്‍ക്കപ്പെടുന്ന “പുതുക്രിസ്ത്യാനി“കളുടെ മക്കള്‍ വിവാഹം കഴിക്കാന്‍ പെടാപ്പാടു പെടെണ്ടി വരുന്നു!പുരോഹിതനാവുക അത്ര എളുപ്പവുമല്ല!

അതിനൊരു പരിഹാരമായി കടന്നു വന്നതു പ്രോട്ടസ്റ്റന്റ്, സഭകളും, എവാഞ്ചലിക്കല്‍ സഭകളുമായിരുന്നു. അവര്‍ എല്ലാവരും തന്നെ, മറ്റു ക്രിസ്തീയ സമുദായങ്ങളില്‍ നിന്നും പിരിഞ്ഞു പോന്നവരോ, ഹൈന്ദവ പശ്ചാത്തലമുള്ളവരോ ആയിരുന്നു. പാരമ്പര്യം അവകാശപ്പെടുവാന്‍ ഇല്ലാത്തവരായിരുന്നതു കൊണ്ടും, ബഹു ഭൂരിപക്ഷവും നിര്‍ധനര്‍ ആയിരുന്നതുകൊണ്ടും , ആദ്യത്തെ തലമുറയില്‍, ഏറക്കുറെ, സമത്വം പാലിക്കപ്പെട്ടു വന്നു.

എന്നാല്‍ ഇപ്പോഴത്തെ സ്ഥിതി പരമ ദയനീയമാണെന്നു പറയാതെ വയ്യ! പണ്ട് ഉണ്ടായിരുന്ന സഭയുടെ പേരും, അതിനു മുന്‍പു ആയിരുന്ന ഹൈന്ദവ ജാതിയുടെ പേരു പോലും (ഇതൊക്കെ ആര്‍ക്കറിയാം) പറഞ്ഞു ഊറ്റം കൊള്ളുന്നവര്‍ കുറവല്ല!

അധര്‍മ്മം പ്രവര്‍ത്തിക്കുന്ന ഏവരുമേ, നിങ്ങളെ ഞാന്‍ അറിയുന്നില്ല എന്നു ക്രിസ്തു അവരെ നോക്കിപ്പറയുന്ന നാള്‍ വിദൂരമല്ല!

യൂദാസ് പാവമായിരുന്നില്ല!!

2009-08-16T21:08:00.001+03:00

പണ്ട് തോമ്മന്‍ എന്ന് അറിയപ്പെടുന്ന ഒരു ബ്ലോഗ്ഗറുടെ പാവം യൂദാസ് എന്ന പോസ്റ്റ് ആണ് ഈ കുറിപ്പിന് ആധാരം.

ശ്രീ തൊമ്മന്‍, താങ്കളുടെ നിരീക്ഷണത്തോടും ലിങ്ക് കൊടുത്തിരിക്കുന്ന ലേഖനത്തിലെ പരാമര്‍ശങ്ങളോടും ഉള്ള വിയോചിപ്പു അറിയിക്കുന്നു. ഇതു ഒരു വിശ്വാസിയുടെ വേര്‍ഷനാണ്. (വേണമെങ്കില് അന്ധവിശ്വാസി/ ചെപ്പടി വിദ്യക്കാരന്‍ എന്നൊക്കെ വിളിക്കാം)

താങ്കള്‍ പറയുന്നു: യേശുവിന്റെ മരണവും ഉത്ഥാനവും ആകസ്മികമല്ല; “എഴുതപ്പെട്ടതാണ്”. അതായത് എഴുതപ്പെട്ടിരുന്നതുപോലെ സംഭവിക്കേണ്ടിയിരുന്നതാണ് അദ്ദേഹത്തിന്റെ കുരിശുമരണവും ക്രിസ്തുമതത്തിന്റെ അടിസ്ഥാനം തന്നെയായ മൂന്നാം നാളത്തെ ഉയിര്പ്പും. അപ്പോള്‍ യേശുവിനെ കുരിശുമരണത്തിലേക്ക് നയിച്ച ഒറ്റിന്റെ കാരണക്കാരനായ യൂദാസ് എങ്ങനെയാണ് കുറ്റക്കാരനാകുന്നത്? കഠിനമായ പരിശീലനത്തിനുശേഷം കാണികളുടെ മുമ്പില് നന്നായി ചെയ്യുന്ന ഒരു നാടകത്തിലെ ഒറ്റ ചുവടുപോലും പിഴക്കാത്ത മികച്ചൊരു നടന് മാത്രമായിരുന്നില്ലേ യൂദാസ്? “ചുരുക്കത്തില്, യൂദാസ് ഒരു ഉപകരണം ആവുകയായിരുന്നു, എന്ന്.

സംഭവം നേരുതന്നെ പക്ഷേ, തല തിരിഞ്ഞു പോയി, ഡിയര്‍ തോമ്മന്‍. എഴുതപ്പെട്ടതു പോലെ സംഭവിച്ചതല്ല. സംഭവിക്കാനിരുന്നത് മുന്‌കൂട്ടി ദര്‍ശിച്ച് എഴുതിയെന്നേ ഉള്ളൂ. എഴുതപ്പെട്ടില്ലെങ്കിലും അങ്ങിനെ തന്നെ സംഭവിക്കുമായിരുന്നു. എഴുതപ്പെടാത്ത ഒത്തിരി വേറെ കാര്യങ്ങളും അതിനോടനുബന്ധിച്ചു നടന്നു.

യൂദാസിനെ തിന്മയുടെ പ്രതീകമായിക്കാണുന്നത് ബൈബിള്‍ അടിസ്ഥാനത്തില്‍ ശരിയല്ല. അന്നു രാത്രിയില്‍, രണ്ടു ശിഷ്യന്മാര്‍ യേശുവിനെ തള്ളിപ്പറഞ്ഞു. ഒരാള്‍ യൂദാസ്. മറ്റേയാള്‍ പത്രോസ്. ഒരാള്‍ എനിക്കു ആളെ അറിയാമെന്നു പറഞ്ഞു കാണിച്ചു കൊടുത്തു, മറ്റേയാള്‍ എനിക്കിയാളെ അറിയില്ലെന്നു പറഞ്ഞു ഒഴിഞ്ഞു മാറി, ഒന്നല്ല മൂന്നു വട്ടം!

രണ്ടു പേരു തെറ്റു ചെയ്തുവെങ്കിലും, പിന്നിടെങ്ങനെ ഒരാള്‍ വിശുദ്ധനും, മറ്റേയാള്‍ അശുദ്ധനും ആയി?

ഇവിടെയാണ് സുവിശേഷത്തിന്റെ അടിസ്ഥാന പ്രമാണംകുടികൊള്ളുന്നത്.

തെറ്റു തിരിച്ചറിഞ്ഞപ്പോള്‍ രണ്ടാളുകളുടെയും പ്രതികരണം രണ്ടു വിധമായിരുന്നു. യൂദാസ് തെറ്റു ചെയ്യുവാന്‍ കൂട്ടു നിന്ന പുരോഹിതന്മാരോടു പോയി പരാതി പറഞ്ഞു. പത്രോസോ, പുലരുവോളം, കരഞ്ഞു, മാനസാന്തരപ്പെട്ടു. പിന്നീടുള്ള രണ്ടു പേരുടെയും ജീവിതം നോക്കിയാല്‍ അന്നു രാത്രിയില്‍ അവര്‍ക്കു പറ്റിയ തെറ്റിനേക്കാള്‍,തെറ്റിനോടുള്ള മനോഭാവത്തിലെ വ്യത്യാസം എന്തായിരുന്നു എന്നു മനസിലാക്കാം.

തെറ്റു ചെയ്യാത്തവനെയല്ല, തെറ്റിനെ വെറുക്കന്നവനെ, യേശു സ്നേഹിക്കുന്നു.

പക്ഷേ, യൂദാസിനോടുള്ള എന്റെ അനിഷ്ടത്തിന്റെ മുഖ്യ കാരണം മറ്റൊന്നാണ്. യേശുവിന്റെ മരണത്തിനു തൊട്ടു മുന്‍പ് ഒരു ദിവസം ഒരു സ്ത്രീ വളരെ വിലയുള്ള പെര്‍ഫ്യൂം അവളുടെ ബഹുമാന സൂചകമായി യേശുവിന്റെ കാലില്‍ ഒഴിച്ചു. അപ്പോള്‍ യൂദാസ് അസന്തുഷ്ടി പ്രകടിപ്പിച്ചു കൊണ്ടു പറഞ്ഞു, “ഇതു വെറുതെ നഷ്ടപ്പെടുത്തിക്കളഞ്ഞല്ലോ, ചന്തയില്‍ കൊണ്ടുപോയി വിറ്റിരുന്നെങ്കില്‍, ഒരു മുന്നൂറു വെള്ളിക്കാശെങ്കിലും കിട്ടുമായിരുന്നല്ലോ” എന്ന്.

അതേ യൂദാസ്, യേശുവിന് വിലയിട്ടപ്പോല്‍ വെറും മുപ്പതു വെള്ളിക്കാശ് മൂല്യമേ കണ്ടുള്ളൂ.

ഇതേ തെറ്റ് ഇവിടെ യൂദാസിനേയും, യേശുവിനേയും താരതമ്യപ്പെടുത്തിയപ്പോല്‍ തൊമ്മനും പറ്റിയൊ എന്നൊരു സംശയം എനിക്ക് ഇല്ലാതില്ല.

(ഇതിലെ പ്രസക്ത ഭാഗങ്ങള്‍ തൊമ്മന്റെ പോസ്റ്റിനു മറുപടിയായി ഇട്ടിരുന്നു.)

എന്റെ വിശ്വാസം തെറ്റായാല്‍?

2009-08-11T12:27:00.002+03:00

ജീവന്റെ ഉല്‍പ്പത്തിയേപ്പറ്റി പരിശോധിച്ചു ഉറപ്പു വരുത്താനാവും വിധം കൃത്യമായ വിവരങ്ങള്‍ ഇന്നുവരെ കണ്ടെത്തിയിട്ടില്ലാത്തതിനാല്‍,ജീവിതത്തേക്കുറിച്ചുള്ള അടിസ്ഥാനപരമായ വിഷയങ്ങള്‍ക്ക് ഉത്തരം നല്‍കാന്‍ ഏതെങ്കിലും ഒരു വിശ്വാസത്തില്‍ ആശ്രയിക്കുക എന്ന പോംവഴിയാണ് അവശേഷിക്കുന്നത്! ആ നിലയില്‍ മനുഷ്യരാശി മുഴുവന്‍ താഴെ‍പ്പറയുന്ന ഏതെങ്കിലും ഒരു വിശ്വാസത്തിന്റെ അടിമകളായാണ് ജീവിക്കുന്നത് എന്നു പറയാം.

1. ഏക -ജന്മ വിശ്വാസം ( ക്രിസ്ത്യന്‍, മുസ്ലിം, യഹൂദ.. മതങ്ങള്‍)
2. പുനര്‍ജ്ജന്മ വിശ്വാസം (ഹിന്ദു, ജൈന.. മതങ്ങള്‍)
3. നിരീശ്വര വാദം

തത്വ ചിന്തകന്മാര്‍ നൂറ്റാണ്ടുകളായി ഈ വിശ്വാസങ്ങള്‍ ഒരോന്നും ശരിയാണെന്നു സ്ഥാപിക്കുവാന്‍ നിരന്തരം സംവാദങ്ങള്‍ നടത്തി വരുന്നു. ഉത്തരം കിട്ടാത്ത ചില ചോദ്യങ്ങള്‍ ശാസ്ത്രീയമായി തെളിയിക്കപ്പെടത്തിടത്തോളം കാലം, ഊഹാപോഹങ്ങളിലും, വ്യക്തിപരമായ ബോധ്യപ്പെടലുകളിലും,സങ്കല്‍പ്പങ്ങളിലും,നിഗമനങ്ങളിലും അടിസ്ഥാനപ്പെടുത്തി ഏതെങ്കിലും ഒന്നില്‍ വിശ്വസിക്കിക്കുകയേ തരമുള്ളൂ.

ഇതില്‍ ഏതെങ്കിലും ഒന്നില്‍ വിശ്വസിക്കുകയും മറ്റു ര‍ണ്ടും തള്ളിക്കളയുകയും ചെയ്യുവാന്‍,അടിസ്ഥാനപരമായ ചില വിഷയങ്ങളില്‍ എങ്കിലും ചോദ്യം ചെയ്യാത്ത,അന്ധമായ വിശ്വാസം ആവശ്യമാണ്.പരി‍ശോധിച്ചു തെളിയിക്കാന്‍ കഴിയാത്ത നിഗമനങ്ങളെയാണ് അന്ധമായ വിശ്വാസം എന്നതുകൊണ്ട് ഇവിടെ വിവക്ഷിക്കുന്നത്.

ഈ മൂന്നു വിശ്വാസ ധാരകള്‍ക്കും അതിന്റേതായ അന്ധ-വിശ്വാസ മേഘലകള്‍ ഉണ്ട്. ഓരോ വിശ്വാസത്തിലും നിലനില്‍ക്കുവാന്‍ അതിന്റെ അനുയായികള്‍ ചോദ്യം ചെയ്യാതെ ഇവയെ അംഗീകരിക്കുകയേ വഴിയുള്ളൂ.

അടിസ്ഥാനപരമായ ചില അന്ധവിശ്വാസങ്ങള്‍ ഇവയാണ്:

1.ഏക -ജന്മ വിശ്വാസം
ബൈബിള്‍, ഖുര്‍-ആന്‍, തോറ, അല്ലെങ്കില്‍ ഏതെങ്കിലും വിശുദ്ധഗ്രന്ഥം ദൈവത്തിന്റെ വചനമാണെന്നും, തിരുത്തുവാന്‍ ആര്‍ക്കും അധികാരമില്ലെന്നും, അതില്‍ പറഞ്ഞിരിക്കുന്നത് മുഴുവനും സത്യമാണെന്നും വിശ്വസിക്കണം. തങ്ങള്‍ സൃഷ്ടിക്കപ്പെട്ടതാണെന്നും, ഒരു പ്രാവശ്യം മാത്രമേ,ഈ ഭൂമിയില്‍ ജീവിക്കുവാന്‍ അവകാശം ഉള്ളൂ എന്നും അതിനുശേഷം നിത്യ നരകം അല്ലെങ്കില്‍ നിത്യ സ്വര്‍ഗ്ഗം ലഭിക്കും എന്നും വിശ്വസിക്കണം.

2. പുനര്‍ജ്ജന്മ വിശ്വാസം
ഇവര്‍, ഭൌതിക ജനനത്തിനും മുന്‍പേ ഉണ്ടായിരുന്നു, അല്‍പ്പകാലത്തെ വാസത്തിനുവേണ്ടി ഒരു ശരീരം ലഭിച്ചിരിക്കുന്നു, അതുകൊണ്ടു തന്നെ മരണത്തിലൂടെ ഈ ശരീരം ഉപേക്ഷിക്കുമെങ്കിലും, മറ്റൊരു ശരീരത്തില്‍ ഈ പ്രപഞ്ചത്തില്‍ ഇനിയും വസിക്കുവാനെത്തുന്ന ആത്മാവാണ് എന്നും വിശ്വസിക്കുന്നു.

3. നിരീശ്വര വാദം

നിരീശ്വര വാദികള്‍ തങ്ങല്‍ക്ക് ശരീരം മാത്രമേയുള്ളൂ,എന്നു കരുതുന്നു. ഭൌതിക വസ്തുക്കളുടെ പ്രത്യേക അനുപാതത്തിലൂടെയുള്ള സങ്കലനത്തിലൂടെയോ,പരിണാമത്തിലോടെയോ, സവിശേഷബുദ്ധിയും, ജീവനും, ഈ ശരീരത്തിനു ലഭിച്ചു എന്നും മരണത്തോടെ എല്ലാം അവസാനിക്കുന്നു എന്നും വിശ്വസിക്കുന്നു.

ഊഹാപോഹത്തിലൂന്നി ജീവിക്കുന്ന മനുഷ്യകുലം.

സൂക്ഷ്മമായി പരിശോധിച്ചാല്‍ ഈ മൂന്നു വിശ്വാസങ്ങളില്‍ പൊതുവായ ചിലവയെ എടുത്തുകൊണ്ടോ, തള്ളിക്കളഞ്ഞുകൊണ്ടോ, ഇതിനുള്ളില്‍ തന്നെ അവാന്തര വിഭാഗങ്ങള്‍ ഉണ്ടെന്നു കണ്ടെത്താമെങ്കിലും, സ്ഥൂലമായി നോക്കിയാല്‍ എല്ല്ലാ മനുഷ്യരേയും ഇവ ഇതില്‍ ഏതിലെങ്കിലും പെടുത്താവുന്നതേയുള്ളൂ. മേല്‍പ്പറഞ്ഞ മൂന്നു വിശ്വാസ സംഹിതകളുടേയും ഒരു പൊതുസ്വഭാവം, ഓരോ വിശ്വാസവും മറ്റു രണ്ടിനേയും തള്ളിപ്പറയുന്നു എന്നതാണ്. മറ്റൊരു തരത്തില്‍ പറഞ്ഞാല്‍, ഒരോ വിശ്വാസം മറ്റു രണ്ടു വിശ്വാസങ്ങള്‍ക്കു ഘടക വിരുദ്ധമാണ് എന്നു കാണാം.

ചുരുക്കത്തില്‍, ഇതില്‍ ഏതെങ്കിലും ഒന്നു ശരിയായാല്‍ മറ്റു രണ്ടും തെറ്റ് ആയിരിക്കും. ഏതു ശരി ഏതു തെറ്റ് എന്നത് അവിടെ നില്‍ക്കട്ടെ.പക്ഷേ ഏതെങ്കിലും ഒന്നു ശരിയാവാതെ തരമില്ല.എന്നു വച്ചാല്‍, ഏതെങ്കിലും രണ്ടെണ്ണം തെറ്റാവാതെ നിര്‍വ്വാഹമില്ല. അതായത്,മൂന്നില്‍ ര‍ണ്ടു വിശ്വാസങ്ങള്‍ സാങ്കല്‍പ്പികമാണ്, അയദാര്‍ത്ഥമാണ്.

ആ മൂന്നില്‍ രണ്ടില്‍പ്പെടുന്ന കോടിക്കണക്കിനു മനുഷ്യരുടെ ജിവിതത്തിന്റെ അധാര വിശ്വാസങ്ങള്‍ സങ്കല്‍പ്പങ്ങളിലൂന്നിയ കെട്ടുകഥളിലാണെന്നതാണ് സത്യം!

പൊതുവെ പറഞ്ഞാല്‍ ഈ വിഷയത്തില്‍ മനുഷ്യകുലത്തിന്റെ നില പരിതാപകരമാണെന്നു സമ്മതിക്കേണ്ടി വരും!

ഇതില്‍ ഏതിലെങ്കിലും ഒന്നില്‍ വിശ്വസിക്കുക എന്നത് തീരെ ചെറിയതോ,തികച്ചും വ്യക്തിപരമോ ആയ കാര്യം മാത്രമല്ല. “ഈ ഭൂമിയെന്ന കൊച്ചു ഗ്രഹത്തില്‍ ചുരുങ്ങിയ കാലയളവ് ഞാന്‍ എങ്ങിനെ ജീവിക്കണം ?” എന്ന് നിശ്ചയിക്കുന്നത് ഈ ആധാര വിശ്വാസ ത്തെ അടിസ്ഥാനമാക്കിയാണ്. സഹജീവികളേയും, പ്രപഞ്ചത്തേയും എങ്ങിനെ നോക്കിക്കാണുന്നു എന്നതിന് ഈ വിശ്വാസങ്ങള്‍ വഹിക്കുന്ന പങ്ക് ചെറുതല്ല.

നിലപാടുകളിലും മനോഭാവങ്ങളിലും വൈരുധ്യം പുലര്‍ത്തുന്ന അനേക മേഖലകള്‍ ‍ഈ മൂന്നു വിഭാഗങ്ങളില്‍ ഉണ്ടെങ്കിലും, സാമൂഹിക പ്രതിഫലങ്ങള്‍ ഉണ്ടാക്കുന്ന പ്രധാനപ്പെട്ടവ ഇവയാണ്:

1. എന്താണ് മനുഷ്യ ജീവിതത്തിന്റെ ആത്യന്തിക ലക്ഷ്യം?
2. ഓരോരുത്തന്റെ പ്രവൃത്തിയുടെ വരും വരായ്കകള്‍ എന്തൊക്കെയാണ്?
3. ഈ ഭൂമി എന്ന ഗ്രഹത്തോടും സഹ ജീവികളോടും എത്തരത്തിലുള്ള ബന്ധമാണ് സൂക്ഷിക്കേണ്ടത്?
4. മരണ ശേഷം എന്ത്?
5. ലൈംഗികതയോടുള്ള നിലപാട്
7. പാപത്തോടുള്ള നിലപാട്
8. ഭൌതിക ശരീരത്തോടുള്ള മനോഭാവം
9. അബോര്‍ഷന്‍, ദയാവധം, വിവാഹമോചനം

ഏതായിരിക്കാം ഈ മൂന്നു വിശ്വാസങ്ങളില്‍ ശരി?

കേവല യാഥാര്‍ത്ഥ്യതിലൂന്നി ആര്‍ക്കും ഉത്തരം പറയാനാവാത്ത ചോദ്യമാണിത്.മേല്‍ പരാമര്‍ശിച്ചതുപോലെ, ഇതില്‍ ഏതു ശരി എന്നു പറയണമെങ്കിലും, പരീക്ഷിച്ചു തെളിയിക്കപ്പെടാത്ത ചില വിശ്വാസങ്ങളെ അംഗീകരി‍ക്കേണ്ടി വരും. പൊതുവേ അംഗീകരിക്കുന്നതും ബഹുഭൂരിപക്ഷവും തുടരുന്നതുമായ രീതി, ഇപ്പോള്‍ നിലനില്‍ക്കുന്ന വിശ്വാസത്തില്‍ തന്നെ തുടരുക എന്നതാണ്.അനുഭങ്ങളേയും, ചുറ്റുപാടുകളേയും അടിസ്ഥാനപ്പെടുത്തി അവനവനു യോജിക്കുന്നതു തിരഞ്ഞെടുക്കുന്ന വരും കുറവല്ല.

വിശ്വാസം തെറ്റായാല്‍?

ഈ ലേഖനത്തിന്റെ ഉദ്ദേശ്യം ഈ ചോദ്യത്തിന്റെ ഉത്തരമാണ്.ഏതെങ്കുലും ഒന്നില്‍ വിശ്വസിക്കുക്കുകയും മറ്റു രണ്ടില്‍ ഏതെങ്കിലും ഒരെണ്ണം സത്യമാവുകയും ചെയ്താല്‍ ആര്‍ക്കാണ് കൂടുതല്‍ നഷ്ടം?

ദൈവത്തില്‍ വിശ്വസിക്കുകയും, സ്വര്‍ഗ്ഗമുണ്ടെന്നു ഭയക്കുകയും, കഴിയുന്നിടത്തോളം അതിനോടു നീതി പുലര്‍ത്തി ജീവിക്കുകയും ചെയ്യുന്ന ഒരാള്‍ക്ക്, തന്റെ വിശ്വാസം തെറ്റായാലും പ്രത്യേകിച്ചു ഒന്നും നഷ്ടപ്പെടാനില്ല. മനുഷ്യര്‍ക്കും ദൈവത്തിനും കൊള്ളാവുന്ന ഒരുവനായി ജീവിച്ചാല്‍ നിരീശ്വര വാദം സത്യമായാലും, പുനര്‍ജന്മ വിശ്വാസം സത്യമായാലും, ഒന്നും നഷ്ടപ്പെടുന്നില്ല. ജീവിതകാലത്തു മുഴുവന്‍, വിശ്വാസത്തോടെ ആശ്രയിക്കുവാന്‍ ഒരു ദൈവം ഉണ്ടു താനും. ആ അശ്വാസത്തില്‍ ജീവിതം പ്രതിസന്ധികളെ നേരിടാനാവും.

പുനര്‍ജന്മത്തില്‍ വിശ്വസിക്കുകയും, നിരീശ്വര വാദം സത്യമാണെന്നും കരുതുക. കാര്യമായി ഒന്നും നഷ്ടപ്പെടാനില്ല. ഇനി ഒരു ജന്മമുണ്ടെന്ന് വിശ്വാസത്തില്‍, ജീവിത പ്രശ്നങ്ങളേയും, യാദാര്‍ത്ഥ്യങ്ങളേയും നേരിടാനാവും. പക്ഷേ, പുനര്‍ജന്മ വിശ്വാസത്തില്‍ ജീവിക്കുകയും, ഏക ജന്മ വിശ്വാസം സത്യമാവുകയും ചെയ്താല്‍, നഷ്ടം ചെറുതല്ല.

പക്ഷേ, ഏറ്റവും പരിതാപകരമായ അവസ്ഥ ആരുടെതെന്ന് അറിയാമോ? നിരീശ്വര വാദിയായി ജീവിക്കുകയും, ഏക ജന്മ വിശ്വാസം സത്യമാവുകയും ചെയ്താല്‍...ഒരിക്കലും തിരുത്താനാവാ‍ത്ത ഒരു വന്‍ വിപത്ത്- നരകത്തോളം ഭയാനകമായ ഒരു വിപത്താണ് കാത്തിരിക്കുന്നത്!

ഓര്‍ക്കുക, ഒരു പരീക്ഷണത്തിനു വേണ്ടിയായാലും, വിദൂര സാധ്യതയേ ഉള്ളൂ എങ്കിലും, നരകം കാത്തിരിക്കുന്ന വഴിയില്‍ നിന്നും മാറി നടക്കുന്നതാണ് നല്ലത്!.

അവലംബം:www.truth101.org

ക്രൂശീകരണം വെള്ളിയാഴ്ചയോ?

2009-04-12T00:31:00.003+03:00

യേശുവിനെ കുരിശില്‍ തറച്ചതു വെള്ളിയാഴ്ച് ആയിരുന്നോ?
വായിക്കുവാന്‍ ഇവിടെ ക്ലിക്കുക..

ഇടയ ലേഖനങ്ങള്‍- എന്ത്? എന്തിന്?

2009-03-30T12:42:00.009+03:00

ഇടയ ലേഖനങ്ങള്‍ എന്നു കേട്ടാല്‍ ഇടതു പക്ഷം ഹാലിളകുന്ന അവസ്ഥയില്‍ എത്തിയിരിക്കുന്നു കാര്യങ്ങള്‍!ഇടയന്മാര്‍ എന്നു വച്ചാല്‍ ഇടയുന്നവര്‍ ആണെന്നു പൊതു ജനത്തിനും തോന്നി തുടങ്ങിയിരിക്കുന്നു. എന്നാല്‍, എന്താണ് ഇടയ ലേഖനം എന്ന് സാധാരാണക്കാരന് ന്യായമായ സംശയം തോന്നാം.

ബൈബിളിലെ പുതിയ നിയമത്തില്‍ പൌലോസ് പതിമൂന്നു ലേഖനങ്ങള്‍/ കത്തുകള്‍ എഴുതിയിട്ടുണ്ട്. പോളൈന്‍ എപ്പിസല്‍ എന്നു വിളിക്കപ്പെടുന്ന ഈ പുസ്തകങ്ങളിലെ മൂന്നു ലേഖനങ്ങളെയാണ് ഇടയ ലേഖനങ്ങള്‍, അതായത് പാസ്റ്ററല്‍ എപ്പിസല്‍ എന്നു പറയപ്പെടുന്നത്.

എഫേസോസിലെ സഭാദ്ധ്യക്ഷന്‍ (ബിഷപ്പ്/എപ്പിസ്കോപ്പ)ആയിരുന്ന തിമോഥെയോസിനു എഴുതിയ ഒന്നും രണ്ടും ലേഖനങ്ങളും,ക്രേത്തയിലെ അദ്ധ്യക്ഷന്‍ ആയിരുന്ന തീത്തോസിനു എഴുതിയ ലേഖനവുമാണ് ബൈബിളിലെ ഇടയ ലേഖങ്ങള്‍. എന്നാല്‍ ഇടയ ലേഖനം എന്ന പദ പ്രയോഗം ബൈബിളില്‍ ഇല്ല. ബൈബിള്‍ പണ്ഡിതന്മാര്‍ ഈ ലേഖനങ്ങളുടെ ചില സവിശേഷകതകള്‍ മൂലം പ്രത്യേകമായി തരം തിരിച്ചു പേര് നല്‍കി എന്ന് കരുതാവുന്നതാണ്.
ഈ മൂന്നു ലേഖനങ്ങളും,ഒരോ വ്യക്തികള്‍ക്ക് എഴുതിയീരിക്കുന്ന കത്തുകളാണ്. മറ്റു പോളൈന്‍ എപ്പിസലുകള്‍ മിക്കതും പൊതുവായ ഒരു സഭയ്ക്കു എഴുതുന്ന കത്തുകളാണ്. അതുകൊണ്ട് സഭാമേലധ്യക്ഷന്മാര്‍, ഇടയന്മാര്‍ക്കു എഴുതുന്ന കത്തുകളായി ഇടയ ലേഖനങ്ങളെ കണക്കാക്കാം.

കത്തിലെ പരാമര്‍ശ വിഷയങ്ങളാണ് പ്രധാനമായൂം ഇന്നത്തെ SO-CALLED ഇടയ ലേഖനങ്ങളും, ബൈബിളിലെ ഇടയ ലേഖനങ്ങളും തമ്മില്‍ വേര്‍തിരിക്കുന്ന മുഖ്യ ഘടകം.

ഇന്നത്തെ പോലെ, സഭയില്‍ ഒരു പ്രായോഗിക പ്രശ്നം വരുമ്പോള്‍, റഫറ് ചെയ്യുവാന്‍ ബൈബിള്‍ പൂര്‍ണ്ണ രൂപത്തില്‍ ഇല്ലാതിരുന്ന ഒരു കാലഘട്ടമായിരുന്നു അത്. ക്രിസ്തുവിന്റെ ശിഷ്യന്മാരോടോ, അപ്പോസ്തോലന്മാരോടോ എഴുതി ചോദിക്കുന്ന ഒരു രീതി ആയിരുന്നു മിക്ക പ്രാദേശിക സഭയിലും അന്നു ഉണ്ടായിരുന്നത്. ക്രിസ്തുവിനു ശേഷമുള്ള ആദ്യനൂറ്റാണ്ടില്‍ സഭയ്ക്കു പരിചയവും, പാരമ്പര്യവും ഇല്ലാതിരുന്നതിനാല്‍, യഹൂദാ അചാരങ്ങളുടെ സ്വാധീനവും, പ്രാദേശിക വിശ്വാസങ്ങളും നിമിത്തം പല സംശയങ്ങള്‍ പുതിയ വിശ്വാസികളില്‍ ഉണ്ടായിവന്നു. ചില തെറ്റായ പഠിപ്പിക്കലുകള്‍ കടന്നു കൂടുകയും ചെയ്തു. ഇത്തരം സാഹചര്യത്തില്‍, സഭയ്ക്കുള്ളിലെ ശിക്ഷണ നടപടികള്‍ (Disciplinary Action)ശിക്ഷാ നടപടികള്‍ (Punishment), വിശ്വാസം ക്ഷീണിച്ചു പോകുന്നവര്‍ക്കുള്ള പ്രബോധനം (Exhortation) എന്നിവയാണ് ബൈബിളി‍ലെ ഇടയ ലേഖനങ്ങളുടെ പ്രതിപാദ്യ വിഷയങ്ങള്‍.

എന്നാല്‍ ഇന്നു കാണുന്ന ഇടയ ലേഖനങ്ങളുടെ വിഷയം ഏറക്കുറെ പൂര്‍ണ്ണമായും രാഷ്ട്രീയ കാര്യങ്ങളാണ്. ആത്മീയ വിഷയങ്ങളേക്കാള്‍, രാഷ്ട്രീയ കാര്യങ്ങളില്‍ ക്രൈസ്തവ സഭകള്‍ ഇടപെട്ടു തുടങ്ങിയത് ഇന്നും ഇന്നലെയൊന്നുമല്ല. നാലാം നൂറ്റാണ്ടിലെ, റോമിലെ കോണ്‍സ്റ്റന്റൈന്റെ കാലത്തോളം അതിനു പഴക്കം ഉണ്ട്. ക്രിസ്തു ഒരു രാജ്യം സ്ഥാപിക്കാന്‍ ആണ് വന്നതു എന്നു കൂടെ കൂടെ പറയുമായിരുന്നു. എന്നാല്‍ അതിനെ പറ്റി ഒരു വിശദീകരണം അന്ത്യ ദിനങ്ങളില്‍ യേശു നടത്തുന്നത് ഇങ്ങനെയാണ് “എന്റെ രാജ്യം ഐഹിക (ഇഹത്തിലുള്ളതു) അല്ല”.

വ്യക്തമായ നിശ്ചയിക്കപ്പെട്ട ഒരു ജീവിത കാലയളവും, അതിനുള്ളില്‍ ചെയ്തുതീര്‍ക്കുവാന്‍ ഒരുപിടി കാര്യങ്ങളുമായിട്ടാണ് യേശു ഈ ലോകത്തില്‍ വന്നത്. ഒരു മിനിറ്റ് പോലും പാഴാക്കുവാന്‍ ഉണ്ടായിരുന്നില്ല. എല്ലാം കൃത്യ സമയത്തി പൂര്ണ്ണതയോടെ തീര്‍ത്ത യേശു കുരിശില്‍ കിടന്നു കൊണ്ടു “എല്ലാം പൂര്‍ത്തിയായി (യോഹ:19: 30)“ എന്നു പറയുമ്പോള്‍ വെറും മുപ്പത്തി മൂന്നു വയസ്സു കഴിഞ്ഞതേ ഉണ്ടായിരുന്നുള്ളൂ.ആ തിരക്കു പിടിച്ച ജീവിതത്തിടയില്‍, ഈ ലോകത്തിലുള്ള ഒരു രാജ്യത്തിലും, രാഷ്ട്രീയ വിഷയങ്ങളിലും യേശുതാല്‍പ്പര്യം ഉള്ളവനായിരുന്നില്ല.

യേശുവിനെയും പൌലോസിനേയും പോലെ,ഇഹത്തിലെ രാഷ്ട്രീയ കാര്യങ്ങളില്‍ താല്പര്യമില്ലാത്തവരല്ല ഇന്നത്തെ മത മേലദ്ധ്യക്ഷന്മാര്‍.അതിനു പല വിശദീകരണങ്ങള്‍ കണ്ടു പിടിക്കാന്‍ പറ്റിയേക്കാം.

എന്നാല്‍, വൈര്യനിര്യാതനത്തിനും, സ്വജന പക്ഷപാദിത്വത്തിനും വേണ്ടി പടച്ചു വിടുന്ന ഈ വാറോലകളെ, ഇടയ ലേഖനങ്ങള്‍ എന്ന പേര് വിളിക്കാതിരുന്നെങ്കില്‍ നന്നായിരുന്നു. ശത്രുക്കളെ സ്നേഹിക്കുവാനും, ഉപദ്രവിക്കുന്നവര്‍ക്കു വേണ്ടി പ്രാര്‍ത്ഥിക്കുവാനും പഠിപ്പിച്ച നമ്മുടെ നല്ല ഇടയന്‍, ഇത്തരം ഇടയ ലേഖനങ്ങളില്‍ പ്രസാദിക്കുകയില്ല എന്നു അറിഞ്ഞിരുന്നെങ്കില്‍ കൊള്ളാമായിരുന്നു.

മജീഷ്യന്‍ പാസ്റ്റര്‍ക്കുള്ള മറുപടി

2009-03-13T10:11:00.005+03:00

(ചില നാളുകള്‍ക്കു മുന്‍പ് സെനു എന്ന ബ്ലോഗ്ഗര്‍ മജീഷ്യന്‍ പാസ്റ്ററ് എന്ന പേരില്‍ ഒരു പോസ്റ്റ് ഇടുകയുണ്ടായി.
ആ വിഷയത്തേ സംബന്ധിച്ചു ഒരു പോസ്റ്റ് ഇടണമെന്നു വിചാരിക്കാന്‍ തുടങ്ങിയിട്ടു കുറേ ദിവസങ്ങളായെങ്കിലും കഴിഞ്ഞില്ല.അതുകൊണ്ട്, ഞാന്‍ അതില്‍ ഇട്ടിരുന്ന മൂന്നു കമെന്റുകള്‍ ചേറ്ത്ത് ഒരു പോസ്റ്റ് ആക്കുന്നു..)

ഇത്തരം പോസ്റ്റുകള്‍ വായിക്കേണ്ടി വരാറുണ്ടെങ്കിലും സാധാരണ കമെന്റ് ഇടാത്ത ഒരു പെന്തകോസ്തുകാരനാണ് ഞാന്‍.

യേശു പറഞ്ഞു “ഒരാള്‍ക്കു രണ്ടു യജമാനന്മാരെ സേവിപ്പാന്‍ കഴിയുകയില്ല.” ഈ രണ്ടു യജമാനന്മാര്‍ ഒന്നു ദൈവവും, മറ്റൊന്നു മമ്മോന്‍ (money, meterial things)യും ആണ്.(luk-16:13) പണത്തെ സ്നേഹിക്കുന്നവന്‍ ദൈവത്തെ സ്നേഹിക്കുന്നു എന്നു അഭിനയിക്കാന്‍ കഴിയും. പണത്തെ സ്നേഹിക്കുന്ന, ആശ്രയിക്കുന്ന ഒരാള്‍ക്കും ദൈവത്തെ സ്നേഹിക്കാന്‍ കഴികയില്ല- സത്യം.

സ്വന്തപ്രയോജനത്തിനു വേണ്ടി ബൈബിള്‍ ഉപയോഗിക്കുന്നവര്‍ ക്രിസ്തുവിന്റെ ശത്രുക്കള്‍ ആണ്- (അതു ധന സമ്പാദനമോ, പ്രശസ്തിയോ അംഗീകാരമോ, ഇഷ്ടമില്ലാത്തവരെ പരിഹസിക്കുകയോ- എന്തു തന്നെയും ആയിക്കൊള്ളട്ടെ)

ബൈബിള്‍ 100% ദൈവത്തിന്റെയാണ്, ദൈവത്തിന്നുള്ളതാണ്. ആ നിലയില്‍ ബൈബിളിനെ കാണുന്നവന്റെ കാര്യങ്ങള്‍ നോക്കാന്‍ ദൈവം ബാധ്യസ്തനും ആണ്. മറിച്ചു ബൈബിളുമായി ജീവിക്കാന്‍ ഇറങ്ങിയവര്‍ക്കു അയ്യോ കഷ്ടം!

അവര്‍ തന്നെ ക്രിസ്തുവിനെ വീണ്ടും വീണ്ടും ക്രൂശിക്കുകയും, പരിഹാസികള്‍ക്കു ആര്‍ത്തു ചിരിക്കാന്‍ വക ഒരുക്കി കൊടുക്കയും ചെയ്യുന്നു.

ഒരിക്കല്‍, ദൈവത്തെ മാത്രം സ്നേഹിച്ചു, വിശ്വസിച്ച ഈ പുത്തങ്കൂറ്റുകാര്‍, ഇന്നു ആറ്ക്കും കാറിത്തുപ്പുവാനുള്ള കോളാമ്പി ആയിപ്പോയല്ലോ!
ഇതിനു മറ്റാരും ഉത്തരവാദികള്‍ അല്ല!

ഇതിനു ഒരു കാരണം ഉണ്ടു കെട്ടോ- ആരും പത്തു പൈസക്കു കള്ളനോട്ടു അടിക്കാറില്ലല്ലോ?
മൂല്ല്യമുള്ളതിനേ counterfeit ഇറങ്ങാറുള്ളൂ. ഒറിജിനലുമായി തിരിച്ച് അറിയാന്‍ കഴിയാറില്ല എന്നതാണ് കള്ള നാണയങ്ങളുടെ വിജയവും! പക്ഷേ, കള്ളനാണയങ്ങളാണ്, ചന്തയില്‍ കൂടുതല്‍ എന്നത്, അന്ത്യകാല ലക്ഷണമായി കരുതി സമാധാനിക്കുകയേവകയുള്ളൂ.

ദൈവം തിരഞ്ഞെടുത്ത യിസ്രായേലിന്റെ ആദ്യത്തെ രാജാവായിരുന്നു ശൌല്‍. പക്ഷേ, അദ്ദേഹം പിന്നീട് തെറ്റിപ്പോയി, വലിയ പാപിയിതീര്‍ന്നു, മരിച്ചു. തുടര്‍ന്നു രാജാവായ ദാവീദ് ഇതെല്ലാം അറിഞ്ഞു ഹൃദയ നുറുങ്ങി പാടുന്ന ഒരു പാട്ട് ബൈബിളില്‍ ഉണ്ട് ,
അതിങ്ങനെയാണ്:-

“യിസ്രായേലേ, നിന്റെ പ്രതാപമായവര്‍, നിന്റെ ഗിരികളില്‍ നിഹിതന്മാര്‍ ആയി: വീരന്മാര്‍ പട്ടു പോയതു എങ്ങിനെ?
ഗത്തില്‍ അതു പ്രസിദ്ധമാക്കരുതേ.....
അസ്കലോന്‍ വീഥികളില്‍ ഘോഷിക്കരുതേ...
ഫെലിസ്ത്യ പുത്രിമാര്‍ സന്തോഷിക്കരുതേ.. അഗ്രചര്‍മ്മികളുടെ കന്യകമാര്‍ ഉല്ലസിക്കരുതേ....”(2 ശമുവേല്‍ 1:19)

ഈ ബ്ലോഗിലെ വര്‍ത്തമാനം വായിക്കുന്ന, പണത്തെ സ്നേഹിക്കുന്ന ഏതെങ്കിലും സുവിശേഷപ്രവര്‍ത്തകര്‍ ഉണ്ടെങ്കില്‍ ഓര്‍ത്തുകൊള്ളുക- നിങ്ങള്‍ നിമിത്തം ദുഷിക്കപ്പെടുന്ന ഒരു വിശുദ്ധ നാമമുണ്ട്, ദൈവപുത്രന്റെ.

ക്രിസ്തുവിനെ ലോകം ഒരിക്കലും അംഗീകരിച്ചിട്ടില്ല,യേശു അതു ആഗ്രഹിച്ചിട്ടും ഇല്ല. പക്ഷേ, പണക്കൊതിയന്മാരെ, സുവിശേഷകന്മാരെ, നിങ്ങള്‍ മൂലം ആ നാമം ദുഷിക്കപ്പെടുന്നു എങ്കില്‍, നിങ്ങള്‍ക്കു അയ്യോ കഷ്ടം!

ഇത്തരം വഞ്ചനയില്‍ എന്തുകൊണ്ട് വിശ്വാസികള്‍ പെട്ടുപോകുന്നു? ഇത്തരം (സെനു പറഞ്ഞ ആളെ എനിക്ക് അറിയില്ല) ആളുകളെ എന്തുകൊണ്ട് തിരിച്ച് അറിഞ്ഞു ഒറ്റപ്പെടുത്തുന്നില്ല? ക്രിസ്ത്യാനികള്‍ അല്ലാത്തവര്‍ക്ക് അബദ്ധം പറ്റുന്നത് മനസിലാക്കാം! മറുള്ളവരെ ഭയപ്പെടുത്തി പണം പിടുങ്ങുന്ന സുവിശേഷ വ്യാപാരികളെ ചാട്ടവാര്‍ കൊണ്ടു പുറത്താക്കാന്‍ ക്രിസ്തുവിനെ എന്തുകൊണ്ട് മാത്രുകയാക്കുന്നില്ല?

ഉത്തരം ലളിതം!

ബഹുഭു‌രിപക്ഷം ക്രിസ്ത്യാനികള്‍ക്കും ഇത്തരം അപ്പോത്തിക്കിരികളെ വേണം! ജീവിതം തന്നെ വിലയായി കൊടുത്തു വാങ്ങേണ്ടതാണ് ക്രിസ്തുവിന്റെ ശിഷ്യത്വം, അല്ലാതെ 10 ദിനാര്‍ കൊടുത്തു വാങ്ങേണ്ടതല്ല! ദൈവമുമായി നിരന്തരമായ ബന്ധത്തില്‍ ജീവിക്കാന് ഒരു വലിയ വില കൊടുക്കേണ്ടി വരും. ഒത്തിരി ഇഷ്ടാനിഷ്ടങ്ങള്‍ മുന്‍‌ഗണനകള്‍ ഒക്കെ മാറ്റിവയ്ജേണ്ടി വരും.

(എന്റെ ചുമടു ലഘുവും ,എന്റെ നുഖം മൃദുവുമാണെന്ന് ആണ് യേശു പഠിപ്പിച്ചത്.(മത്തായി 11:30) എത്ര മൃദുവാണെങ്കിലും ശിഷ്യത്വം എന്നു പറയുന്നത് ഒരു നുഖം തന്നെയാണ്. ആ നുഖത്തിനു കീഴില്‍ ഈ ലോകത്തെ ജയിച്ചവനായ യേശുവും ജീവിത പ്രശ്നങ്ങള്ക്കു മുന്പില് പകച്ചു പോയ ഞാനും! ഇങ്ങനെ , പരിശീലിക്കാത്ത ഉഴവു മൃഗം പരിശീലനം സിദ്ധിച്ച ഒന്നിനോടൊപ്പം ഒരേ നുഖത്തിന്റെ കീഴില് നടത്തുന്ന ഒരു യാത്രയാണു ക്രിസ്തീയ ജീവിതം. അപ്പോള്, ക്രിസ്തു നില്ക്കുന്നുടത്തില് ഞാനും നില്ക്കേണ്ടി വരും. രോഗികളുടെയും, അനാഥകളുടെയും അഗതികളുടെയും അടുത്തൊക്കെ …യേശു നില്ക്കാത്തിടത്ത് എനിക്കും നില്ക്കാന് കഴിയില്ല. ആരെങ്കിലും എന്നെ അപമാനിച്ചാല്‍ ഉടനെ പ്രതിരിക്കാന്‍ പറ്റിയെന്നു വരികയില്ല. പാരവെച്ചു ജോലി ക്കയറ്റം നേടാന്‍ കഴിയില്ല.ഒരിക്കലും, ഒരിക്കലും, പ്രസംഗിച്ചോ, രോഗം മാറ്റിയൊ, പണം സമ്പാദിക്കാന്‍ കഴിയില്ല.എന്തിനു,തൊട്ടു മുന്‍പില്‍ വണ്ടി ഓടിക്കുന്നവന്‍ സൈഡു തന്നില്ലെങ്കില്‍ തല വെള്യില്‍ ഇട്ടു കോക്രി കാണിക്കനും പറ്റിയില്ലെന്നു വരാം, ഇത്തരം ക്കൊച്ചു കാര്യങ്ങളില്‍ നിന്നാണു ക്രിസ്ത്യാനിത്വം ആരഭിക്കുന്നത്. അല്ലാതെ മൈക്കിനു മുന്‍പില്‍ നിന്നല്ല! ഇതു ഒരു വലിയ വില കൊടുക്കേണ്ട ഏര്പ്പാടാണ്.)

ലോകത്തിന്റെ പല ലോജിക്കും ആ ജീവിതത്തില് ആപ്പ്ലിക്കബിള് ആല്ല!

അതിന് ഒന്നും മനസില്ലാതെ ഭാവി ഭൂത വര്‍ത്തമാനങ്ങള്‍ അറിയാനും, രോഗം മാറാനും ചെല്ലുന്നവര്‍ വഞ്ചിക്കപ്പെടാന്‍ നിഴ്ചയമായും അര്‍ഹര്‍ തന്നെ. ബൈബിള്‍ മനസിലാക്കാന്‍ മനസില്ലാതെ, മനസിലായത് അനുസരിച്ച് ജീവിക്കാന് ഒരല്പം പോലും ശ്രമിക്കാതെ രോഗ സൌഖ്യത്തിന്റെ പോസ്ടറ് കണ്ടു യോഗത്തിനു പോകുന്ന ക്രിസ്ത്യാനി വഞ്ചിക്കപ്പെട്ടെ മതിയാകൂ! ഹവ്വ പഴം പറിച്ചു തിന്നപ്പോഴും, ആദം മരത്തിലേക്ക് കൈ നിട്ടിയപ്പോഴും മൌനമായിരുന്ന ദൈവം, പണമോഹികളായ സുവിശേകന്മാരുടെ അടുക്കല്‍ വിശ്വാസികള്‍ പോകുന്നത് കണ്ടു മൌനമായിരിക്കുന്നതില്‍ അത്ഭുതം ഇല്ലേയില്ല.They deserved to be decieved!

അക്രൈസ്തവര്‍ ഇതില്‍ പെട്ടു പോകുന്നതിലോ?
നമ്മള്‍ മറൂപടിയേണ്ടി വരുമെന്നു ഞാന്‍ ഭയക്കുന്നു!

അവസാനമായി, ഇത്തരം കാര്യങ്ങള്‍ കണ്ടും കേട്ടും, വായിച്ചും, ക്രിസ്ത്യാനിത്വത്തെ /ക്രുസ്തുവിനെ, വെറുത്തുപോകുന്ന അക്രൈസ്തവരെ, സ്വര്ഗ്ഗം വിട്ടു ഭൂമിയിലെ ഒരു ദരിദ്ര ആശാരിയുടെ വീട്ടില് 30 വര്ഷക്കാലം ജീവിച്ചവനാണ് യേശു!. ഏതു രാജകൊട്ടാരത്തില് വേണമെങ്കിലും യേശുവിനു ജനിക്കാമായിരുന്നു..പക്ഷേ, ഒരിക്കലും പണമോ, സുഖ സൌകരങ്ങളിലുള്ള ആഗ്രഹമോ ക്രിസ്തുവിനില്ലായിരുന്നു. ബൈബിള് പറയുന്നു “ അവനിൽ വസിക്കുന്നു എന്നു പറയുന്നവൻ അവൻ നടന്നതുപോലെ നടക്കേണ്ടതാകുന്നു“ (1 യോഹ. 2:6). ലളിതമായി പറഞ്ഞാല് ഇതാണ് ഒരു ക്രിസ്ത്യാനിയുടെ ജീവിത തത്വം!

ഏതു ഉദ്ദേശത്തോടെ യേശു ഈ ഭൂമിയില് ജീവിച്ചോ, എന്തു താല്പര്യത്തോടെ രോഗികളെ സൌഖ്യമാക്കിയോ, എന്തിനെയെല്ലാം ഉപേക്ഷിച്ചിരുന്നോ- അതെല്ലാം ക്രിസ്തു ശുഷ്യര് ക്കു ബാധകമാണ്. ആല്ലാത്തവര് ക്രിസ്ത്യാനികള് നമ്മള് വിളിച്ചേക്കാം. But heaven never certify them are Christians.

ഒരാള് ക്രിസ്തുവിന്റെ പേരില് എന്തു ചെയ്യുന്നു എന്നതിനേക്കാള്‍ എന്തിനുവേണ്ടി ചെയ്യുന്നു എന്നാതാണു മുഖ്യം. പണ സമ്പാദനമോ, പ്രശസ്തിയോ, ക്രൈസ്ത്വ പ്രവര്ത്തനത്തിന്റെ പരോക്ഷ ഉദ്ദേശമെങ്കിലും ആണെങ്കില്‍, സംശയിക്കേണ്ടിയിരിക്കുന്നു.

യേശു ജനിച്ചിരിക്കുന്നു എന്ന വാര്ത്ത കിഴക്കുള്ള മൂന്നു വിദ്വാന് മാര്‍ (രാജാക്കന്മാര് എന്നു ഇന്നും പലരും തെറ്റായി ധരിച്ച് വച്ചിരിക്കുന്നു) അറിഞ്ഞിട്ടു ഉണ്ണിയേശുവിനെ കാണുവാന്‍ പുറപ്പെട്ടു.
ഒരു നക്ഷ്ത്രം അവര്ക്കു വഴികാട്ടിയായി ആകാശത്തില്‍ ഉദിച്ചു. എന്നാല്‍ അവര്‍ രാജകൊട്ടാരം കണ്ടപ്പോള്‍ റൂട്ടു മാറ്റി. വെറും ന്യായമായ ഒരു ലോജിക്. രാജാവിനെ അനേഷിച്ചല്ലേ ഇറങ്ങിയത്? കോട്ടാരത്തില്ലേ കാണുക? അവര്‍ കൊട്ടാരത്തില്‍ കയറി. വലിയ ദര്ശനം കണ്ട് ഇറയിങ്ങവര്‍ പലരും ഇന്നു ഹെരോദാവിന്റെ കൊട്ടാരത്തിലെ വിരുന്നു ശാലയില്‍ ഇരിക്കുകയാണ്.
(ശലോമിയുടെ ഡാന്സ് കണ്ട് രസിക്കുന്നവരും കുറവല്ല)
പക്ഷേ, അങ്ങു ബേദ്ലഹേമില്, പശുത്തൊട്ടിയില്‍, യേശു കിടക്കുന്നുണ്ടായിരുന്നു…

(യേശു ജനിച്ചതു പശു തൊട്ടിയില്‍ അല്ല! “അവൾ ആദ്യജാതനായ മകനെ പ്രസവിച്ചു, ശീലകൾ ചുറ്റി വഴിയമ്പലത്തിൽ അവർക്കും സ്ഥലം ഇല്ലായ്കയാൽ പശുത്തൊട്ടിയിൽ കിടത്തി“ ലൂക്കോ-2:7 )
വഴിയില്‍ വചായിരിക്കണം പ്രസവിച്ചത്. പിന്നീട് ആദ്യം പോയതു വഴിയംബലത്തില്‍ ,അവിടെ ഇടം കിട്ടിയില്ല, അവസാനം പശുത്തൊട്ടിയില്‍ കൊണ്ടുപോയി കിടത്തി)

കൊട്ടാരത്തില്‍ നിന്നും ഇറങ്ങിയപ്പോള്‍ നക്ഷ്ത്രം വീണ്ടും അവര്ക്കു വഴികാട്ടിയായി..

കൊട്ടാരം കെട്ടാനുള്ള/ കൊട്ടാരത്തില്‍ പാര്ക്കാനുള്ള മോഹത്തില്‍ നിന്നും സുവിശേഷ പ്രവര്ത്തകര്‍(എങ്കിലും) ഒന്നു മോചിതരായെങ്കില്‍?

മതപരിവര്‍ത്തനം ആകാമോ?

2008-11-06T11:52:00.003+03:00

ഭാരതത്തിലെ സുഖിമാന്മാര്‍ ആയ ക്രിസ്ത്യാനികള്‍ ആകെ പരിഭ്രാന്തര്‍ ആയിരിക്കുകയാണ്.
ക്രിസ്ത്യാനികളുടെ ഉപദേശവും ജീവിതവും തമ്മിലുള്ള ബന്ധമില്ലായ്മ വീണ്ടും പുറത്തു വന്നിരിക്കുന്നു.ഒറിസ്സയിലും ചില ദക്ഷിണേന്ത്യന്‍ സംസ്ഥാനങ്ങളിലും ക്രൈസ്തവ വിരുദ്ധര്‍ ണ്ടത്തുന്ന നര നായാട്ട് പരിഷ്ക്രുത സമൂഹം അപലപിക്കേണ്ടതാണ്, ഒറ്റപ്പെടുത്തേണ്ടതാണ്.
എന്നാല്‍ ഒരു ക്രിസ്ത്യാനി ഇത്തരം സാഹചര്യങ്ങളെ എങ്ങിനെ നേരിടണം?
പുതിയ നിലപാടുകള്‍ എടുക്കുവാന്‍, ഇത്തരം സാഹചരങ്ങള്‍ ക്രിസ്ത്യാനിക്കു പുതിയ അനുഭവമാണോ? ഒരു ക്രിസ്തു ഭക്തനെ സംബന്ധിച്ചു ഈ സാമൂഹിക സാഹചര്യങ്ങള്‍ ഞെട്ടിക്കുന്നതാണോ?

ഒരിക്കലും അല്ല. “ലോകത്തില്‍ നിങ്ങള്‍ക്കു കഷ്ടം ഉണ്ട്“ എന്നു പറഞ്ഞു തന്നെയാണ് യേശു തന്റെ ശിഷ്യന്മാരെ ചേര്‍ത്തത്.അല്ലാതെ സുഖ സുഭിക്ഷമായ ഒരു ജീവിതം യേശു നയിച്ചില്ല, തന്നെ പിന്തുടരുന്നവര്‍ക്കു വാഗ്ദാനം നല്‍കിയതും ഇല്ല.എന്നാല്‍ ഇന്നു എല്ലാ പ്രശ്നങ്ങള്‍ക്കും പരിഹാരം നല്‍കുന്ന അലാവ്വുദീന്റെ വിളക്കായിത്തീര്‍ന്നു ക്രൈസ്തവ കന്‍വെന്‍ഷന്‍‍‍ വേദികള്‍! അനുഗ്രഹങ്ങളുടെ ചില്ലറ വില്പന ശാലകള്‍!!

ഒന്നാം നൂറ്റാണ്ടിലെ ക്രൈസ്തവ പിതാക്കന്മാര്‍, കൊടിയ പീഡനത്തില്‍കൂടിയാണ് കടന്നു പോയത്. ഭരണ ഘടനയുടെ ആനുകുല്യമോ, സര്‍ക്കാരിന്റെ സഹായമോ അവര്‍ക്കു പ്രതീക്ഷിക്കുവാന്‍ ഉണ്ടായിരുന്നില്ല.
ഈര്‍ച്ചവാളാല്‍ അറുത്തും, വിശന്നിരുക്കുന്ന സിംഹങ്ങള്‍ക്കു ക്രിസ്തുമത പ്രചാരകരെ എറിഞ്ഞുകോടുത്തും അക്കാലത്തെ ഭരണകര്‍ത്താക്കള്‍ ഈ ‘ജാതിയെ’ ഇല്ലാതെ ആക്കുവാന്‍ നോക്കി.വിശ്വാസികളെ വിളക്കു കാലിന്മേല്‍ കെട്ടിയിട്ടു, മെഴുകില്‍ മുക്കിയ ശീല കൊണ്ടു ചുറ്റി തീ കോളുത്തി, ആ വെളിച്ചത്തില്‍ നാടകം കാണുമായുരുന്നു, കുപ്രസിദ്ധനായ നീറോ ചക്രവര്‍ത്തി. അന്നൊക്കെ അവരെ ശക്തിപ്പെടുത്തിയത്, “ലോകത്തില്‍ നിങ്ങള്‍ക്കു കഷ്ടം ഉണ്ട്” എന്ന യേശുവിന്റെ വാക്കുകള്‍ ആയിരുന്നു.
എല്ലാ വേദിയുലും നല്ല സ്വീകരണവും, സമൂഹത്തില്‍ ആദരവും കാംഷിച്ചു തുടങ്ങിയപ്പോള്‍ തന്നെ ക്രിസ്തു മത പ്രചാരകര്‍ ലക്ഷ്യത്തില്‍ നിന്നും മാറിത്തുടങ്ങിയിരുന്നു. നല്ലതു മാത്രം ചെയ്തിരുന്ന യേശുവിനു ഒരിക്കലും സമൂഹത്തില്‍ ഒരു അംഗീകാരം ലഭിച്ചില്ലായിരുന്നു എന്നത് എല്ലാവരും മറന്നു. മ്മത്രമല്ല ലോകത്തിനു മുന്‍പില്‍ യേശു ഒരു പരാജയപ്പെട്ട രാജാവായിരുന്നു. തന്റെ പീഡന സമയത്തു മൂന്നര വര്‍ഷം കൂടെ നടന്ന ഒരു ശിഷ്യന്‍പോലും കൂടെ നിന്നില്ല. അവസാനം പത്രോസും യേശുവിനെ തള്ളിപ്പറഞ്ഞു ഒറ്റപ്പെടുത്തിക്കളഞ്ഞു.

കാല്‍‌വറിയില്‍, പരാജയപ്പെട്ടു, നഗ്നനായി,കള്ളന്മാരുടെ കൂട്ടത്തില്‍ മരിച്ചുകിടക്കുന്ന യേശിവിനെയാണ് ലോകം അവസാനമായി കണ്ടത്!ആ യേശിവിനെ പിന്‍പറ്റുന്നര്‍ ചെന്നു ചേരേണ്ടസ്ഥലം അതേ കുരിശിന്റെ ചുവട്ടില്‍ തന്നെയാണ്. അതേ പീഡനത്തിന്റെ വഴി തന്നെയാണ് ക്രിസ്തു ശിഷ്യര്‍ക്കു വാഗ്ദാനം ചെയ്തത്.എതിര്‍വശത്ത്, ഹിന്ദു വര്‍ഗ്ഗീയ വാദികളൊ,മുസ്ലീം മത മൌലിക വാദികളോ, യഹൂദന്മാരോ, കമ്മൂണിസ്റ്റുകളോ ആരും ആയേക്കാം. അത് ആരാണ് എന്നതോ, അവര്‍ ഉയര്‍ത്തുന്ന വാദഗദികള്‍ എന്ത് എന്നതൊ പ്രസകതിയും ഇല്ലാത്ത കാര്യങ്ങള്‍ ആണ്.

അല്ലെങ്കില്‍ ത്തന്നെ യേശുവിനെ കുരിശില്‍ത്തറക്കണം എന്നു പറഞ്ഞവര്‍ക്ക് എന്താണ്‍ ഒരു കാരണം പറയുവാന്‍ ഉണ്ടായിരുന്നത്? പക്ഷേ, ഭൂരി പക്ഷം അവര്‍ ആയിരുന്നു എന്നത് ആണ് വേദനിപ്പിക്കുന്ന സത്യം.

മത പരിവര്‍ത്തനം ആകാമോ? എന്നതാണ് ഇപ്പോഴത്തെ ഒരു പ്രധാന ചര്‍ച്ചാ വിഷയം! ഒരു ക്രിസ്ത്യാനിയെ സംബന്ധിച്ചടത്തോളം ഇതു ചര്‍ച്ച ചെയ്ത് ഒത്തു തീര്‍പ്പിലെത്തേണ്ട ഒരു ഒരു വിഷയമല്ല. “ആകയാല്‍ നിങ്ങള്‍ പുറപ്പെട്ടു,പിതാവിന്റെയും പുത്രന്റേയും പരിശുദ്ധാത്മാവിന്റേയും നാമത്തില്‍ സ്നാനം കഴിപ്പിച്ചും, സകല ജാതികളെയും ശിഷ്യരാക്കുവിന്‍”(മത്തായി 28: 19-20) എന്നത് ക്രിസ്തുവിന്റെ അവസാനത്തെ കല്‍പ്പന്നെയാണ്. ഇതു ഒരുപക്ഷേ, ചില രാജ്യത്തെ നിയമങ്ങള്‍ക്കും, ഭരണഘടനക്കും എതിരായിരുന്നേക്കാം.സാമൂഹിക ആചാരങ്ങള്‍ക്കൊ, മറ്റു മത വിശ്വാസങ്ങള്‍ക്കൊ ചേരുന്നത് അല്ലായിരിക്കാം. എന്നാല്‍, ഈ ദൌത്യത്തില്‍ നിന്നും ഒഴിഞ്ഞിരിക്കാന്‍ ഒരു ക്രിസ്ത്യാനിക്കും കഴിയില്ല. അപ്പോല്‍ പരിണിത ഫലങ്ങളോ? അനുഭവിക്കണം അത്രതന്നെ!! അതാണു ക്രിസ്തുവും , ശിഷ്യന്മാരും ചെയ്തത്. ദേഹത്തെ കൊല്ലുന്നവരെ ഭയപ്പേടേണ്ട എന്നാണ് ക്രിസ്തു പഠിപ്പിച്ചത്. കണ്ണിരും ദിഖവും നിറഞ്ഞ ഈ ഹ്രുസ്വ ജീവിതമല്ല ബൈബിളിന്റെ പ്രതിപാദ്യ വിഷയം. ഈ ജീവിതത്തിലെ സുഖ സൌകര്യങ്ങള്‍ എങ്ങിനെ വര്‍ദ്ധിപ്പിക്കാം എന്നതും അല്ല, ക്രൈസ്തവ ഉപദേശത്തിന്റെ കാതല്‍. എങ്ങിനെയൊക്കെ ജീവിച്ചാലും ഒരു ദിവസം നിനച്ചിരിക്കാത്ത നേരത്തു ക്ഷണിക്കപ്പെടാത്ത അഥിതിയായി മരണം നമ്മെ പിടികൂടും.എന്നാല്‍ അതു ഒന്നിന്റേയും അവസാനമല്ല എന്നാണ് ക്രിസ്ത്യാനിയുടെ പ്രത്യാശ.

മറിച്ചു ഒറിസ്സയിലെപ്പോലുള്ള സംഭവങ്ങള്‍ ഉണ്ടാവുമ്പോല്‍, മത പരിവര്‍ത്തനം തെറ്റാണ്, അതു ചെയ്യേണ്ടതില്ല എന്നു പറയുന്നവര്‍, ആരായാലും,അവര്‍ക്കു ക്രിസ്തുവിനെ അറിയില്ല, ക്രിസ്തുവിന്റെ ഉപദേശവും അറിയില്ല.ഒന്നാം നൂറ്റാണ്ടിലെ ക്രിസ്ത്യാനികള്‍ അങ്ങനെ വിചാരിച്ചിരുന്നുഎങ്കില്‍ ഇന്നു ഭൂമിയുടെ മുഖത്ത് ഒറ്റ ക്രിസ്ത്യാനിയും ഉണ്ടാകുമായിരുന്നില്ല. അനേകര്‍ കനത്ത വിലകൊടുത്തു സംരക്ഷിച്ചതാണ് ഈ വിശ്വാസം. ഇക്കാലത്തും സ്വന്ത ജീവനെ നോക്കാതെ ക്രിസ്തുവുന്റെ കല്‍പ്പനകളെ പ്രമാണിക്കുന്നവരെയാണ് ക്രിസ്തുവിന് ആവശ്യം.

എന്നാല്‍ ഉപദ്രവിക്കുന്നവരോട് എന്ത് നിലപാട് എടുക്കണം എന്നതു വളരെ പ്രധാനപ്പെട്ട വിഷയമാണ്. അതിന് ക്രിസ്തുവിനേക്കാള്‍ നല്ല മാത്രുക ഇല്ല! തന്നെ മരക്കുരിശുനോട് ചേര്‍ത്തു വച്ചു ആണിയടിച്ചവര്‍ക്കു വേണ്ടി പ്രാര്‍ത്ഥിച്ച ക്രിസ്തുവിനെ മാത്രുകയാക്കുകയാണു ക്രിസ്ത്യാനിയുടെ വഴി.

5.പാഠ പുസ്തകം - എവിടെയാണ് ശരി?

2008-07-08T11:20:00.002+03:00

പാഠ പുസ്തക സംബന്ധിയായ നടക്കുന്ന കോലാഹങ്ങള്‍ എല്ലാവരും കണ്ണു നിറച്ചു കാണുകയും ഇതിനകം സ്വന്തമായ നിലപാടുകളില്‍ എത്തിച്ക്ഗേരുകയും ചെയ്തിട്ടുണ്ടാകും.

ഒരു സാധാരണകാരനായ ഞാനും ആരാണ് ഈ വിവാദങ്ങളുടെ ഇരു പക്ഷത്തും എന്നു നോക്കുകയും,അതിനനുസരിച്ച് ഒരു മുന്‍‌വിധിയോടു കൂടെയുമാണ് ഈ പ്രക്ഷോപണങ്ങളെ കാണുകയും അഭിപ്രായം പറയുകയും ചെയ്തിരുന്നത്.

ക്രിസ്ത്യാനിത്വത്തിന്റെ അധഃപതിച്ച മുഖമായ (കത്തോലിക്ക) പുരോഹിതന്മാര്‍ ഏറ്റു പിടിച്ചപ്പോള്‍, പുരോഗമന വാദി ആകണമെങ്കില്‍ മറുപക്ഷം കൂടിയെ തീരൂ എന്ന ഗതി വന്നു. അതിനിടയില്‍, ഏഴാം ക്ലാസ് പാഠപുസ്തകം ഉയര്‍ത്തുന്ന അപകടകരമായ ആശയം വിസ്മരിക്കപ്പെട്ടു പോവുകയും ചെയ്തൂ.

മതമില്ലാത്ത ജീവന്‍:ഇതാണ് ആരോപണ വിധേയമായ പ്രധാന പാഠം

സ്കൂളില്‍ ചേര്‍ക്കാന്‍ കുട്ടിയോടൊപ്പം എത്തിയ രക്ഷിതാക്കളെ മുന്നിലുള്ള കസേരകളില്‍ ഇരുത്തി ഹെഡ്മാസ്റ്റര്‍ അപേക്ഷ പൂരിപ്പിക്കാന്‍ തുടങ്ങി.

'മോന്റെ പേരെന്താ?"
'ജീവന്‍'
'കൊള്ളാം . നല്ലപേര്‌. അച്ഛന്റെ പേര്‌?'
'അന്‍വര്‍ റഷീദ്‌'
'അമ്മയുടെ പേര്‌?'
'ലക്ഷ്മീ ദേവി'
ഹെഡ്മാസ്റ്റര്‍ മുഖമുയര്‍ത്തി രക്ഷിതാക്കളെ നോക്കി ചോദിച്ചു.
'കുട്ടിയുടെ മതം ഏതാ ചേര്‍ക്കേണ്ടത്‌?'
'ഒന്നും ചേര്‍ക്കേണ്ട. മതമില്ലെന്ന് ചേര്‍ത്തോളൂ.'

"വലുതാകുമ്പോള്‍ ഇവന് ഏതെങ്കിലും മതം വേണമെന്ന് തോന്നിയാലോ?"

"അങ്ങനെ വേണമെന്ന് തോന്നുമ്പോള്‍ അവനു ഇഷ്ടമുള്ള മതം തിരഞ്ഞെടുക്കട്ടെ."

ഒരു മിശ്ര വിവാഹത്തില്‍ ജനിച്ച കുട്ടിയെ സംബന്ധിച്ച് മാതാ പിതാക്കള്‍ അവരവരുടെ മതങ്ങളില്‍ തന്നെ തുടരുന്നു പക്ഷം, ഇതാണ് ഏറ്റവും നല്ല തീരുമാനം എന്നതില്‍ ആര്‍ക്കും തര്‍ക്കം ഉണ്ടാകാന്‍ ഇടയില്ല.

പക്ഷേ, നമ്മുടെ നാട്ടില്‍ മിശ്രവിവാഹങ്ങള്‍ അപൂര്‍വ്വമായിട്ടാണ് ഇക്കാലത്തും നടക്കുന്നത്. അതുകൊണ്ട് അതിനെ സാമന്യവല്‍കരിക്കുന്നത് (generalize)ശരിയാവുകയില്ല.

ക്രിസ്ത്യാനി ആയ എനിക്കും ക്രിസ്ത്യാനിയായ എന്റെ ഭാര്യയ്ക്കും ജനിച്ച മകനെ വളര്‍ത്തേണ്ട വഴിയെ പറ്റി ബൈബിളില്‍ കൃത്യമായ നിര്‍ദേശം ഉണ്ട്. അതു “അവന്‍ പ്രായമാകുമ്പോള്‍ തിരഞ്ഞെടുക്കട്ടെ” എന്ന ആശയത്തിനു ഘടക വിരുദ്ധമാണത്..

“ബാലന്‍ നടക്കേണ്ടുന്ന വഴിയില്‍ അഭ്യസിപ്പിക്കുക, അവന്‍ വൃദ്ധനായാലും അതില്‍ നിന്നും പിന്മാറുകയില്ല” (സദൃശ്യവാക്യങ്ങള്‍ .22:6)എന്നാണ് ബൈബിള്‍ പഠിപ്പിക്കുന്നത്.
മാത്രമല്ല, പൂര്‍വ്വപിതാക്കന്മാരെ ദൈവം നടത്തിയ വഴികളെക്കുറിച്ച് വരും തലമുറയോട് പറഞ്ഞുകൊടുക്കുവാന്‍ യഹോവ മാതാപിതാക്കളെ ഭരമേല്‍പ്പിക്കുകയും ചെയ്തിട്ടൂണ്ട്.

പഴയ നിയമ പെരുന്നാളികളില്‍ പ്രധാനപ്പെട്ട ഒന്നായ ‘പെസഹ’ആചരിക്കുമ്പോള്‍ അതിലെ മുഖ്യമായ ഒരു ചടങ്ങ്, അപ്പം മുറിച്ച് ഭക്ഷിച്ചു കഴിഞ്ഞു, വീട്ടിലെ കുട്ടികള്‍ ആരെങ്കിലും എഴുന്നേറ്റ് വീട്ടിലെ കാരണവരോടു ചോദിക്കും, “നമ്മള്‍ എന്തിനാണ് ഈ പെസഹ ആഘോഷിക്കുന്നത് ?”

അപ്പോള്‍, തങ്ങളുടെ പിന്‍‌തല മുറക്കാര്‍ ഈജിപ്റ്റില്‍ കഷ്ടപ്പെട്ടതും, അവസാനം ദൈവം അവരെ സ്വതന്ത്രരാക്കിയ ചരിത്രവും വിശദമായി പറഞ്ഞു കേള്‍‍പ്പിക്കുമായിരുന്നു.ഇതു തലമുറ തലമുറയായി തുടരണമെന്നത് യഹോവയുടെ ഒരു കല്പനയാണ്.(പുറപ്പാട്. 12:24-26)

അതുകൊണ്ട് വള‍ന്നു വരുമ്പോള്‍ തിരഞ്ഞെടുക്കുവാന്‍, മക്കളെ വിടുന്നത് ക്രിസ്ത്യന്‍ കാഴ്ചപ്പാടുകള്‍ക്ക് വിരുദ്ധമാണ്, അനുവദിക്കാവുന്നതല്ല.

അദ്ധായം പ്രതി ഈ പാഠ പുസ്തകം വായിച്ചാല്‍ മിക്ക ഭാഗങ്ങളും ശ്രേഷ്ഠ്കരമായ ആശയമായി തോന്നും. എന്നാല്‍ ഈ പുസ്തകത്തിന്റെ രചയിതാക്കള്‍ വള്രെ, സമര്‍ത്ഥമായി, എന്നാല്‍ ഒട്ടൊക്കെ ഗൊപ്യമായി, ഒരൊറ്റ ആശയം മാത്രം വിദ്യാര്‍ഥിയുടെ ചിന്തയിലേക്ക് കടത്തിവിടുവാന്‍ ശ്രമിക്കുന്നു. അതു മത വിശ്വാസത്തേക്കള്‍ , മതമില്ലായ്മയാണ് മേത്തരം എന്ന ആശയമാണ്.അതാണ് ഈ പുസ്തകത്തിന്റെ അപകടവും!

ഈ ആശയം സാധൂകരിക്കുന്നതിന്, രചയിതാക്കള്‍, നെഹ്രുവിന്റെ ഒസ്യത്ത് തപ്പി പിടിച്ചു എടുത്തു പാഠഭാഗമാക്കി.പ്രകൃതിക്ഷോഭം വിഷയമാക്കി.എല്ലാ മത ഗ്രന്ഥങ്ങളുടെ ഉദ്ധരിണികളേയും നിരത്തി വച്ചു. ഓരോ അധ്യായത്തിന്റെ ഒടുവിലും, ചേര്‍ത്തിരുക്കുന്ന ചര്‍ച്ചയിലും, ചോദ്യങ്ങളിലും, പുസ്തക രചയിതാക്കള്‍ ആഗ്രഹിച്ച നിഗമനത്തില്‍ കുട്ടികള്‍ എത്തിച്ചേരത്തക്ക വിധം വിഷയങ്ങളെ കൃമീകരിച്ചിരിക്കുന്നു.

വിദ്യാര്‍ത്ഥിയുടെ സ്വതന്ത്ര ചിന്തയെ ഉദ്ദീപിപ്പിക്കുകയല്ല, മറിച്ച് ഒരു കുഴലിലൂടെ വെള്ളം ഒഴുകുന്നതുപോലെ, ഇടത്തോട്ടൊ വലത്തൊട്ടൊ തിരിയാന്‍ അനുവദിക്കാതെ കൃത്യമായി ഗ്രന്ഥ കര്‍ത്ത്ക്കള്‍ ഉദ്ദേശിച്ച ഒരു ഉത്തരത്തില്‍ കൊണ്ടു പോയി എത്തിക്കുന്ന ചോദ്യങ്ങള്‍ നിരത്തി വയ്ക്കുന്നു.അവിടെയാണു ഡിസെപ്ഷന്‍.

ആ പുസ്തകം ഒരു കൊണ്‍‌‌വെക്സ് ലെന്‍സുപ്പോലെയാണ്. അതിലൂടെ ഏതു കോണില്‍ നിന്നു വരുന്ന പ്രകാശരശ്മി കടത്തിവിട്ടാലും ഒരൊറ്റ ബിന്ദുവില്‍ ‍(ഫോക്കസ്) ചെന്നു കൂട്ടിമുട്ടും.ജെവഹരിലാല്‍ നെഹ്രുവിന്റെ ഒസ്യത്തായാലും, കേരള ചരിത്രമായാലും, കാര്‍ഷിക സമരങ്ങളായാലും,പ്രകൃതി ക്ഷോഭം ആയാലും, “ജീവന്റെ“ മതത്തേക്കുറിച്ച് ആയാലും,ബൈബിള്‍, ഖുര്‍-ആന്‍ (മിസ്)കോട്ടിങ് ആയാലും ഈ ലെന്‍സിലൂടെ കടന്നു പോയിട്ട് ഒരൊറ്റ ബിന്ദുവില്‍ ചെന്നു മുട്ടുന്നു.
“മതമില്ലായ്മയാണ്“ മേത്തരം എന്ന ഒരൊറ്റ ബിന്ദുവില്‍.

വിദ്യാലയങ്ങളെ അതിന് ഉപയോഗിക്കുന്നത് ശരിയല്ല.

മതം പഠിപ്പിക്കുന്നതിന് വിദ്യാലയങ്ങള്‍ ഉപയോഗിക്കേണ്ടതില്ല. എന്നാല്‍ മതം ഇല്ലായ്മയാണ് ശ്രേഷ്ഠം എന്ന് സ്ക്കൂളുകള്‍ വഴി പഠിപ്പിക്കുവാനും പാടില്ല.മതമില്ലാത്ത ജീവിതത്തിന്റെ മഹനീയത പഠിപ്പിക്കാന്‍, സാഹാഹ്ന ക്ലാസ്സൂകളൊ, പുസ്തകങ്ങളൊ ഉപയോഗിക്കട്ടെ! മതേതര സര്‍ക്കാറിന്റെ പാഠ പുസ്തകത്തെ ഉപയോഗിക്കരുത്.

4.ഭര്‍ത്താവ് കഠിനഹൃദയനാണോ?

2008-07-01T11:28:00.003+03:00

മഹാ ജ്ഞാനിയായ ഒരു താപസന്‍ ഒരു പര്‍വ്വത ശിഖിരത്തില്‍ വസിച്ചിരുന്നു.

അറിവിനും, പ്രശ്ന പരിഹാരങ്ങള്‍ക്കുമായി അദ്ദേഹത്തെ ജനങ്ങള്‍ സന്ദര്‍ശിക്കുക പതിവായിരുന്നു.

ഒരു ദിവസം ഒരു സ്ത്രീ താപസനെ കാണുവാന്‍ എത്തി.

“എന്റെ ഭര്‍ത്താവിന്‍ എന്നോട് വലിയ സ്നേഹവും കരുതലും ആയിരുന്നു” കരഞ്ഞുകൊണ്ട് അവള്‍ മുനിയോടു പറഞ്ഞു.
“എന്നാല്‍, അദ്ദേഹം യുദ്ധത്തിന്‍ പോയിട്ട് മൂന്നു വര്‍ഷം കഴിഞ്ഞ് ആണ് മടങ്ങി വന്നത്. അതോടെ അദ്ദേഹത്തിന്റെ സ്വഭാവം ആകെ മാറിപ്പോയി”

അവള്‍ കണ്ണീരു തുടച്ചു കൊണ്ട് തുടര്‍ന്നു, “ഇപ്പോള്‍ അദ്ദേഹം, ക്ഷിപ്ര കോപിയും, ദുശാഠ്യകാരനുമായിരിക്കുന്നു! ഒരു വിധത്തിലും അദ്ദേഹത്തിന്റെ കൂടെ കഴിയുവാന്‍ പറ്റുന്നില്ല”

“യുദ്ധം പട്ടാളക്കാരെ ഇങ്ങനെ മാറ്റികളയുന്നു” മുനി പറഞ്ഞു. ഒരു നിമിഷം ആലോചിച്ചിട്ടു പറഞ്ഞു,
“എന്റെ കൈയ്യില്‍ ഒരു ലേ‍ഹ്യം ഉണ്ട്. ഭര്‍ത്താവിന് അതു കൊടുത്താല്‍ മതി. എല്ലാം ശരിയാകും!പക്ഷേ..”
“എന്താ ഗുരോ?”

“അതിന്റെ ചേരു വകയില്‍ ഒന്നു മാത്രം എന്റെ പക്കല്‍ ഇല്ല. അതു നീ കൊണ്ടു വരണം!”
“എന്താണത്?”

“പുലിയുടെ ഒരു മീശ!”

“എന്ത്?”

“അതെ മകളെ, പുലിയുടെ മീശകൂടി ചേര്‍ത്താലേ അതിന്റെ ഗുണം, ലഭിക്കൂ..”

ഇത്രയും പറഞ്ഞിട്ട് മുനി ആശ്രമത്തിനകത്തേക്കു കയറിപ്പോയി.

അവള്‍ ഒന്നു ശ്രമിക്കാന്‍ തന്നെ തീരുമാനിച്ചു.

പുലിയെ തേടി വനത്തില്‍ എത്തി. നടന്നു തളര്‍ന്ന് വെള്ളം കുടിക്കുവാന്‍ ഒരു അരുവിയുടെ അടുത്ത് എത്തിയപ്പോള്‍ അതാ നില്‍ക്കുന്നു ഒരു ഉശിരന്‍ പുലി.

അവള്‍ ഭയപ്പെട്ടു പോയി.
അവളെ കണ്ടതും പുലി മുരളിക്കൊണ്ട് ഒറ്റ ചാട്ടം. അവള്‍ ഓടി രക്ഷപ്പെട്ടു.

അല്പ സമയം കഴിഞ്ഞ് വീണ്ടും പുഴയ്കരികില്‍ അവല്‍ വീണ്ടും ചെന്നു.
അപ്പോള്‍ പുലി ദാഹം തീര്‍ത്തിട്ട് വിശ്രമിക്കുകയായിരുന്നു.
അവളെ കണ്ടപ്പോല്‍ വീണ്ടും ചീറ്റിക്കൊണ്ട് വന്നു.

അവള്‍ പിന്നെയും ഓടി മാറി.

അന്ന് അവള്‍ നിരാശയോടെ വനത്തില്‍ കിടന്നുറങ്ങി.
അടുത്ത ദിവസം അതേ സ്ഥലത്ത് വിണ്ടും പുലിയെ കണ്ടു മുട്ടി.

ഇന്നു പുലി ഒന്നു ചീറ്റുക മാത്രം ചെയ്തു ചാടി വന്നില്ല.

അടുത്ത ദിവസം അവള്‍ പുലിക്ക് അല്പം ഇറച്ചി കൊണ്ടുവന്നു.

അതു പുഴയ്ക്ക് അരികില്‍ വച്ചിട്ട് മാറിനിന്നു.ഇറച്ചിയുടെ മണം പിടിച്ച പുലി അത് മൃഷ്ടാന്നം തിന്നു. ഇത് എന്നും തുടര്‍ന്നു.

ഇപ്പോള്‍ പുലി പുഴക്കരില്‍ വന്നാല്‍ അവള്‍ എവിടെ എന്നു നോക്കും..ക്രമേണ..അവര്‍ സ്നേഹിതര്‍ ആയിത്തീര്‍ന്നു.

പുലി വിശ്രമിക്കുമ്പോള്‍ അവള്‍ ചെന്നു അരികില്‍ ഇരിക്കും.ഒരു ദിവസം ഉറങ്ങുന്ന പുലിയുടെ തല എടുത്ത് മടിയില്‍ വച്ചു, അവളുടെ ഹൃദയ മിടിച്ചു.. അതാ പുലി മീശ ...

ഒരെണത്തില്‍ പിടിച്ച് ഒറ്റ വലി..
പുലി ചാടി എഴുന്നേറ്റു..പക്ഷേ ആ സ്ത്രീയുടെ ചിരിക്കുന്ന മുഖം കണ്ട് വീണ്ടും കിടന്നുറങ്ങി..

ഒറ്റ ഓട്ടത്തിന്‍ അവള്‍ മുനിയുടെ ആശ്രമത്തില്‍ എത്തി.

മുനി പുലി മീശ തിരിച്ചും മറിച്ചും നോക്കി. പിന്നെ ഒന്നും പറയാതെ മുന്നില്‍ എരിയുന്ന ഹോമ കുണ്ഡത്തിലേക്ക് എറിഞ്ഞു!

ആ സ്ത്രീ ഞെട്ടിപ്പോയി.

“ഗുരോ ലേഹ്യം...?”

മുനി പറഞ്ഞു “മകളെ , ഇനി നിനക്ക് ലേഹ്യത്തിന്റെ ആവശ്യം ഇല്ല. നിന്റെ ഭര്‍ത്താവിനെ എങ്ങിനെ കൈകാര്യം ചെയ്യണം നീ പഠിച്ചു കഴിഞ്ഞു.നീ എങ്ങിനെ ആ പുലിയെ സ്വാധീനിച്ചൊ അങ്ങിനെ തന്നെ നിന്റെ ഭര്‍ത്താവിനോടും ചെയ്യുക. സൌമ്യത കൊണ്ടും ദീര്‍ഘഷമകൊണ്ടും തിരിച്ചറിവില്ലാത്തെ ഒരു ക്രൂര മൃഗത്തെ നിനക്ക് സ്വാധീനിക്കുവാന്‍ കഴിഞ്ഞു എങ്കില്‍ നിനക്ക് നിന്റെ ഭര്‍ത്താവിനെ സ്വാധീനിക്കുവാന്‍ നിഷ്പ്രയാസം കഴിയും”

തിരിച്ചു വീട്ടിലേക്ക് പോകുമ്പോള്‍ അവളുടെ മനസ്സ് ശാന്തമായിരുന്നു.
ദൂരെ നിന്നെ അവള്‍ വരുന്നത് ഭര്‍ത്താവു കണ്ടു. അയാല്‍ അട്ടഹസിച്ചു കൊണ്ട് അവളുടെ അടുത്തേക്ക് വന്നു.

“നീ എവിടെ ആയിരുന്നെടീ‍...?”

അവള്‍ ഒരു പുഞ്ചിരിയുമായി അയാളെ നേരിട്ടു. കാരണം അപ്പോള്‍ അവളുടെ മനസ്സില്‍, ആദ്യദിവസം പുഴയ്ക്കരികില്‍ വച്ചു ചാടി വന്ന പുലിയുടെ മുഖം ഓര്‍മ്മ വന്നു.

അവള്‍ മനസ്സില്‍ പറഞ്ഞു, ”നോക്കിയിരുന്നോ അധികം താമസിക്കാതെ നിന്റെ മീശയും ഞാന്‍ പറിക്കും..!”

(മീശ നഷ്ടപ്പെട്ട പലരും ഇത് വായിക്കുന്നുണ്ടെന്ന് എനിക്ക് അറിയാം!!)

പൂര്‍ണ്ണ വിനയത്തോടും, സൌമ്യതയോടും, ദീര്‍ഘ ക്ഷമയോടും കൂടി നടക്കുകയും സ്നേഹത്തില്‍ അന്യോന്യം ക്ഷമിക്കുകയും ചെയ്യുവിന്‍ എഫേസ്യര്‍ 4:2

ഒരു നാടോടി കഥ

3. കൂരങ്ങിന്റെ ഉപവാസം

2008-06-26T09:56:00.003+03:00

ഒരു കൂട്ടം കുരങ്ങന്മാര്‍ ഒരു ദിവസം ആറിന്റെ തീരത്ത് ഒത്തുകൂടി.

അതില്‍ ഏറ്റവും പ്രായം കൂടിയ മുത്തന്‍ കുരങ്ങ് പറഞ്ഞു
“ഇന്നു നമുക്ക് ഒരു നല്ല കാര്യം ചെയ്യാം.ഒരു ദിവസം നമ്മള്‍ എല്ലാവരും അഹാരം വെടിഞ്ഞ് ഉപവസിക്കാം! എന്തു പറയുന്നു?”

എല്ല്ലാവര്‍ക്കും സമ്മതമായി. കൊള്ളാം നല്ല കാര്യം!

“പക്ഷേ, ഒരു കാര്യം ചെയ്യണം” മുത്തന്‍ കുരങ്ങു തുടര്‍ന്നു “ഉപവാസം തുടങ്ങുതതിന് മുന്‍പ് , നോമ്പ് മുറിക്കുവാനുള്ള ആഹാരം തയ്യാര്‍ ചെയ്ത് വയ്ക്കണം"

എല്ലാവരും തല കുലുക്കി സമ്മതം രേഖപ്പെടുത്തി.

കുട്ടി കുരങ്ങന്‍മാര്‍ അഹാരം തേടി യാത്രയായി..

കൈ നിറയേ മധുരമുള്ള വാഴപ്പഴങ്ങളുമായി അവര്‍ ഉടനെ മടങ്ങിയെത്തി

മുത്തന്‍ കുരങ്ങിന്റെ ഭാര്യ മുന്‍പോട്ടു വന്നു. “എനിക്കു തോന്നുന്നു, ഉപവാസം തുടങ്ങുന്നതിനു മുന്‍പ്, വാഴപ്പഴങ്ങള്‍ വീതം വയ്ച്ച് അവരവര്‍ക്കുള്ളത് മാറ്റി വയ്ക്കുന്നത് നന്നായിരിക്കും” അവര്‍ വിശദീകരിച്ചു “കാരണം, ഉപവാസം കഴിഞ്ഞ് എല്ലാവരും നന്നായി വിശന്ന് ഇരിക്കുമ്പോള്‍ വീതം വയ്ക്കുന്നത് ശരിയാവില്ല” പരിചയം സിദ്ധിച്ച ഒരു നല്ല കുടുംബിനി ആയിരുന്നു അവള്‍.

മുത്തന്‍ കുരങ്ങിന്റെ നേതൃത്വത്തില്‍ ഭക്ഷണം വീതം വച്ചു. ഓരോരുത്തര്‍ താന്താങ്ങളുടെ വീതം മാറ്റിവച്ചു.

“ഈ വാഴപ്പഴങ്ങള്‍ പൊളിച്ചു റെഡി ആക്കി വയ്ക്കൂന്നതില്‍ എന്താണ് കുഴപ്പം?” വിദേശത്ത് പഠിച്ചുകോണ്ടിരുന്ന ഊശ്ശാന്‍ താടിക്കാരന്‍ കുട്ടി കൂരങ്ങന്‍ ചോദിച്ചു “സൊ ദാറ്റ് വി കാന്‍ ഹാവ് ഇറ്റ് ആസ് സൂണ്‍ ആസ് ദി ഫാസ്റ്റിങ് ഈസ് ഫിനിഷ്ഡ്?“

മൂത്തന്‍ കുരങ്ങിന് ഇംഗ്ലീഷ് മനസ്സിലായില്ലെങ്കിലും മനസ്സിലായതുപോലെ തല കുലുക്കി.

ചില യാഥസ്തിക കുരങ്ങന്‍മാര്‍ക്ക് രസിച്ചില്ല. അവര്‍ ചോദിച്ചു

“അതു വേണോ?”.

ഊശാന്‍ താടിക്കാരന്‍ കുട്ടികുരങ്ങിന്റെ ചെവിയില്‍ ഐ പോഡിന്റെ ഈയര്‍ഫോണ്‍ ഇരുന്നതു കൊണ്ട് അതു ശരിക്കും കേട്ടില്ല.

അവന്‍ മറുപടിക്ക് കാത്തി നില്‍ക്കാതെ പഴങ്ങള്‍ പൊളിച്ചു റെഡിയാക്കി വച്ചു.

ഇംഗ്ലിഷ് പറയുന്നവര്‍ ചെയ്യുന്നത് എല്ലാവരും അനുസരിക്കണമല്ലോ! അതാണ് നാട്ടു നടപ്പ്.

നിമിഷങ്ങള്‍ക്കുള്ളില്‍ എല്ലാവരുടെയും മുന്‍പില്‍ തൊലികളഞ്ഞ വാഴപ്പഴങ്ങള്‍ നിരന്നു.

“ഈ തൊലി കളഞ്ഞ പഴം വായില്‍ ഇട്ടു വയ്ക്കുന്നതില്‍ എന്തെങ്കിലും കുഴപ്പം ഉണ്ടോ?” കുസൃതിക്കുരുന്നായ കുഞ്ഞന്‍ കുരങ്ങനിന് ഒരു സംശയം.

“ദൈവത്താണെ ഞാനിത് ഉപവാസം കഴിയാതെ ഇറക്കത്തില്ല...!!”

എല്ലാവരും മുഖത്തോടു മുഖം നോക്കി.
മുത്തന്‍ കുരങ്ങു മൌനം ദീക്ഷിച്ചു.

മുത്തന്‍ കുരങ്ങിന്റെ ഭാര്യ മുന്‍പോട്ടു വന്നു. പ്രതിസന്ധി ഘട്ടങ്ങളില്‍ പൊതുവെ അവര്‍ അങ്ങിനെയാണ്.

“ വിഴുങ്ങുകയില്ല എന്ന് ഉറപ്പുള്ളവര്‍ക്കെല്ലാം പഴം വായില്‍ നിറച്ചു വയ്ക്കാം!!”

നിമിഷങ്ങള്‍ക്കുള്ളില്‍ എല്ലാവരുടെയും പ്ലെയിറ്റ് കാലിയായി. കൊള്ളാവുന്നതിലധികം പഴം വായിക്കകത്ത് ഇരിക്കുന്നതു കൊണ്ട് മിക്കവരുടെയും കണ്ണ് പുറത്തേക്ക് തള്ളി വന്നു.

മുത്തന്‍ കുരങ്ങു സൂക്ഷിച്ചു നോക്കിയപ്പോള്‍ എല്ലാവരുടെയും തൊണ്ടയില്‍ ഒരു ചലനം. പക്ഷേ ഒന്നും മിണ്ടിയില്ല!
കാരണം മുത്തന്‍ കുരങ്ങിന്റെ വായും ഇതിനകം കാലിയായിരുന്നു..

ഒരു വലിയ തിരുമാനത്തിന്റെ ദയനീയ അന്ത്യം!!

പ്രലോഭനത്തിലേക്കുള്ള യാത്ര വളരെ സാവധാനവും യുക്തി ഭദ്രവും ആ‍യിരിക്കും. ഓരോദിവസം ഓരൊ ചുവട്, അവസാനമോ,കൈപ്പ് നിറഞ്ഞതും!!

വീഴുകയില്ല എന്ന ഉറപ്പിന്മേല്‍ അഗാധ ഗര്‍ത്തത്തിന്റെ വക്കില്‍ ചെന്നു നില്‍ക്കുന്നത് ബുദ്ധിമോശം ആയിരിക്കും..

(യേശു പറഞ്ഞു “പരീക്ഷയില്‍ അകപ്പെടാതിരിപ്പാന്‍ ഉണര്‍ന്ന് ഇരുന്ന് പ്രാര്‍ത്ഥിപ്പിന്‍, ആത്മാവ് ഒരുക്കമുള്ളത് ജഡമോ ബലഹീനമത്രേ മത്തായി 26: 41)

(ഒരു നാടോടി കഥ)

2. മരിക്കുവാന്‍ ഭയമുണ്ടോ?

2008-06-22T00:46:00.001+03:00

രാജ കൊട്ടാരത്തില്‍നിന്നും കൂട്ട നിലവിളി ഉയര്‍ന്നു.
ഇന്നു രാജാവിന്റെ അവസാനത്തെ ദിവസമാണ്. നാളെ നേരം പുലരുമ്പോള്‍, പ്രത്യേകമായി തയ്യാര്‍ ചെയ്ത തോണിയില്‍ രാജാവിനെ കയറ്റി ദൂരെയുള്ള ആ ദ്വീപില്‍ കൊണ്ടു ചെന്ന് ഇറക്കിവിടും. വന്യമ്രുഗങ്ങള്‍ സ്വര്യവിഹാരം ചെയ്യുന്ന ആ കൊടും കാട്ടില്‍ ചെന്നവര്‍ ആരും ഇതുവരെ തിരുച്ചു വന്നിട്ടില്ല.

വിചിത്രമായ ആചാരം ആയിരുന്നു ആ രാജ്യത്ത് നിലനിന്നിരുന്നത്. ഓരോ വര്‍ഷവും ആ വര്‍ഷത്തേക്കുള്ള രാജാവിനെ തിരഞ്ഞെടുക്കും. എല്ലാ സുഖ സൌകര്യങ്ങളോടും അധികാരത്തോടും കൂടി ഒരു വര്‍ഷം കൊട്ടാരത്തില്‍ വാഴും! ഒരോ മാസവും ഒരു വന്‍‌തുക പ്രതിഫലമായി ലഭിക്കുകയും ചെയ്യും.സുഖലോലുപന്മാരായ രാജാക്കന്മാര്‍ നാളെയെക്കുറിച്ച് വിചാരം ഇല്ലാതെ അധികാരം ലഭിച്ചു കഴിയുമ്പോള്‍ എല്ലാം മറന്ന് രാജ്യംഭരിക്കും. പക്ഷെ, ഒരു വര്‍ഷം തികയുന്ന ദിവസം രാജാവിനെ പടയാളികള്‍ ചേര്‍ന്ന്, പ്രത്യേകമായി തയ്യാര്‍ ചെയ്ത തോണിയില്‍ കയറ്റി, ദൂരെയുള്ള ഏകാന്ത ദ്വീപില്‍ കൊണ്ടു ചെന്നു ഇറക്കി വിടും! രാജാവ് പത്ത് അടി വയ്യ്ക്കുന്നതിനു മുന്‍പേ, മ്രുഗങ്ങള്‍ക്ക് ഈരയാകും.അതാണ് പതിവ്. പടയാളി‍കള്‍ തിരിച്ചു വരുമ്പോഴേക്കും പുതിയ രാജാവ് രാജ്യ ഭാരം ഏറ്റെടുക്കനുള്ള ആഘോഷങ്ങള്‍ പൂര്‍ത്തിയായിട്ട് ഉണ്ടായിരിക്കും.

ഈ വര്‍ഷത്തെ രാജാവിന്റെ ഊഴം ഇന്നു തീരുകയാണ്. പക്ഷേ, ഇത്തവണ പതിനു വിപരീതമായി,പുതിയതായി രാജ്യം ഭാരം ഏല്‍ക്കുവാന്‍ ആരും തയ്യാറായി മുന്പോട്ടു വന്നിട്ടില്ല.വിളമ്പരം ചെയ്തിട്ട് പല ദിവസങ്ങളായി.

അവസാനം ഒരു സാധുവായ മനുഷ്യന്‍ സമ്മതം അറിയിച്ചു.

കൊട്ടാരത്തില്‍ സന്തോഷം അലതല്ലി.കിരീട ധാരണത്തിനുള്ള ഒരുക്കങ്ങള്‍ല്‍ ആരംഭിച്ചു.

പതിവു പോലെ, മുന്‍‌രാജാവിനെ കയറ്റിയ തോണി കണ്ണീരോടെ കൊട്ടാരം വിട്ടു.അന്തപ്പുരത്തില്‍ നിന്നും അലമുറ ഉയര്‍ന്നു.
അങ്ങനെ പുതിയ രാജാവ് ഭരണം ആരഭിച്ചു.

പക്ഷേ, വള്രെ കരുതലോടെയാണ് രാജാവ് ഭരണം നടത്തിയത്.

ആദ്യ മാസം തന്നെ, രാജ്യത്തെഏറ്റവും നല്ല വേട്ടക്കാരെ വരുത്തി. ഒരുകൂട്ടം ആയുധ ധാരികളായ പടയാളികളും കൂടെ അവരെ, ആ ഏകാന്ത ദ്ദ്വീപിലേക്ക് അയച്ചു. ഒരാഴ്ചക്കുള്ളില്‍ മുഴുവന്‍ മ്രുഗങ്ങളെയും കൊന്നു കളയുവാന്‍ ഒരു കല്‍പ്പനയും പുറപ്പെടുവിച്ചു.

അടുത്തമാസം രാജ്യത്തെ ഏറ്റവും നല്ല മരംവെട്ടു കാരെ ആ ദ്വീപിലേക്ക് അയച്ചു. വനം മുഴുവന്‍ വെട്ടിക്കളഞ്ഞ് അവര്‍ തിരിച്ച് എത്തി.

അടുത്തമാസം, രാജ്യത്തെ, ഏറ്റവും നല്ല ശില്പികളെ വരുത്തി. ആ ഏകന്ത ദ്വീപില്‍ മനോഹരമായ ഒരു കൊട്ടാരവും, അനേക രമ്യ ഹര്‍മ്മ്യങ്ങളും, രാജ വീഥികളും പണിയുവാന്‍ കല്‍പ്പിച്ചു..

പിന്നിട്, പൂന്തോട്ടം നിര്‍മ്മിക്കുന്ന പ്രതിഭാധനന്മാരുടെ ഊഴമായിരുന്നു.

അഞ്ചു മാസം കഴിഞ്ഞപ്പോഴേക്കും ആ ഭീതിജനകമായിരുന്ന ഏകാന്ത ദ്വീപ് ഒരു മനോഹര ഉദ്യാനം ആയി ത്തീര്‍ന്നു.

ആ രാജ്യത്തെ ഏറ്റവും നല്ല ഒരു കൂട്ടം ആളുകളെ രാജാവ് ഇതിനകം തിരഞ്ഞെടുത്തിരുന്നു.
അവരെ സൌകര്യങ്ങളോടും കൂടി ആ ദ്വീപില്‍ കൊണ്ടു ചെന്നു അവര്‍ക്ക് അവിടുത്തെ പൌരത്വവും കൊടുത്തു.
തുടര്‍ന്നുള്ള മാസങ്ങളിലെ രാജാവിന്റെ പ്രതിഫലം മുഴുവന്‍ ആ ദേശത്ത് നിക്ഷേപിച്ചു.

എട്ടു മാസങ്ങള്‍ കഴിഞ്ഞപ്പോഴേക്കും, ആ ബുദ്ധിമാനായ രാജാവു പറഞ്ഞു, “ഞാന്‍ എന്റെ രാജ്യ ഭാരം ഒഴിയുവാന്‍ ഇപ്പോഴേ തയ്യാര്‍ ആണ്, എന്നെ നിങ്ങള്‍ ആ ദ്വീപില്‍ കൊണ്ടുപോയി ആക്കുന്നതില്‍ സന്തോഷമേയുള്ളൂ”

പക്ഷേ, ജനങ്ങളുടെ നിര്‍ബന്ധം മൂലം രാജാവു ഒരു വര്‍ഷംതികച്ചു.

രാജാവിനെ കൊണ്ടുപോകുവാനുള്ള തോണി ഒരുങ്ങി.
അന്നു വരെയും, എല്ല രാജക്കന്മാരും നിലവിളിച്ചു കൊണ്ട് മാത്രമേ തോണിയിലേക്കു കയറിയിട്ടുള്ളൂ, എന്നാല്‍ ഇത് ആദ്യമായി, പുഞ്ച്ചിരിയോടെ രാജാവ് ആ വഞ്ചിയില്‍ കയറി.

രാജാവിന്റെ മനസ്സുനിറയെ ആ അക്കരത്തെ ദേശമായിരുന്നു,
അവിടുത്തെ മനോഹര ദൃശ്യം കാണുവാന്‍ കണ്ണുകള്‍ വിടര്‍ന്നു.
അവിടുത്തെ ശ്രേഷ്റ്റന്‍ മാരുമായി ഒരുമിച്ചു ജീവിക്കാന്‍ ഉള്ളം കൊതിച്ചു.

സ്നേഹിതാ, ഒരു ദിവസം നിന്നെയും ഒരു കറുത്ത പെട്ടിയിലാക്കി, ബന്ധുക്കള്‍ ചുവന്നു കോണ്ട് പോകും. അന്നു വീട്ടില്‍ നിന്നു നിലവിളി ഉയരും.

വിശാലമായ ഈ ലോകത്തു നിന്നും ഇടുങ്ങിയ കുഴിയില്‍ ഇറക്കി വച്ചിട്ട് അവരെല്ലാം തിരിച്ചുപോകും.

അക്കരെ ദേശത്തെക്കുറിച്ച് നിനക്ക് ഒരു പ്രത്യാശ ഉണ്ടോ?? അവീടെ നിനക്ക് എന്തെങ്കിലും നിക്ഷേപം ഉണ്ടോ?

അതോ സുഖ ലോലുപന്മാരായ ആ രാജാക്കന്മാരെപ്പോലെ, ബുദ്ധിഹീനമായി നാളുകള്‍ കഴിക്കുകയാണോ?

(പുഴുവും തുരുമ്പും കെടുക്കാതെയും കള്ളന്മാര്‍ തുരന്നു മോഷ്ടിക്കാതെയും ഇരിക്കുന്ന സ്വര്‍ഗ്ഗത്തില്‍ നിക്ഷേപം സ്വരൂപിച്ചു കൊള്ളുവിന്‍- മത്തായി. 6:20)

1. ബൈബിളിന്റെ ഉള്ളിലെ ഒരു കാണാക്കഥ

2008-06-19T07:15:00.001+03:00

വര്‍ഷങ്ങള്‍ക്ക് മുന്‍പ് സേതു ലക്ഷ്മി ഭായി തമ്പുരാട്ടിയുടെ കാലത്ത് പണികഴിപ്പിച്ച റോഡ് ആണ് മൂന്നാറിനുള്ള ഇന്നത്തെ NH49.ഈ റോഡില്‍ നേരിയമംഗലം പാലം കഴിഞ്ഞാല്‍ വാളറ കുത്ത് (വെള്ളച്ചാട്ടം) വരെ ഏതാണ്ട് 10 കിലോമീറ്ററില്‍ അധികം ദൂരം വനത്തിലൂടെയാണ് യാത്ര.

റോഡിന്റെ ഒരു വശം ഉയര്‍ന്ന മലകളും, മറുവശം അഗാധമായ കൊക്കയും.
അടുത്തകാലം വരെ, എല്ലാ മഴക്കാലത്തും ഈ റോഡില്‍ വാഹന ദുരന്തങ്ങള്‍ ഉണ്ടാകുമായിരുന്നു. കൊക്കയിലേക്കു മറിഞ്ഞുപോയ വാഹനങ്ങള്‍ ഉയര്‍ത്തി എടുക്കുന്നത് യാത്രക്കാര്‍ക്ക് ഒരു കൌതുക കരമായ കാഴ്ച ആയിരുന്നു.

ക്രെയിനും മറ്റു ആധുനിക ഉപകരണങ്ങളും ഒന്നും സുലഭമല്ലാതിരുന്നതുകൊണ്ടും, സുഗമമായി ആ ഇടുങ്ങിയ വഴികളില്‍ എത്തിപ്പേടാന്‍ ബുദ്ധിമുട്ട് ഉള്ളതു കൊണ്ടും, വാഹങ്ങളെ ഉയര്‍ത്തുന്നത്, സധാരണ “മാപ്പിള ഖലാസികള്‍” ആയിരുന്നു.

കോതമഗലത്തു നിന്നും മൂന്നാറിനു പോoകുന്ന ഒരു വണ്ടി, യാത്രയുടെ ആരംഭത്തില്‍ തന്നെ കൊക്കയിലേക്കു മറിഞ്ഞു വെന്നു കരുതുക.ഉടനെ തന്നെ ഖലാസികളെ വിളിക്കുന്നു.

കപ്പിയും കയറും, കാലാങ്കിയും, ഉത്തോലകവും, ചെയിന്‍ബ്ലോക്കും കൊണ്ടുവന്ന് കൊക്കയില്‍ കിടക്കുന്ന വാഹനത്തെ അവര്‍ രോഡില്‍ എത്തിക്കും.

രസകരമായ കാര്യം,ഈ ഭാരമേറിയ വാഹനത്തെ വലിച്ചു കയറ്റുന്നത് ഒറ്റയാളാണ്, എന്നതാണ്.

ആദ്യമെ, അടുത്ത മരങ്ങളിലും, പാറക്കെട്ടുകളിലും, വാഹനത്തെ ഭദ്രമായി കെട്ടി വയ്ക്കും. പിന്നീട് ,കഴിയുന്നത്ര ദൂരത്ത് ചെയില്‍ ബ്ലോക് ഉറപ്പിച്ചിട്ട് ഒരാല്‍ അതിന്റെ ചങ്ങല വലിച്ചു കൊണ്ടിരിക്കും. ഒരോ വലിക്കും, ഒരോ ഇഞ്ച് ഈ മറിഞ്ഞ വാഹനം മുകളിലേക്കു കയറിക്കൊണ്ടിരിക്കും. അപ്പോള്‍ വശങ്ങളില്‍ നില്‍ക്കുന്നവര്‍, കയറുകളും, കാലാങ്കിയും മുറുക്കുകയും, മുകളിലേക്കു കയറുന്നതിന് അനുസരിച്ച്, പുതിയ മരങ്ങളിലും, പാറകളിലും കയറുകള്‍ ബന്ധിക്കുകയും ചെയ്യും,ഊട് വച്ചു കൊടുക്കുകയും ചെയ്തുകൊണ്ടിരിക്കും..ചിലപ്പോല്‍ , പല ദിവസങ്ങള്‍ തന്നെ വേണ്ടി വരും ഈ കഠിനമായ ഈ ജോലി പൂര്‍ത്തി ആകുവാന്‍.

വളരെ പ്രതീക്ഷയോടെ, മനുഷ്യന്റെ യാത്ര ആരംഭിക്കുകയാണ് ഉല്പത്തി പുസ്തകം ര‍ണ്ടാമത്തെ അധ്യായത്തില്‍.
എന്നാല്‍ അതു ഏറെ മുന്‍പോട്ടു പോയില്ല. മൂന്നാം അധ്യായത്തില്‍ എത്തിയപ്പോല്‍, മനുഷ്യ കുലത്തിലെ ഏറ്റവും വലിയ ദുരന്തം സഭവിച്ചു, ആ വണ്ടി മറിഞ്ഞു പോയി, വളരെ അഗാധമായ കൊക്കയിലേക്ക്.

സാത്താന്റെ ആദ്യ ശ്രമം തന്നെ ഒരു വന്‍ വിജയം ആയിരുന്നു.

എന്നാല്‍ സ്നേഹമാകുന്ന ദൈവത്തിന് ആ പദ്ധതിയെ ഉപേക്ഷിക്കാന്‍ മനസ്സായില്ല.

താഴെ വീണു പോയ ഈ വാഹനത്തെ,(മനുഷ്യനെ), യാത്രാ യോഗ്യമാക്കി , തിരികെ റോഡില്‍ എത്തിക്കുന്ന,ദീര്‍ഘവും ശ്രമകരവും ആയ പരിപാടികളുടെ സമ്പൂര്‍ണ്ണ വിവരണമാണ് പിന്നീട് ഉല്‍‍പത്തി പുസ്തകം 3ആം അധ്യായം മുതല്‍ വെളിപ്പാടു 21ആം അധ്യായങ്ങള്‍ വരെയുള്ളത്. അതായത് വി. ബൈബിളിന്റെ 99% ഭാഗങ്ങളിലും പരാമര്‍ശിച്ചിരിക്കുന്നത്, പാപ കുഴിയില്‍ വീണ മനുഷ്യന്റെ വീണ്ടെടുപ്പ് (Redemption)എന്ന വിഷയമാണ്.
അതില്‍ ദൈവത്തിനും മനുഷ്യനും ഉള്ള പങ്ക് (Role) മനസിലാകുകയും അനുസരിക്കുകയുമാണ്, മനുഷ്യന്റെ പരമമായ ഉദ്ദേശ്യം.

ഈ പരമമായ ലക്ഷ്യം ഗ്രഹിക്കുന്നതില്‍ നിന്നും വ്യത്യസ്തമായി മറ്റ് എന്ത് ഉദ്ദേശത്തോടെ വി. ബൈബിളിനെ സമീപിച്ചാലും, ബൈബിള്‍, വൈരുധ്യങ്ങളുടെ ഒരു സഞ്ചയമായോ, അസംബന്ധങ്ങളുടെ കലവറയായോ തൊന്നാം.

ഇങ്ങനെ, മനുഷ്യനെ വന്‍ വീഴ്ചയില്‍ നിന്നും ഉയര്‍ത്തുന്നതിന്റെ ഇടയില്‍, നിരാശ ബാധിക്കാതെ പ്രത്യാശയോടെ ഇരിക്കുവാനും, ദൈവ അസ്തിത്വം ബോധ്യപ്പെടുത്തുവാനും മറ്റുമായി ദൈവം നടത്തുന്ന ചില ഇട പെടലുകളാണ് രോഗസൌഖ്യവും മറ്റു സ്വര്‍ഗ്ഗീയ അനുഭവങ്ങളും മറ്റും. ഇതിനു ദൈവത്തിന്റെ ആത്യന്തിക പദ്ധതിയില്‍ തികച്ചും അപ്രധാനമാണ്.

സ്വര്‍ഗ്ഗീയ ദര്‍ശനങ്ങള്‍ ,രോഗസൌഖ്യം മുതലായ ദൈവിക അനുഭവങ്ങളെ, പര്‍വ്വതീകരിക്കുകയോ, വിറ്റു കാശാക്കുകയോ ചെയ്യുന്നവര്‍, ഒരു വന്‍ ദൈവിക പദ്ധതിയെ തുരങ്കം വയ്ക്കുന്നവര്‍ ആണ്.

രോഗം മാറും ക്ഷീണം മാറും തുടങ്ങിയ ആഹ്വാനങ്ങള്‍ മാത്രം ക്രൈസ്തീയ വേദികളില്‍ നിന്നു കേല്‍ക്കുന്നത് ഹൃസ്വ ദൃഷ്ടി യുടെ ഫലമായിട്ടാണ്. നിത്യത എന്ന വീക്ഷണ കോണില്‍ നിന്നു നൊക്കുമ്പോഴ് മാത്രമേ ക്രൈസ്തവ ജീവിതത്തിന്റെ മാധുര്യം മനസിലാവുകയുള്ളൂ. അതായത് ഒരു ക്രിസ്ത്യാനിയുടെ ഉള്‍ക്കണ്ണ് പ്രകാശിക്കേണ്ടത് ഈ 70ഓ 80 ഓ വര്‍ഷത്തെ ജീവിതത്തിനും അപ്പുറത്തെയ്ക്കാണ്. ഹൃസ്വമായ ജീവിതത്തില്‍ സുഖവും സൌകര്യം വര്‍ധിപ്പിക്കുക എന്നുള്ളതല്ല ഈ ജിവിതം കോണ്ടുള്ള ലക്ഷ്യം.

രക്ഷാകര പ്രവര്‍ത്തി പൂര്‍ത്തിയായിട്ടു, അതായത് ഈ വഹനം റോഡില്‍ എത്തിയിട്ട്, ഇനിയും മുന്‍പോട്ടു പോകേണ്ടതുണ്ട്. യതാര്‍ത്ഥത്തില്‍ യാത്ര ആരംഭിച്ചത് കോതമഗലത്തു നിന്നും മൂന്നാറിലേക്ക് ആണ്. ഇടക്കു വണ്ടി മറിഞ്ഞതും, തിരികെ കയറ്റുന്നതും, ഒന്നും പ്രധാന പദ്ധതിയുടെ ഭാഗമല്ല. അതായത് മനുഷ്യന്‍ പാപം ചെയ്തില്ലായിരുന്നുവെങ്കില്‍, ഒരു പക്ഷേ, വി.ബൈബിള്‍ വെറും 5 അധ്യായങ്ങള്‍ മാത്രമുള്ള ഒരു ചെറിയ പുസ്തകം ആയിരു‍ന്നേനെ. അതിന്റെ കാതല്‍ ഇതായിരിക്കും ”ഇതാ മനുഷ്യ പുത്രന്മാരോടു കൂടെ ദൈവത്തിന്റെ കൂടാരം”(വെളി 21:3”.

ഇനി, മറിഞ്ഞപോയ വാഹനത്തെ ഉയര്‍ത്തുന്നത് ഒരൊറ്റ ആള്‍ തന്നെയാണെന്നു കണ്ടല്ലൊ.അതാണ് ക്രിസ്തു.

ഈ മനുഷ്യനെ തിരികെ എത്തിക്കുന്നതിന്‍ മുഴുവന്‍ മുതല്‍ മുടക്കും നടത്തിയിരിക്കുന്നത് ഈശോ ഒറ്റയ്ക്കാണ്. മുടക്കിയ മുതലോ - തന്റെ മുഴുവന്‍ രക്തവും! (That is the only investment in this project.)

(അവസാനിക്കുന്നില്ല)